10 comisiwn digidol newydd yn helpu i ddathlu 75 mlynedd o Gerddorfa Genedlaethol Ieuenctid Cymru

• Mae Cerddorfa Genedlaethol Ieuenctid Cymru (CGIC) yn troi’n 75 yn 2021, sy’n golygu mai hi yw’r gerddorfa ieuenctid genedlaethol hynaf yn y byd

• Mae CGIC wedi comisiynu 10 gwaith siambr newydd, gan gyfansoddwyr o Gymru

• Comisiynwyd rhai o gyn-aelodau mwyaf adnabyddus CGIC, yn cynnwys Syr Karl Jenkins, Hilary Tann a Patrick Rimes

Bydd Cerddorfa Genedlaethol Ieuenctid Cymru - y gerddorfa ieuenctid genedlaethol hynaf yn y byd - yn dathlu ei phen-blwydd yn 75 oed eleni, gyda chymorth 10 comisiwn newydd gan gyfansoddwyr o Gymru.

Mae’r 10 gwaith siambr newydd wedi eu comisiynu gan Gelfyddydau Cenedlaethol Ieuenctid Cymru er mwyn i aelodau’r Gerddorfa, a rhywfaint o gyn-aelodau, eu perfformio gyda’i gilydd mewn grwpiau bychain. Rhoddwyd penrhyddid i’r cyfansoddwyr ysgrifennu ar gyfer unrhyw gyfuniad o offerynnau’r Gerddorfa ac mae pob gwaith yn amrywio o ran maint, o driawdau a phedwarawdau hyd at weithiau siambr ar gyfer 15-20 cerddor. Mae wyth o’r gweithiau newydd wedi eu recordio eisoes gan aelodau a chyn-aelodau CGIC mewn sesiwn recordio yn Neuadd Dewi Sant, Caerdydd, yn barod ar gyfer dathliad pen-blwydd arbennig ar-lein ar Ddydd Iau 21 Hydref.

Mae rhai o gyn-aelodau enwocaf CGIC ymysg y cyfansoddwyr a gomisiynwyd, yn cynnwys Hilary Tann, Patrick Rimes, a Syr Karl Jenkins, a gychwynnodd ei yrfa gerddorol fel oböydd gyda’r Gerddorfa.

“Mae mor gyffrous, allwn i ddim aros i fod yn ôl yn chwarae gyda phobl nad oeddwn i wedi chwarae gyda nhw ers cyhyd. Mae fel pe bae dim wedi newid”
Isobel, aelod CGIC

“Mae bod yn ôl gyda Cherddorfa Genedlaethol Ieuenctid Cymru yn gymaint o bleser, a rhyddhad! Mae wedi bod yn gyfnod mor hir ond ry’n ni mor gyffrous i fod yn ôl.”
Nathan Dearden, Cyfansoddwr a Chyn-aelod CCIC

Llun: Jamie Chapman

Y cyfansoddwyr a’r gweithiau comisiwn yw:

• Jo Thomas - Seeds (i dri chlarinét, ffidil, bas dwbl ac offerynnau taro)

• Bethan Morgan-Williams - Parodi i Dri (clarinét, ffidil, piano)

• Angharad Jenkins a Patrick Rimes – Music for 13 voices

• Lloyd Coleman – Machine (i naw offeryn chwyth)

• Gareth Olubunmi Hughes – Horizon One (ar gyfer ensemble siambr)

• Syr Karl Jenkins – Chums! (trefniant i ensemble siambr ar gyfer pen-blwydd CGIC yn 75 oed)

• Mark Bowden – Wych Elm (daru ddarn ar gyfer ffliwt, fiola a thelyn)

• Claire Roberts - Rhywbeth ar y gweill (i biano, offerynnau taro a llinynnau)

• Hilary Tann - Penrhys Fanfare (i bedwar trymped)

Meddai Gillian Mitchell, Prif Swyddog Gweithredol Celfyddydau Cenedlaethol Ieuenctid Cymru: “Mae mor gyffrous gallu gweithio gyda chymaint o gyfansoddwyr Cymreig disglair ar y prosiect hwn. Mae Cerddorfa Genedlaethol Ieuenctid Cymru wedi cefnogi rhai o gerddorion gorau Cymru dros y degawdau, ac er ein bod yn siomedig nad oes modd inni eto ddod a’r gerddorfa lawn at ei gilydd ar gyfer cwrs preswyl, ry’n ni wir wrth ein bodd ein bod yn gallu cwrdd â’r grwpiau siambr hyn wyneb-yn-wyneb i recordio.”

Mae pob darn wedi ei recordio a’i ffilmio gan lynu at fesurau ymbellhau cymdeithasol priodol, yn unol â’r cyngor iechyd cyhoeddus oedd yn ei le ar y pryd. Ynghyd â nifer fawr o weithgareddau ar-lein eraill, mae’r rhain wedi cymryd lle'r profiad cwrs preswyl byw arferol, sydd dal yn amhosibl oherwydd y cyngor ymbellhau cymdeithasol parhaus. Trwy gydol y pandemig, mae aelodau CGIC wedi elwa o lu o ddosbarthiadau meistr ar-lein yn cynnwys gan y delynores Catrin Finch, y ddau feiolinydd Patrick Rimes a Rachel Podger, y trympedwr Philip Cobb a’r clarinetydd Robert Plane.

Llun: Jamie Chapman

Bydd premiere byd-eang y 10 darn ar gael i’w ffrydio ar-lein am 7pm ar Ddydd Iau 21 Hydref. Caiff y cyngerdd ei ffrydio trwy AM ar amam.cymru/nyaw

Yn ogystal, bydd pob darn ar gael i’w wylio ar-alw am chwe mis arall ar sianelau CCIC ar AM a Youtube. Mae mynediad i’r premiere yn rhad ac am ddim, ond croesewir cyfraniadau tuag at gronfa bwrsariaethau CCIC.

Mae CGIC yn cael ei rhedeg gan Gelfyddydau Cenedlaethol Ieuenctid Cymru, a sefydlwyd yn 2017 i arwain datblygiad chwe ensemble cenedlaethol clodfawr Cymru, yn ogystal ag ystod eang o brosiectau i ddarparu cyfleoedd creadigol ar gyfer pobl ifanc yn y celfyddydau.

Fel elusen gofrestredig, mae Celfyddydau Cenedlaethol Ieuenctid Cymru’n dibynnu ar eich cyfraniadau hael i sicrhau bob amser bod y rhai mwyaf haeddiannol yn gallu ymgysylltu â’r celfyddydau ar y lefel uchaf, waeth beth eu cefndir neu eu sefyllfa economaidd. Dysgwch sut allwch chi ein cefnogi ar ccic.org.uk/cefnogwch-ni

Mae cariad yn yr aer ar gyfer aelodau Theatr Cenedlaethol Ieuenctid Cymru ym mhremiere eu cynhyrchiad ffilm cyntaf erioed

Photo: Kirsten McTernan

Theatr Cenedlaethol Ieuenctid Cymru (ThCIC) yn cyflwyno premiere eu cynhyrchiad ffilm cyntaf erioed, wedi ei ffilmio ar leoliad ledled Cymru

Cast o 14 o actorion ifanc rhwng 16-23 oed, o bob cwr o Gymru, yn perfformio taith epig, llawn cerddoriaeth

Ysgrifennodd y sgriptwraig Hanna Jarman (cydawdur Merched Parchus S4C) sgript a gomisiynwyd yn arbennig ac a ysbrydolwyd gan ensemble y cast

Mae’r sgôr gerddorol epig yn cynnwys cân newydd sbon gan y gantores-gyfansoddwraig Kizzy Crawford

Bydd y cynhyrchiad, sy’n waith ar y cyd rhwng ThCIC a Theatr Clwyd, ar gael i’w ffrydio ar-lein o wefan Theatr Clwyd o Ddydd Gwener 1 - Ddydd Sadwrn 9 Hydref.

---

Mae cast o 14 o aelodau ifanc Theatr Cenedlaethol Ieuenctid Cymru yn mynd ar daith epig, llawn cerddoriaeth yr Hydref hwn, wrth i’w cynhyrchiad digidol o Y Teimlad | That Feeling gael ei ffrydio ar-lein.

Yn y plot, sydd wedi ei ysbrydoli gan ensemble y cast a’i ysgrifennu gan y sgriptwraig Hanna Jarman, mae byd y Duwiau Cariad hynafol yn gwrthdaro gyda realiti cariad yn y Gymru gyfoes. Mae’r gybolfa liwgar, ddwyieithog o ffilm a theatr, gydag ambell lwyaid o Zoom seicedelig, yn cyd-blethu straeon y cymeriadau ifanc wrth iddynt ddathlu ac ailddiffinio’r hyn all cariad fod.

Daw teitl y ffilm o gân syml hyfryd o’r 90au, sef Y Teimlad, gan y band unigryw Datblygu - ac mae’r recordiad gwreiddiol i’w glywed yn y cynhyrchiad, ynghyd â fersiwn newydd a ysbrydolwyd gan aelodau’r cast, a’i chyfannu gan y comisiwn newydd sbon gan y gantores-gyfansoddwraig Kizzy Crawford. Golygodd marwolaeth drist cyn pryd David R Edwards, canwr y band, bod ail-ddychmygu’r themâu hyn gan genhedlaeth newydd o artistiaid ifanc Cymreig yn chwerw-felys.

Mae Hanna Jarman ei hun yn gyn-aelod o Theatr Cenedlaethol Ieuenctid Cymru, ac roedd yn falch iawn i ddychwelyd at ThCIC:

“Mae cael bod yn rhan o Theatr Ieuenctid Cymru eto pymtheg mlynedd ar ôl ymuno y tro cyntaf (rhan o gynyrchiadau'r cwmni yn 2006 a 2008) yn fraint anhygoel. Dwi'n dweud o hyd, mewn ffordd dyna oedd dechre fy ngyrfa fel Actor, a dyna lle nes i gwrdd â Mari Beard fy nghyd sgwennwr ar amryw o brosiectau heddiw.

“Ar ôl trafodaeth gyda’r cwmni, roedden nhw’n awyddus i berfformio darn llawn hwyl ac yn benodol dim byd i neud gyda'r pandemig! Nes i fwynhau yr her a pa well pwnc i drafod na chariad?”

Dyma’r pedwerydd prosiect cydweithredol rhwng ThCIC a Theatr Clwyd yn y blynyddoedd diwethaf a, gyda Hannah Noone, maent wedi ffurfio gweledigaeth ar gyfer cynhyrchiad ffilm theatrig uchelgeisiol a difyr, gaiff ei ffrydio ar-lein gan Theatr Clwyd, sydd wedi canolbwyntio ar y sgiliau y mae perfformwyr eu hangen er mwyn actio ar y sgrîn - yn y Gymraeg a’r Saesneg.

“Pwy ddwedodd eich bod angen llwyfan i greu theatr” Aelod ThCIC

Y cynhyrchiad digidol hwn yw’r cynhyrchiad llawn cyntaf i ThCIC ei berfformio dan y canllawiau ymbellhau cymdeithasol. Roedd yn glir bod y tîm creadigol am ymgolli’n llwyr mewn fformat ffilmio digidol, gan ganiatáu llwyfan ehangach ar gyfer ymateb i anghenion a lleisiau’r perfformwyr ifanc. I lawer o’r perfformwyr, dyma’r tro cyntaf iddynt actio o flaen camera, gan helpu i roi hwb i’w profiad a’u sgiliau fel artistiaid amryddawn.

“Ges i amser a phrofiad gwych. Fe wnaeth fy helpu gymaint gydag ochr actio ar gyfer ffilm ac roedd creu fideo cerddorol yn wallgo’!” Aelod ThCIC

“Mae wir wedi fy helpu i brofi gwahanol agweddau actio, a’r profiad o actio o flaen camera. Mae wedi bod yn wych a dwi wedi mwynhau pob eiliad. Alla’ i ddim aros i weld y ffilm, mae’n mynd i fod yn anhygoel!” Aelod ThCIC

Datblygwyd yr agwedd gydweithredol o weithio gyda’r perfformwyr ymhellach gyda’r gantores-gyfansoddwraig Gymreig Kizzy Crawford, a gomisiynwyd i ysgrifennu anthem gariad newydd sbon ar gyfer ein hoes ni ar gyfer y cynhyrchiad, sef Cymaint o Liwiau, sy’n ymddangos mewn fideo ddathliadol yn arddull yr 80au a goreograffwyd gan Matteo Marfoglia.

Dan lygad creadigol y gwneuthurwr ffilmiau Nico Dafydd, cynhaliwyd y gwaith ffilmio mewn sesiynau Covid-ddiogel mewn lleoliadau ar hyd a lled Cymru, yn amrywio o olygfeydd panoramig o’r mynyddoedd a’r môr ger Bangor, gwacter ingol prif lwyfannau eiconig Theatr Clwyd a Theatr y Sherman, i strydoedd a synau Cathays, Canol y Ddinas a Butetown yng Nghaerdydd. Wedi eu gwasgaru rhwng y golygfeydd hyn, ceir enghreifftiau hynod ddyfeisgar o ffilmio o hirbell o bob cwr o Gymru. Ceir hyd yn oed ambell lwyaid o sesiynau Zoom seicedelig yn cynnwys Duwiau Cariad hynafol cecrus y mae eu cyfarfodydd yn cael eu dyrchafu gan ddyluniad gwisgoedd hardd a grëwyd ar gyfer y cynhyrchiad gan y dylunydd Jacob Hughes, sydd newydd ddylunio ar gyfer cynhyrchiad Shakespeare’s Globe o Romeo and Juliet.

“Fe weithiais ochr-yn-ochr ag artistiaid anhygoel a brwdfrydig a chast talentog a’r grŵp o bobl mwyaf uchelgeisiol imi gwrdd â nhw erioed” Aelod ThCIC

Meddai Tamara Harvey, Cyfarwyddwr Artistig Theatr Clwyd: “Rydym wrth ein bodd yn cydweithio gyda Theatr Cenedlaethol Ieuenctid Cymru ar ‘Y Teimlad / That Feeling’, prosiect ffilm/theatr newydd beiddgar wedi ei ysgrifennu gan y dramodydd rhyfeddol Hannah Jarman. Mae Theatr Cenedlaethol Ieuenctid Cymru yn sefydliad pwysig ac arloesol sydd wedi cynnig y cam cyntaf hanfodol i berfformwyr ifanc Cymru am dros 40 mlynedd. Mae’r cyd-gynhyrchiad hwn yn help i arddangos rhai o egin dalentau mwyaf addawol y Gymru gyfoes.”

Meddai Gillian Mitchell, Prif Weithredwraig Celfyddydau Cenedlaethol Ieuenctid Cymru: “Er gwaethaf heriau gweithio’n ystod y pandemig Covid, rydym wedi bod yn gweithio’n galed i roi cyfleoedd perfformio cyffrous i bob un o’n haelodau ifanc - ac mae’r comisiwn newydd uchelgeisiol hwn yn Gymraeg a Saesneg yn ddim ond un enghraifft. Gyda rhai o ddoniau mwyaf cyffrous Cymru’n rhan o’r cynhyrchiad, alla’ i ddim aros i weld sut mae’r canlyniad terfynol yn edrych ar y sgrîn.

“Mae ein haelodau ifanc wedi ei gwneud hi’n gwbl glir i ni pa mor bwysig yw’r perfformiadau hyn iddyn nhw, ac rydym yn gwybod y gallant fod yn falch o’r cynhyrchiad epig hwn ar gyfer y sgrîn, wrth iddyn nhw symud ymlaen gyda’u gyrfaoedd actio.”

---

Mae’r prosiect yn rhan o dymor Maniffest ThCIC 2021. Mae’r rhaglen blwyddyn gron hon o weithiau comisiwn, prosiectau cydweithredol a mentrau creadigol newydd yn arddangos yr hyn sy’n atgyfnerthu pobl ifanc, ac yn arddangos Cymru fel y mae pobl ifanc yn ei gweld hi yn yr 21ain ganrif – gwlad egnïol, amrywiol a dwyieithog gyda llais artistig cryf.

Am fwy o wybodaeth am Theatr Cenedlaethol Ieuenctid Cymru ewch i www.ccic.org.uk

Mae’r cynhyrchiad ar gael i’w ffrydio ar ddyddiadau penodol rhwng Dydd Gwener 1 a Dydd Sadwrn 9 Hydref. Mae tocyn ffrydio 24-awr yn costio £5 (£3 pris mynediad, £10 pris cefnogwr). I archebu tocynnau ewch i www.theatrclwyd.com.

Cyfle i gwrdd gyda Chynhyrchwyr dan Hyfforddiant newydd CCIC

Mae Celfyddydau Cenedlaethol Ieuenctid Cymru yn falch i fod wedi penodi dau Gynhyrchydd dan Hyfforddiant newydd i’r tîm staff, gan ehangu’r cynnig cyfleoedd ar gyfer pobl ifanc i gychwyn gyrfa yn y celfyddydau.

Mae’r rolau dan hyfforddiant hyn wedi eu dylunio i ymbaratoi pobl ifanc - sydd efallai heb ennill unrhyw brofiad blaenorol yn y celfyddydau - gyda’r sgiliau a’r wybodaeth i drochi eu hunain yn niwydiant celfyddydol Cymru, ac i allu ffynnu yn eu gyrfaoedd i’r dyfodol.

Rydym yn falch i fod wedi penodi Aeron Fitzgerald fel Cynhyrchydd dan Hyfforddiant sy’n gweithio ar draws holl brosiectau Celfyddydau Cenedlaethol Ieuenctid Cymru, ac Elina Lee fel Cynhyrchydd dan Hyfforddiant sy’n canolbwyntio’n benodol ar brosiect Cerdd y Dyfodol ar gyfer 2021 a 2022.

Gyda diolch i Incubator Fund Youth Music, sydd wedi cefnogi creu rôl Cynhyrchydd dan Hyfforddiant Cerdd y Dyfodol, ry’n ni’n edrych ymlaen at ddarparu llawer mwy o gyfleoedd ar gyfer pobl ifanc i gychwyn eu gyrfaoedd yn 2021. Ar hyn o bryd, rydym yn recriwtio trydydd Cynhyrchydd dan Hyfforddiant i weithio’n benodol ar ein rhaglen datblygu corawl, Sgiliau Côr, a byddwn hefyd yn creu chwe swydd Mentor y Dyfodol newydd sbon yn hwyrach eleni.

Meddai Aeron Fitzgerald, Cynhyrchydd dan Hyfforddiant:

“Mae bod yn rhan o dîm Celfyddydau Cenedlaethol Ieuenctid Cymru ers mis Chwefror 2021 wedi bod yn agoriad llygad ac yn gychwyn cyffrous i fy ngyrfa. Feddyliais i erioed y byddai gweithio yn y Sector Celfyddydau Cymreig yn bosibilrwydd i mi, tan imi gael fy ysbrydoli gan athro Ffilm brwd a llawn ysgogiad yn ystod fy arholiadau Safon Uwch. A dyma ni, ychydig flynyddoedd yn ddiweddarach, fe lwyddais i raddio gyda Gradd Anrhydedd mewn Ffilm o Brifysgol De Cymru.

Fel Cynhyrchydd dan Hyfforddiant, mae’n bleser gen i ddatblygu’r rhaglenni gwych yr ydym yn eu cynnig ochr-yn-ochr a’n tîm o staff a’n gweithwyr llawrydd niferus, ac i fod mewn cysylltiad agos gyda’n haelodau neilltuol, yn hen a newydd. Rwy’n cael fy ysbrydoli bob dydd gan ymroddiad a thalent yr actorion, dawnswyr a cherddorion ifanc dawnus hyn ar hyd a lled Cymru, ac mae dysgu am y budd parhaol y mae CCIC yn ei gael ar eu bywydau yn gwneud imi deimlo’n hynod o ffodus. Rwy’n edrych ymlaen yn eiddgar at y broses recriwtio ar gyfer aelodau’r flwyddyn nesaf, sy’n argoeli i fod yn fwy cynhwysol a chynrychiadol o’r Gymru gyfoes nag erioed o’r blaen.”

Dywedodd Elina Lee, Cynhyrchydd dan Hyfforddiant Cerdd y Dyfodol:

“Dwi’n dod o Wlad Thai yn wreiddiol ond fe symudais i Sweden ble y cefais fy magu. Yn 2017 fe symudais i Gaerdydd i ddilyn gradd mewn Cerddoriaeth Boblogaidd a Masnachol a Lleisiol ym Mhrifysgol De Cymru, ble graddiais yn 2020. Yn ystod fy amser yn astudio yn PDC, roeddwn i’n rhan o Ŵyl Immersed!, gŵyl gerdd wedi ei threfnu gan y myfyrwyr, ble cefais fy mhenodi’n Arweinydd Marchnata a chael cyfle i lunio a brandio’r ŵyl o’r cychwyn.

Wedi ymuno â thîm CCIC fel Cynhyrchydd dan Hyfforddiant, rwyf wedi cael y fraint o gynorthwyo gyda chynllunio a throsglwyddo prosiect Cerdd y Dyfodol. Hyd yma, mae wedi bod yn gyffrous cwrdd gyda chymaint o bobl ifanc gyda’r fath dalent anhygoel, ac mae’n teimlo’n braf gwybod eich bod yn rhan o’u taith i ddod yn artistiaid adnabyddus a cherddorion gweithgar y dyfodol.

Y tu hwnt i fod wedi ymuno gyda thîm CCIC yn ddiweddar, rwy’n gweithio hefyd fel cantores-cyfansoddwraig ac rwy’n creu fy mhrosiectau cerdd fy hun pryd bynnag bydd amser. Rwy’n dal i fwynhau canu ac rwy’n gobeithio gallu perfformio’n fyw pan gawn ni hawl i wneud hynny eto.

Yr hyn sydd fwyaf cyffrous am weithio gyda CCIC, yn fy marn i, ydi’r cyfleoedd sy’n cael eu cynnig i’r bobl ifanc. Wrth edrych yn ôl ar pan gychwynnais i greu cerddoriaeth yn berson ifanc, fe hoffwn i fod wedi cael yr un gefnogaeth ac adnoddau ag y mae CCIC yn ei ddarparu i gerddorion dawnus ar hyd a lled Cymru heddiw, a dwi wir yn credu ei bod hi’n hanfodol i roi mwy o le i grwpiau sydd heb gynrychiolaeth ddigonol yn y sîn gerddoriaeth yng Nghymru.”

Cydweithrediad newydd rhwng Theatr Cenedlaethol Ieuenctid Cymru a Hijinx fel rhan o'r tymor Maniffest

Yn ddiweddar, dychwelodd aelodau o Academi Hijinx a Theatr Cenedlaethol Ieuenctid Cymru (ThCIC) i ddyfeisio theatr fyw wyneb-yn-wyneb, i gyd-greu gwaith cynhwysol newydd mewn partneriaeth.

Wrth ddod ynghyd wyneb-yn-wyneb am y tro cyntaf ers cychwyn y cyfyngiadau ymbellhau cymdeithaol, cymerodd yr 8 person ifanc ran mewn prosiect pedwar diwrnod yn llawn creadigedd a chrefft llwyfan. Dan arweiniad Ben Pettit-Wade (Cyfarwyddwr Creadigol, Hijinx), datblygodd aelodau’r cast ddarn gwreiddiol o theatr yn seiliedig ar syniadau a straeon a awgrymwyd gan yr aelodau eu hunain.

Cyn y cwrs yng Nghanolfan S4C Yr Egin yng Nghaerfyrddin, daeth y cast a’r timau creadigol at ei gilydd ar-lein dros Zoom i arbrofi, archwilio, a datblygu syniadau newydd ar gyfer y darn. Er mwyn sicrhau diogelwch pob un o’r cyfranogwyr a’r staff, cydymffurfiodd y prosiect yn llwyr gyda’r holl ganllawiau ymbellhau cymdeithasol ac iechyd cyhoeddus oedd yn ofynnol ar y pryd, gyda phrofion rheolaidd, ymbellhau cymdeithasol a mesurau glanhau ychwanegol yn eu lle trwy gydol y prosiect.

Y gwaith YaD newydd hwn, o’r enw Maniffest/Hijinx, yw’r prosiect diweddaraf sy’n rhan o dymor Maniffest ThCIC, archwiliad blwyddyn o hyd o hunaniaeth ieuenctid a democratiaeth yn y Gymru gyfoes. Dyma’r cam cyntaf mewn ffordd newydd o weithio i Theatr Cenedlaethol Ieuenctid Cymru, yn cyfuno theatr fyw wyneb-yn-wyneb a gweithgareddau ar-lein, gan alluogi pobl ifanc i gydweithio gydag eraill ym mhob cwr o’r wlad.

Ar gydweithio gyda Theatr Hijinx, dywedodd Dafydd Evans, aelod o Theatr Cenedlaethol Ieuenctid Cymru:

“Mae fy mhrofiad ar gwrs ThCIC / Hijinx yn un fydd yn aros gyda mi am amser hir. Roedd y broses o greu’r darn o theatr mor ddifyr; roedd y byrfyfyrio oedd yn rhan o’n gwaith rhannu yn y diwedd yn gymaint o hwyl, dwi’n credu ein bod yn aml iawn wedi anghofio y bydden nhw’n rhan o’r sesiwn rhannu. Fe ddysgais i gymaint am sut y gellir creu theatr mewn ffyrdd eraill ar wahân i gyda phen a phapur, a sut y gall fod yn rhyngweithiol ac yn brofiad ymgollol ar gyfer cynulleidfa. Dwi wedi creu perthnasau newydd gwych gydag aelodau a staff o ThCIC a Hijinx, ac alla’ i ddim aros am y cyfle nesaf inni gyd gwrdd eto.”

Dywedodd Gareth, aelod o Academi Hijinx:

“Roedd cwrdd â gweithio gyda’n gilydd wyneb-yn-wyneb, wedi misoedd o fod ar Zoom, jesd... ’does dim geiriau i fynegi sut dwi’n teimlo, oherwydd roedd yn brofiad mor anhygoel.”

Mae tymor Maniffest eleni’n gyfres o gynyrchiadau sy’n anelu i ddangos beth sy’n atgyfnerthu pobl ifanc, ac i arddangos Cymru fel y mae pobl ifanc yn ei gweld yn yr unfed ganrif ar hugain - gwlad ddwyieithog, amrywiol a bywiog gyda llais artistig cryf.

Mae uchafbwyntiau eraill tymor Maniffest yn cynnwys:

Maniffest 16/17: Cyfres o ffilmiau byrion yn cynnwys monologau gwreiddiol gan aelodau ThCIC, wedi eu creu gan ddramodwyr o bob cwr o Gymru mewn ymateb i hawl pobl ifanc 16 ac 17 oed i bleidleisio am y tro cyntaf. Mae’r pedair ffilm gyntaf ar gael i’w gwylio yma: amam.cymru/maniffest

Maniffest yn Theatr Clwyd: Cynhyrchiad theatr ddigidol ddwyieithog newydd sbon a gyflwynwyd ar-lein, ysgrifennwyd gan Hanna Jarman a’i gyd-gynhyrchu gyda Theatr Clwyd.

Maniffest / Mindset: Prosiect cydweithredol digidol rhwng ThCIC a Theatr Solomonic Peacocks, Malawi, yn archwilio sut all gwneuthurwyr theatr ifanc o wahanol wledydd ddod at ei gilydd i greu theatr gan ddefnyddio eu ffonau symudol. Trosglwyddir y gwaith hwn mewn partneriaeth gyda British Council Cymru.

Fel tymor, bydd Maniffest yn helpu i roi llais i bob cymuned, gan adlewyrchu amrywiaeth pobl ifanc yng Nghymru. Bydd hyn yn cynnwys cyflwyno theatr yn y Gymraeg a’r Saesneg. Wrth i Gymru ddechrau dod ati ei hun wedi effaith COVID-19, mae’r prosiectau wedi eu cynllunio i fod yn bosibl yn ddigidol ac wyneb-yn-wyneb, yn dibynnu ar y cyngor iechyd cyhoeddus sydd yn ei le ar y pryd.

Celfyddydau Cenedlaethol Ieuenctid Cymru i ddyfarnu cannoedd o fwrsariaethau ychwanegol, diolch i ariannu newydd gan Ymddiriedolaeth Leverhulme

Mae Celfyddydau Cenedlaethol Ieuenctid Cymru (CCIC) wedi derbyn grant Ysgoloriaeth Celfyddydau o £165,448 oddi wrth Ymddiriedolaeth Leverhulme, fydd yn cefnogi cannoedd o bobl ifanc o gefndiroedd incwm-is i gymryd rhan yn ein hyfforddiant perfformio lefel uchel.

Bydd yr ariannu’n caniatáu i CCIC ehangu ei rhaglen bresennol o fwrsariaethau a’i rhaglenni datblygu yn sylweddol dros y pedair blynedd nesaf, fydd o fudd i 240 o bobl ifanc bob blwyddyn erbyn 2024-25.

Yn ogystal â chynnig gostyngiadau ffïoedd o hyd at 100% ar gyfer cyrsiau preswyl yr haf, bydd yr aelodau mwyaf anghenus hefyd yn derbyn grant bwrsariaeth i helpu i dalu costau teithio a chostau eraill. Eleni, am y tro cyntaf, cyflwynodd CCIC ildiad ffïoedd awtomatig i bobl ifanc o gartrefi sy’n derbyn Credyd Cynhwysol, Prydau Ysgol am Ddim neu Grantiau Dysgu llawn gan Lywodraeth Cymru, yn ogystal ag i aelodau sy’n ofalwyr ifanc, ceiswyr lloches neu rai sydd â phrofiad o fod mewn gofal.

Meddai Gillian Mitchell, Prif Swyddog Gweithredol CCIC, wedi’r cyhoeddiad: “Rydym yn falch dros ben inni dderbyn yr ariannu hwn oddi wrth Ymddiriedolaeth Leverhulme. Bydd yn ein helpu i barhau i sicrhau bod pob person ifanc yn gallu cael mynediad i’n hyfforddiant perfformio lefel uchel, waeth beth fo’u cefndir ariannol.

Ein nod yw sicrhau bod cael mynediad i fwrsariaeth mor rhwydd â phosibl - heb unrhyw ffurflenni hir neu alw am lawer o dystiolaeth. Rydym am leihau’r stigma a sicrhau bod yr ariannu yma’n helpu’r rheini y bwriedir iddo eu helpu - y cerddorion, actorion a dawnswyr ifanc mwyaf talentog o bob cymuned ledled Cymru.”

Mae’r grant hwn yn golygu mai Ymddiriedolaeth Leverhulme yw Prif Gefnogwr Cronfa Bwrsariaethau CCIC. Mae Cronfa Bwrsariaethau CCIC yn cael ei chefnogi’n flynyddol hefyd gan Gronfa Bwrsariaeth Neil a Mary Ellen Webber, a Ffrindiau Cerddorfa Genedlaethol Ieuenctid Cymru. Rydym yn ddiolchgar hefyd i’r holl unigolion sy’n cyfrannu at ein cronfa bwrsariaethau trwy ddebyd uniongyrchol - gallwch ymuno â nhw trwy ymweld â https://www.ccic.org.uk/cefnogwch-ni.

Dim ond un elfen yw ehangu’r cynllun bwrsariaethau yn ymdrech barhaus CCIC i weithio tuag at sector celfyddydau mwy teg ar gyfer perfformwyr ifanc. Mae CCIC hefyd yn ehangu ein rhaglen o brosiectau datblygu, sydd wedi eu dylunio i ddarparu hyfforddiant wedi ei dargedu ar gyfer pobl ifanc o gymunedau heb gynrychiolaeth ddigonol, fel pobl ifanc ag anabledd, neu rai sydd o gymunedau sy’n dioddef hiliaeth.

Yn hwyrach yn 2021, bydd CCIC yn cyhoeddi argymhellion annibynnol cyfres o Dasgluoedd Amrywiaeth, sy’n cwmpasu cerddoriaeth, dawns a theatr, ynghyd â Chynllun Cydraddoldeb Strategol newydd diwygiedig. Bydd yr argymhellon a’r cynllun ill dau yn cynnwys targedau i gynyddu’r gyfran o gyfranogwyr ifanc sy’n disgrifio eu hunain fel B/byddar neu anabl, a’r gyfran o gyfranogwyr sy’n dod o gymunedau hilyddol.

Theatr Cenedlaethol Ieuenctid Cymru yn arddangos pedair ffilm fer newydd wrth i'r oedran bleidleisio ostwng i 16 mlwydd oed

Bydd aelodau o Theatr Cenedlaethol Ieuenctid Cymru (ThCIC) yn helpu lansio cyfres o ffilmiau o fonologau byr am ddemocratiaeth ieuenctid ar ddydd Iau, wrth i bobl ifanc 16 a 17 oed ledled y wlad baratoi at bleidleisio am y tro cyntaf yn etholiadau Senedd Cymru.

Yn #Maniffest1617, comisiynodd Theatr Cenedlaethol Ieuenctid Cymru fonologau newydd gan awduron blaenllaw o Gymru, sydd wedi cael eu ffilmio ar leoliad yng nghymuned pob aelod. Roedd y broses greadigol yn gydweithrediad rhwng yr aelodau ifanc a thîm o ysgrifenwyr, cyfarwyddwyr a gwneuthurwyr ffilm. Mae rhai o'r darnau yn gymeriadau ffuglennol ac eraill yn cael eu hadrodd yn y person cyntaf, ond mae'r holl ddarnau gorffenedig yn adlewyrchu meddyliau a theimladau'r aelodau ifanc am gynrychiolaeth ieuenctid a sut mae eu lleisiau'n cael eu clywed.

Dywedodd Megan, aelod o Theatr Cenedlaethol Ieuenctid Cymru: "Roedd e'n bwysig i mi fod y teimlad o falchder a'r hunaniaeth mae fy nghartref yn rhoi i mi yn cael ei fynegi'n glir. Mae'n bryd i ni frwydro dros hawliau i'r bobl a'r lle sy'n fy ngwneud i yn fi”

Bydd y pedair ffilm gyntaf y gyfres yn cael eu dangos am y tro cyntaf ar AM ar 6 Mai, 7pm a bydd posib gwylio'r cyfan ar-lein ar ôl ar https://amam.cymru/maniffest. Dyma'r comisiynau a'r perfformwyr newydd sy'n rhan o'r prosiect:

• Siân of Arc gan Mari Izzard - ysgrifenwyd ar gyfer Lauren, aelod ThCIC o Gaerdydd (wedi'i berfformio yn y Gymraeg a'r Saesneg) lle mae Lauren yn perfformio rhan lle mae’n lansio ei hymgyrch gwleidyddol yn 18 mlwydd oed ar gyfer bod yn Brif Weinidog Gymru.

• Manifest for Megan gan Catherine Dyson - ysgrifenwyd ar gyfer Megan, aelod ThCIC o Dreorci (perfformiwyd yn Saesneg) yn ymateb telynegol i berthynas Megan gyda'i chymuned a'i hamgylchedd

• The Future gan Matthew Bulgo - ysgrifenwyd ar gyfer Sam, aelod o ThCIC o Gastell-nedd (perfformiwyd yn Saesneg), perfformiad annwyl yn edrych yn ôl ar ei ddeffroad gwleidyddol;

• Fama gan Manon Steffan Ros - a ysgrifenwyd ar gyfer Dyddgu o Fethesda (perfformiwyd yn Gymraeg), dyma adlewyrchiad doniol a theimladwy ar bŵer cymuned.

Yn ogystal â chynhyrchu’r comisiynau newydd, mae Celfyddydau Cenedlaethol Ieuenctid Cymru wedi bod yn bartner allweddol yng Ngweithgor Ymgysylltu Etholiad y Gymdeithas Diwygio Etholiadol, gan helpu annog pobl ifanc i gofrestru i bleidleisio cyn y dyddiad cau ym mis Ebrill. Mae CCIC hefyd wedi cyd-weithio â'r Urdd a Senedd Cymru i helpu codi ymwybyddiaeth ymhlith holl aelodau ensemble CCIC, gan gynnwys cymryd rhan mewn ffug etholiadau ac ysgrifennu eu maniffesto eu hunain. Cefnogir y gwaith hwn gan Gronfa Democratiaeth y DU, menter Ymddiriedolaeth Diwygio Joseph Rowntree.

Dywedodd Gillian Mitchell, Prif Weithredwr Celfyddydau Ieuenctid Cenedlaethol Cymru: “Er bod rhai sialensiau’n codi wrth weithio yn ystod y pandemig, rydyn ni'n credu ei bod hi'n eithriadol o bwysig bod lleisiau ifanc yn cael eu clywed yn ystod yr etholiad hwn.

"Dim ond rhan o'r gwaith helaeth o helpu perfformwyr ifanc talentog ledled Cymru yw'r prosiect cyffrous hwn, gyda chomisiynau newydd yn y Gymraeg a'r Saesneg, rydyn ni'n datblygu ei lleisiau ac yn parhau â'u hyfforddiant artistig er gwaethaf yr aflonyddwch parhaus"

Y prosiect uchelgeisiol yma yw rhan gyntaf tymor Maniffest 2021 ThCIC, a lansiwyd heddiw. Bydd y rhaglen yma o waith yn cael ei ddangos trwy gydol y flwyddyn, ac yn dangos sut mae pobl ifanc yn gweld Cymru yn yr 21ain ganrif - gwlad sy'n fywiog, amrywiol a dwyieithog sydd â llais artistig cryf.

Ymhlith uchafbwyntiau eraill y tymor Maniffest hyd yma mae:

• Maniffest yn Theatr Clwyd: Cynhyrchiad theatrig ddigidol wedi'i ddangos ar-lein a'i ysgrifennu gan Hanna Jarman ac wedi'i gyd-gynhyrchu gan Theatr Clwyd

• Maniffest x Hijinx: Darn dyfeisiedig theatrig wedi'i greu yng Ngorllewin Cymru mewn partneriaeth â Hijinx, un o brif gwmnïau theatr gynhwysol Ewrop o artistiaid ag anableddau dysgu a / neu awtistig

• Maniffest / Mindset: Cydweithrediad digidol rhwng ThCIC a Theatr Solomonic Peacock,s theatre, Malawi, yn darganfod sut mae gwneuthurwyr theatr o wahanol wledydd yn dod at ei gilydd i greu theatr yn defnyddio ei ffonau symudol. Cyflwynir y gwaith hwn mewn partneriaeth â Chyngor Prydain Cymru.

• Cydweithrediad rhwng ThCIC a Theatr Ieuenctid yr Alban, wedi'i gyflwyno'n ddwyieithog yng Ngaeleg Albanaidd a Chymraeg.

Fel tymor, bydd Maniffest yn helpu rhoi llais i bob cymuned yn adlewyrchu amrywiaeth pobl ifanc yng Nghymru. Bydd hyn yn cynnwys cyflwyno theatr yn y Gymraeg a'r Saesneg. Wrth i Gymru ddechrau gwella o effeithiau COVID-19, mae'r prosiectau wedi'i chynllunio i fod yn ymarferol yn ddigidol ac wyneb yn wyneb, gan ddibynnu ar gyngor iechyd cyhoeddus fydd ar waith ar y pryd.

Enwau mawrion o’r byd dawns a theatr gerdd i helpu i ddathlu perfformio ledled Cymru

Mae Layton Williams, seren Everybody’s Talking About Jamie, a’r arloesol ZooNation - The Kate Prince Company ymysg yr enwau mawrion fydd yn cynnal gweithdai ar gyfer dawnswyr ifanc o Gymru, fel rhan o ddathliad rhithiol o ddawns a pherfformiad ym mis Mai.

Gwahoddir dawnswyr ifanc o bob cwr o Gymru i gymryd rhan yn y Diwrnod Dawns digidol hwn, fydd yn cynnwys diwrnod yn llawn dop o weithdai a dosbarthiadau meistr gaiff eu rhedeg gan rai o goreograffwyr a sefydliadau dawns penna’r wlad.

Trefnir y digwyddiad gan Gelfyddydau Cenedlaethol Ieuenctid Cymru, fydd yn dwyn ynghyd ddawnswyr Cymreig rhwng 11 a 19 oed i gymryd rhan mewn llu o weithdai bywiog, fydd yn cynnwys ystod eang o arddulliau dawns.

Caiff y gweithdai, a gynhelir ar Ddydd Sadwrn 15 Mai, eu harwain gan rai o goreograffwyr a sefydliadau dawns mwyaf adnabyddus y wlad, yn cynnwys Cwmni Dawns Cenedlaethol Cymru, Ballet Cymru, Company Chameleon a llawer mwy.

Bydd Layton, sy’n fwyaf adnabyddus am chwarae’r brif rôl yn y sioe gerdd anhygoel Everybody’s Talking About Jamie, yn arwain gweithdy awr o hyd yn canolbwyntio ar theatr gerdd.

"I cannot wait to slay with everyone (virtually) soon... Let’s dance!!” - Layton Williams

Yn y cyfamser, bydd yr anfarwol ZooNation - The Kate Prince Company, yn cynnal gweithdy theatr hip hop.

Yn ogystal â gweithdai, bydd y Diwrnod Dawns yn cynnwys dosbarthiadau meistr a thrafodaethau panel hefyd, gan roi cyfle i grwpiau dawns gorau’r wlad ddod at ei gilydd i ddathlu dawns trwy raglen fywiog o ryngweithio digidol. Daw’r digwyddiad i ben gyda nifer o ddosbarthiadau meistr digidol ar Ddydd Sul 16 Mai wedi eu hanelu at ddawnswyr dan hyfforddiant, graddedigion ac artistiaid dawns proffesiynol 18+ oed sy’n gweithio neu’n byw yng Nghymru.

Caiff digwyddiad y dydd Sadwrn ei ddilyn gan gyngerdd clo ar-lein U.Dance Cymru - dathliad cenedlaethol o berfformiadau gan bobl ifanc 11-19 mlwydd oed, a hyd at 25 oed i bobl ifanc ag anableddau. Cynhyrchir U.Dance Cymru 2021 gan Gelfyddydau Cenedlaethol Ieuenctid Cymru fel rhan o raglen genedlaethol U.Dance, a drosglwyddir mewn partneriaeth gyda One Dance UK.

Mae One Dance UK a U.Dance Cymru yn croesawu dawnswyr sy’n perfformio unrhyw arddull neu genre, ac yn annog grwpiau cynhwysol i ymgeisio i ddawnsio yn yr ŵyl.

Oherwydd y cyfyngiadau Covid-19 presennol, cynhelir digwyddiad eleni ar-lein yn ei gyfanrwydd.

Y dyddiad cau ar gyfer derbyn ceisiadau U.Dance 2021 ydi 5pm ar Ddydd Gwener 30 Ebrill, a bydd rhaid i grwpiau fod ar gael i gymryd rhan mewn gweithdai a digwyddiadau digidol ar Ddydd Sadwrn 15 Mai.

Meddai Jamie Jenkins, Cynhyrchydd gyda Dawns Genedlaethol Ieuenctid Cymru: “Mae’n bleser mawr iawn gennym gynnal dau ddigwyddiad mor wych - y Diwrnod Dawns ac U. Dance Cymru ar y cyd.

“Ar adeg pan rydym yn dal i orfod cadw ein pellter, mae’n wych y gallwn ni gyd ddod at ein gilydd yn rhithiol i ddathlu dawns ac arddangos y llu o arddulliau dawnsio rhagorol sydd gennym ledled Cymru.

“Mae’n fraint cael rhai o’r enwau mwyaf ym myd dawns i gymryd rhan yn y digwyddiad hwyliog a bywiog hwn.”

Cyhoeddi mentoriaid Cerdd y Dyfodol 2021

Yn dilyn prosiect peilot llwyddiannus yn 2019, mae prosiect datblygu cerddoriaeth gyfoes Celfyddydau Cenedlaethol Ieuenctid Cymru, Cerdd y Dyfodol, wedi cychwyn ar gyfer 2021.

Mae Cerdd y Dyfodol yn brofiad creadigol, cydweithredol ar gyfer artistiaid a cherddorion ifanc 16-18 oed, sy’n anelu i ddarganfod a datblygu’r genhedlaeth nesaf o egin-dalentau cerddorol yng Nghymru.

Trwy gyfres ddwys o ddosbarthiadau meistr a gweithdai digidol, bydd y bobl ifanc talentog a brwdfrydig hyn yn gweithio ochr-yn-ochr â grŵp o fentoriaid o’r diwydiant sy’n gweithio ledled Cymru, gan ddatblygu sgiliau creu cerddoriaeth ac ysgrifennu caneuon cyfoes, dysgu am lwybrau i mewn i’r diwydiant, tra’n creu gwaith newydd cyffrous.

Mae’n bleser gan Gelfyddydau Cenedlaethol Ieuenctid Cymru gyhoeddi’r mentoriaid ar gyfer Cerdd y Dyfodol 2021. Yn amrywio o ran genre o hip-hop a soul i gerddoriaeth werin, indie ac electronica, rydym yn falch i fod yn gweithio gyda charfan o bobl greadigol sy’n cynrychioli’r gorau o dirwedd miwsig cyfoes Cymru.

---

Heledd Watkins

Astudiodd Heledd fel crëwr theatr cyn symud ymlaen i weithio fel gitarydd bas sesiynol, gan deithio gydag Emmy the Great, Chloe Howl a’r Paper Aeroplanes. Dechreuodd ysgrifennu ei cherddoriaeth ei hun fel menyw flaen y band celf-roc HMS Morris, gydag uchafbwyntiau’n cynnwys perfformio yn Glastonbury, rhyddhau dwy record hir a chael eu henwebu am ddwy Wobr Gerddoriaeth Gymreig. Mae hefyd wedi rhoi tro ar gyflwyno ar radio a theledu.

---

Osian Huw Williams

Astudiodd Osian Gerddoriaeth ym Mhrifysgol Bangor ac aros yno i gwblhau ei radd Meistr mewn Cyfansoddi. Mae bellach yn chwarae i’r Candelas, Blodau Papur, Siddi a Chowbois Rhos Botwnnog, sy’n golygu ei fod yn gigio trwy’r flwyddyn fel arfer. Enillodd Osian Dlws y Cerddor yn Eisteddfod Genedlaethol Meifod yn ôl yn 2015 ac mae’n dal i ddatblygu’r sioe gerdd gyda’i frawd a’i chwaer. Mae’n ystyried ei hun yn ffodus iawn i fod wedi trefnu’r gerddoriaeth a chwarae tair gig gyda Cherddorfa’r Welsh Pops, oedd yn cynnwys y Candelas, Blodau Papur a Geraint Jarman.

Mae wedi cyfansoddi llu o drefniadau ac arwyddganeuon ar gyfer y teledu ac mae bellach yn rhedeg Stiwdio Sain, Llandwrog gyda dau beiriannydd arall ac mae wedi cynhyrchu artistiaid yn cynnwys Mared Williams, Y Cledrau a Rhys Gwynfor.

---

Tumi Williams (Skunkadelic)

Yn dilyn rhyddhau ei albwm cyntaf ‘Musically Drifting’ yn 2010, mae gan Skunkadelic nifer drawiadol o uchafbwyntiau yn cynnwys sioeau byw gyda Talib Kweli, Chali 2na, The Pharcyde, Jehst, Rag n Bone Man, Blackalicious, Ugly Duckling, Jungle Brothers, Ocean Wisdom…. Yn ogystal â chydweithio gydag artistiaid fel The Allergies, Mr Woodnote, Dr Syntax, TY, Sparkz, Truthos Mufasa, Twogood, Band Pres Llareggub ymhlith rhestr faith. Awydd i greu a rhannu yw’r ysgogiad sy’n dylanwadu ar bob cam y mae’n ei gymryd. Yn 2020 daeth ei gerddoriaeth i amlygrwydd mawr a chael ei chwarae’n aml gan Lauren Lauverne (BBC6 music), Adam Walton (BBC Radio Wales), Jo Wiley (BBC Radio 2), Tom Robinson (BBC6 music) ac arwyddgan 2021 ITV.

Ar wahân i’w waith unigol, mae Skunkadelic yn aelod parhaol sy’n arwain y cymundod monster funk 9 person, Afro Cluster, ac mae wedi ysgrifennu, recordio a theithio’n rheolaidd gyda’r grŵp dros y deng mlynedd diwethaf. Maent wedi ymddangos mewn nifer o wyliau a digwyddiadau proffil uchel yn cynnwys Glastonbury, Womad, Greenman, Boomtown a Gŵyl y Llais ac wedi teithio gydag artistiaid fel Ibibio Sound Machine, Craig Charles, Gilles Peterson a’r Hot 8 Brass Band.

---

Gwion ap Iago

Pan wnaeth DJ ddim troi lan i chwarae ei set, dyna pryd gychwynnodd taith cerddoriaeth electronig Gwion. Wedi mwynhau theatr gerdd yn yr ysgol a bod mewn cynhyrchiad gyda Youth Music Theatre UK yn Aberdeen yn 16 oed, mae cerddoriaeth wastad wedi bod yn elfen o fywyd Gwion ond dim ond ym Mhrifysgol Aberystwyth y blagurodd ei gariad o’r 'untz untz', y 'wobs' a’r 'boots and cats'. Ers y noson dyngedfennol honno, mae Gwion wedi chwarae ledled y DU mewn llu o brif ystafelloedd, nifer o wyliau, bariau tywyll ac ambell ffrwd fyw gyda’i grŵp electronig Roughion.

Mae Gwion hefyd yn rhedeg label electronig ar gyfer artistiaid yng Nghymru dan yr enw priodol Afanc, ar ôl yr anghenfil o’r Mabinogi, ei rôl yma yw cynrychioli egin-artistiaid a chynnig cyngor ar eu sain a’u helpu ar y ffordd, ac ar hyn o bryd mae’n gweithio gyda brenin y byd hip-hop Cymreig Mr Phormula ar ailgymysgu albwm ar gyfer Tiwns. Meddai - “Dwi’n gweithio ar lot o brosiectau cyffrous ar hyn o bryd ond rydw i’n fwyaf cyffrous am Fentora gyda CCIC. Alla’ i ddim aros i fwrw ati i ddysgu a datblygu gyda’r 'Bicep', 'Goldie' neu Charlotte de Witte nesaf."

---

Dionne Bennett

Mae Dionne Bennett yn lleisydd aml-genre, cyfansoddwr caneuon, artist lleisio, cynhyrchydd cerddoriaeth a pherfformwraig. Mae hefyd yn darlithio ar lefel gradd, gan arbenigo mewn perfformio lleisiol, a thechneg. Mae Dionne yn gyn-enwebai am Wobr Gerddoriaeth Gymreig ddechreuodd gigio’n rheolaidd yn 14 oed, rhyddhau ei record gyntaf yn 15 oed, ac sydd wedi parhau i weithio’n llwyddiannus yn y diwydiant fyth ers hynny.

Mae gwaith eang ac amrywiol Dionne yn cwmpasu nifer o arddulliau cerddorol. Mae hyn wedi ei galluogi i weithio gyda rhai o gerddorion mwyaf talentog ac uchel eu parch y diwydiant, o Dr John (a enillodd 5 gwobr Grammy), y pianydd Jazz hynod dalentog Jason Rebello, ac enillydd unawdol Her Blws Rhyngwladol y Blues Foundation Gee Weevil, i hoelion wyth y byd cerddorol Cymreig yn cynnwys Daf Ieuan a Gruff Rhys o’r Super Furry Animals, Mark Roberts o Catatonia a Lincoln Barrett (High Contrast) a enwebwyd am wobr Grammy.

Mae Dionne yn dal i ysgrifennu a rhyddhau deunydd newydd yma a thramor, ac mae ei chreadigedd a’i chynnyrch creadigol yn destament i bwysigrwydd sicrhau amrywiaeth yn y sîn gerddorol. Fel artist aml-genre, mae wedi cydweithio ar lu o recordiau hir, gan gyfuno gwahanol ddiwylliannau, arddulliau a thraddodiadau cerddorol gyda’i dylanwadau diwylliannol personol fel Cymraes ddu.

---

Kizzy Crawford

Mae Kizzy Crawford, y Gymraes Gymraeg 24 oed o dras Barbadaidd, wedi dod i fri trwy gyfuno jazz soul-gwerin dwyieithog. Mae Kizzy wedi derbyn sylw am ei gwaith a chael ei darlledu ar Radio Cymru, BBC 6MUSIC, BBC Radio 1, 2, 3 a 4, BBC Radio Wales a Jazz FM yn ogystal â derbyn cefnogaeth ar donnau’r awyr yn Ewrop ac UDA.

Mae Kizzy wedi chwarae mewn llu o gigs yn cynnwys sioeau yng Nghynulliad Cenedlaethol Cymru yn ystod WOMEX, London Jazz Festival, The Great Escape, UNESCO Berlin, Gŵyl y Gelli, Gŵyl Dinefwr, Cynhadledd Plaid Cymru, Blissfields, Wakestock, Celtic Connections, L’Orient, Gŵyl Fwyd Y Fenni (ble y perfformiodd ei sengl Golden Brown yn fyw ar BBC Radio 4) a’r Prince Edward Island Festival, Canada. Mae Kizzy hefyd wedi perfformio fel artist gwadd gyda Cherddorfa Genedlaethol Gymreig y BBC ac fel artist cefnogol i Gruff Rhys, Newton Faulkner, Benjamin Francis Leftwich, a pherfformiodd hefyd gyda Cerys Matthews yn Nhŷ’r Cyffredin, San Steffan ac yn fwy diweddar bu’n artist gwadd gydag Omar ar ei gân ‘Be Thankful’ yn ei sioe lwyddiannus yn Llundain.

---

Mae tîm Cynhyrchu Cerdd y Dyfodol 2021 yn cynnwys Elen Roberts (Cynhyrchydd) ac Eädyth (Cynhyrchydd Cynorthwyol).

Eädyth

Ar gyfer Cerdd y Dyfodol 2021, mae Celfyddydau Cenedlaethol Ieuenctid Cymru wedi partneru gyda’r dylunydd sain a’r cerddor electronig dwyieithog Eädyth, sy’n prysur dyfu’n enw adnabyddus i wrandawyr BBC Radio Cymru a BBC Wales. A hithau’n cynhyrchu ei brand unigryw ei hun o sain electro-soul mwyn, ei geiriau dwyieithog a’i sioeau byw trawiadol, mae wedi bod yn rhan o gynlluniau talent BBC Horizons a Forté Project, sy’n profi gymaint y mae’r diwydiant cerddoriaeth Cymreig yn credu yn ei thaith gerddorol. Fel Cynhyrchydd Cynorthwyol gyda Cherdd y Dyfodol, bydd Eadyth yn taro llygad feirniadol dros y prosiect ac yn cynnig syniadau strwythurol meddylgar yn seiliedig ar ei phrofiadau personol fel egin-artist ifanc Cymreig sy’n byw yng Nghymoedd y De.

---

Elen Roberts

Mae Elen yn guradur a chynhyrchydd amlddisgyblaethol sy’n gweithio yng Nghaerdydd sydd â 10 mlynedd o brofiad yn y diwydiant celfyddydol rhyngwladol. Mae wedi gweithio gyda cherddorion ar amrywiol gyfnodau o’u gyrfa, yn enwedig wrth eu helpu i fwyafu cyfleoedd arddangos rhyngwladol a datblygu marchnadoedd newydd ar gyfer eu gwaith. Mae wedi gweithio gydag artistiaid oedd yn arddangos yn SXSW, Indie Week Toronto, POP Montréal, WOMEX a’r Folk Alliance International, i enwi dim ond rhai. Mae Cerdd y Dyfodol yn gyfle cyffrous i weithio gyda phobl ifanc ar ddechrau eu taith greadigol i ddod yn gerddorion proffesiynol.

Cwmnïau Dawns Cenedlaethol Ieuenctid Cymru a’r Alban yn cwrdd yn rhithiol trwy ddosbarthiadau meistr ar-lein Y Cymundod Celtaidd

Bydd dros 20 o ddawnswyr ifanc o bob cwr o Gymru a’r Alban yn elwa o gyfres o ddosbarthiadau meistr ar-lein trwy gydol 2021 - gan gwrdd â’i gilydd trwy dechnoleg er gwaetha’r ffaith eu bod yn byw cannoedd o filltiroedd oddi wrth ei gilydd.

Gan fod hyfforddiant dawns wyneb-yn-wyneb wedi lleihau’n sylweddol o ganlyniad i’r pandemig COVID-19, bydd Dawns Genedlaethol Ieuenctid Cymru a National Youth Dance Company of Scotland yn ymuno â’i gilydd i ffurfio’r Cymundod Celtaidd, platfform dosbarthiadau meistr digidol newydd cyffrous fydd yn croesawu rhai o artistiaid dawns, coreograffwyr a chyfarwyddwyr artistig mwyaf talentog y DU. Dyma’r tro cyntaf i’r ddau gwmni dawns gydweithio fel hyn.

Bydd y dosbarthiadau meistr yn cael eu harwain gan artistiaid dawns a choreograffwyr nodedig yn cynnwys Liam Riddick, Ezra Owen a Chyfarwyddwraig Artistig NYDCS, Anna Kenrick. Bydd y dawnswyr ifanc, 16-22 oed, yn cael cyfle hefyd i ddysgu oddi wrth gwmnïau dawns yn cynnwys Ballet Cymru, Cwmni Dawns Cenedlaethol Cymru a Scottish Dance Theatre.

Dawns Genedlaethol Ieuenctid Cymru a National Youth Dance Company of Scotland yw’r prif gwmnïau dawns cyfoes ar gyfer pobl ifanc yn eu gwledydd. Bob blwyddyn, bydd dawnswyr ifanc talentog yn mynychu clyweliad am le, a chyfle i weithio gyda choreograffwyr arobryn.

Meddai Farrah Fawcett, aelod o National Youth Dance Company of Scotland:

“Dwi wrth fy modd ein bod yn cael y rhaglen ar-lein hon gyda Dawns Genedlaethol Ieuenctid Cymru, gan fod cysylltu gyda dawnswyr o’r un natur yr union beth yr ydym ei angen i’n hysbrydoli a chreu egni. Mae’n wych hefyd cael cyfle i weithio gyda choreograffwyr newydd - fe allwch ddysgu cymaint am eu proses ac mae’r math hwn o brofiad yn amhrisiadwy ar gyfer ein datblygiad fel dawnswyr.”

Dywedodd Jamie Jenkins, Cynhyrchydd Dawns Genedlaethol Ieuenctid Cymru:

“Rydym yn falch iawn i ddarparu lle i’r dawnswyr ifanc hyn gwrdd, cydweithio a rhannu sgiliau fel rhan o’r Cymundod, ac i ddarparu llwyfan ble gallant glywed oddi wrth rai o goreograffwyr a chwmnïau dawns mwyaf cyffrous y DU.”

Meddai Anna Kenrick, Cyfarwyddwraig Artistig YDance (Scottish Youth Dance):

“Mae YDance wrth ein bodd i gydweithio gyda Dawns Genedlaethol Ieuenctid Cymru ar y rhaglen arloesol a diddorol hon ar gyfer ein dawnswyr. Mae hwn yn gyfnod heriol iawn i bobl ifanc felly mae’n bwysig iawn inni greu cyfleoedd ble y gallant ddod at ein gilydd, rhannu a theimlo cysylltiad trwy brofiad dawns o safon uchel.”

Bydd y dosbarthiadau meistr yn cychwyn ar Ddydd Sul 31 Ionawr, ac yna parhau’n fisol. Byddant ar gael i aelodau DGIC a NYDCS yn unig, fydd yn derbyn eu manylion cofrestru’n unigol.

Cynhyrchir Dawns Genedlaethol Ieuenctid Cymru gan Gelfyddydau Cenedlaethol Ieuenctid Cymru, yr elusen genedlaethol ar gyfer cerddorion, dawnswyr ac actorion ifanc talentog ledled Cymru. Fe’i hariennir gan Gyngor Celfyddydau Cymru.

Cynhyrchir National Youth Dance Company of Scotland gan YDance (Scottish Youth Dance), y sefydliad dawns cenedlaethol ar gyfer plant a phobl ifanc yn Yr Alban. Fe’i ariennir gan Creative Scotland.

Llesiant, myfyrio ac yoga - adnoddau llesiant newydd gan Gelfyddydau Cenedlaethol Ieuenctid Cymru

Cymer eiliad i ddatgywasgu, distraenio ac i ofalu am dy les corfforol a meddyliol gyda chyfres o sesiynau yoga a myfyrio hyfforddiadol oddi wrthym yma yng Nghelfyddydau Cenedlaethol Ieuenctid Cymru.

Fel y gwyddom i gyd, fu cychwyn 2021 ddim yn rhwydd, ac mae’n bwysig inni gymryd rhywfaint o amser i ofalu am ein hunain. Rydym yn ffodus i gael yr hyfforddwraig yoga Jess Jones i’n harwain ar daith fyfyrio ac yoga, gan gynnig rhywbeth i bawb - waeth os wyt ti’n ddechreuwr neu’n hen gyfarwydd â mat yoga, mae sesiynau Jess wedi eu dylunio ar gyfer ystod eang o lefelau.

Edrych ar y rhestr gyflawn ar Youtube yma.

Sgwrs gydag Anthony Matsena

Wrth i Anthony Matsena ymuno â’n Bwrdd Ymddiriedolwyr, fe gafon ni sgwrs gyda’r coreograffydd a’r dawnsiwr am ei rôl newydd, am ei yrfa, ac am ddawnsio trwy’r pandemig presennol.

CCIC: Llongyfarchiadau ar gael eich penodi i Fwrdd Ymddiriedolwyr CCIC - rydym wrth ein bodd eich bod wedi ymuno â ni. Beth mae ymuno â’r sefydliad hwn yn ei olygu i chi a beth ydych chi’n gobeithio gallu ei gynnig / dylanwadu arno o ran eich gyrfa nodedig fel dawnsiwr proffesiynol?

AM: Mae’n golygu popeth i fod yn rhan o’r sefydliad y gallaf ddweud, â’n llaw ar fy nghalon, sydd wedi cael effaith positif dros ben ar fy ngyrfa ym myd dawns. Mae’n fraint aruthrol, cofiwch dim ond 4 blynedd yn ôl roeddwn i’n rhannu’r llwyfan gyda fy nghyd-aelodau o DGIC. Rwy’n gobeithio sicrhau newid positif i’r rhaglen ddawns gan sicrhau, fel mudiad, bod y gwaith yr ydym yn ei drosglwyddo yn cydweddu gyda’r gwaith sydd allan yna heddiw. Mae dawns gyfoes yn greadur sy’n newid yn barhaus, felly mae’n anodd gwneud yn siŵr bod pobl ifanc yn derbyn yr hyfforddiant cywir i sicrhau gyrfaoedd llwyddiannus maith ym myd Dawns. Rydw i am ei gwneud hi’n haws i ddawnswyr gyda gwahanol hyfforddiant i’r cefndir ballet a chyfoes arferol, ganfod eu ffordd i mewn i’r rhaglen. Rwy’n gwybod bod llu o ddoniau allan yna yng Nghymru sydd angen cyflawni eu llawn botensial. Yn olaf, rwy’n gyffrous i roi rhywbeth yn ôl i Gymru ac i fudiad sydd â lle arbennig yn fy nghalon.

CCIC: Sut wnaeth CCIC eich ysbrydoli wrth ichi ddilyn eich gyrfa?

AM: Fe wnaeth fy ysbrydoli i wthio y tu hwnt i fy ffiniau a chynnal lefel o ragoriaeth a balchder yn y gwaith yr ydym yn ei greu a’i gynhyrchu yma yng Nghymru. Mynd ar y cyrsiau preswyl hynny ble roeddwn i’n teimlo fel sbwnj, roedd dysgu oddi wrth yr holl dalent o bob cwr o Gymru yn brofiad heb ei ail. Fe wnaeth DGIC imi sylweddoli’r nodau a’r uchelgeisiau mwyaf oedd yn bosibl.  

CCIC: Pam ydych chi’n credu y dylai dawnswyr ifanc uchelgeisiol 16-22 oed o Gymru ymdrechu i gynrychioli Cymru fel aelodau o CCIC?

AM: Rwy’n credu bod dau beth i ddawnswyr ifanc sy’n anelu i gynrychioli Cymru; un yw balchder Cymru, ein gwlad, sydd â chymaint o harddwch a diwylliant fel bod agen inni floeddio amdano er mwyn i’r byd ddysgu gwlad mor arbennig ydi hon ac, yn ail, i ymdrechu am ragoriaeth yn eu gyrfaoedd, mae profiad a chysylltiadau’n ffurfio ein gyrfaoedd. Yma yn CCIC, fe gewch chi gyfle i greu cysylltiadau gydag arweinyddion o’r diwydiant ac ennill y lefel uchaf o brofiad gyda chyfoedion y byddwch yn gweithio gyda nhw am flynyddoedd i ddod.

CCIC: Pa gyngor pwysig fyddech chi’n ei roi i ddawnswyr ifanc awyddus (neu berfformwyr yn gyffredinol)?

AM: Un cyngor sy’ gen i sef agorwch eich hun i bob profiad. Allwch chi fyth ragweld yr hyn fyddwch chi’n ei hoffi a’r hyn fydd yn ddefnyddiol ar yr adeg yma o’ch gyrfa ac mewn bywyd yn gyffredinol, felly os welwch chi gyfle i dyfu a dysgu GAFAELWCH YNDDO waeth beth fydd unrhyw un arall yn ei ddweud.

CCIC: Mae cynyddu amrywiaeth yn y celfyddydau’n ddatblygiad allweddol y mae angen i bob un ohonom fynd i’r afael ag e. Mae CCIC yn gweithio’n galed i gyrraedd cynulleidfaoedd newydd a chynyddu ymwybyddiaeth am ein cynllun Bwrsariaethau sy’n atal cost rhag bod yn rhwystr i unrhyw berfformiwr ifanc talentog o Gymru sy’n cael cynnig lle. Sut ydych chi’n teimlo y gall sefydliad fel CCIC sicrhau a hybu amrywiaeth yn fwyaf effeithlon?

AM: Rydw i wedi ystyried hyn yn ddwys ac i mi mae’n gymharol syml. Byddai cyflogi pobl groenliw sy’n deall y cymunedau a’r diwylliannau y maent angen eu cyrraedd yn cael effaith aruthrol. Mae cynrychiolaeth yn bwysig, mae cael pobl sy’n edrych fel y bobl yr ydym yn ceisio cysylltu â nhw’n ei gwneud yn haws iddyn nhw deimlo bod croeso iddyn nhw a pheidio bod yn ofnus ynghylch ymgeisio os ydyn nhw’n teimlo eu bod yn perthyn yno.

CCIC: Beth yw uchafbwyntiau eich gyrfa? 

AM: Uchafbwyntiau fy ngyrfa yw perfformio ar Britain’s Got Talent yn 2010 fel A3 gyda fy mrodyr.
Perfformio gwaith Kerry Nicholls ‘aM’ ar gyfer DGIC 2015 ar brif lwyfan Sadler’s Wells.
Rhaglen gyfan gyntaf fi a fy mrodyr ‘Out Of Options’ yn The Bunker Theatre yn 2017.
Rhannu fy ngwaith ‘Vessels of Affliction’ ar brif lwyfan Sadler’s Wells y llynedd.
Perfformio yn ‘Tree’ gan Idris Elba a Kwame Kwei-Armah y llynedd yn MIF a theatr y Young Vic.
Cael fy mhenodi’n Artist Cysylltiol gyda CDCCymru a Messums Wiltshire eleni.
Ymuno â Bwrdd CCIC. 

CCIC: Beth ydych chi’n gweithio arno ar hyn o bryd?

AM: Rwy’n ffodus iawn i fod yn gweithio ar berfformiad a ffilm gyda fy nghwmni, yr ydw i’n gyd-berchen arno gyda fy mrawd, Matsena Performance Theatre, a gomisiynwyd gan Messums Wiltshire. Rwy’n dweud ffodus, oherwydd mae pob un ohonom yn gwybod pa mor ddinistriol y mae COVID-19 wedi bod ar ein gyrfaoedd fel perfformwyr a gwneuthurwyr. Mae golau ar ddiwedd y twnnel tywyll hwn. Dewch inni gyd ddal ati i greu ac i symud, fel ein bod yn barod pan ddaw’r amser inni rannu’r celfyddydau unwaith eto.

-

Darllen Mwy: Penodi Anthony Matsena, cyn-aelod dawns Celfyddydau Cenedlaethol Ieuenctid Cymru, i’r Bwrdd Ymddiriedolwyr

Celfyddydau Cenedlaethol Ieuenctid Cymru i greu rolau dan hyfforddiant newydd cyflogedig trwy gronfa Incubator Fund Youth Music

Bydd Celfyddydau Cenedlaethol Ieuenctid Cymru yn creu tair rôl cynhyrchwyr dan hyfforddiant newydd a chwe rôl Mentor y Dyfodol llawrydd dros y ddwy flynedd nesaf, diolch i ariannu a ddyfarnwyd trwy gronfa Incubator Fund Youth Music heddiw (4 Tachwedd 2020).

Bydd deiliaid y rolau’n derbyn o leiaf y Cyflog Byw Gwirioneddol, ac maent yn benodol ar gyfer pobl ifanc 18-25 oed o gymunedau a dangynrychiolir yn y gweithlu celfyddydau.

Mae’r rolau cyflogedig hyn wedi eu dylunio i helpu cerddorion a chynhyrchwyr cerddoriaeth ifanc o gymunedau a dangynrychiolir i ennill profiad gwaith gwerthfawr - gan ehangu’n sylweddol ar waith cyfredol CCIC wrth helpu i ddatblygu gweithlu mwy amrywiol yn y celfyddydau. Caiff recriwtio ei gyfyngu i’r bobl ifanc hynny allai wynebu rhwystrau i yrfa ym maes cerddoriaeth, megis pobl ifanc B/byddar ac anabl, pobl ifanc o gefndiroedd economaidd-gymdeithasol is, a phobl ifanc Du a chroenliw.

Bydd y cynhyrchwyr dan hyfforddiant yn gweithio gyda’n tîm i drosglwyddo ein gwaith, sy’n cefnogi pobl ifanc ledled Cymru. Bydd ein Mentoriaid y Dyfodol llawrydd yn helpu i ddylunio a throsglwyddo ein prosiect Cerdd y Dyfodol, fydd yn parhau yn 2021 i ddatblygu doniau pop a roc ifanc ym mhob cwr o Gymru.

Bydd pob rôl yn derbyn mentora allanol, profiadau gwaith wedi eu teilwra’n seiliedig ar eu diddordebau unigol, a chymorth datblygu gyrfa unigol. Penodir y rolau i gyd trwy recriwtio agored, gyda hysbysebion swyddi’n ymddangos yn y misoedd nesaf.

Cefnogir y prosiect hwn gan gronfa Incubator Fund Youth Music, diolch i ariannu oddi wrth chwaraewyr loteri y People’s Postcode Lottery. Mae’r Incubator Fund newydd hon sydd werth £2 miliwn - y disgwylir iddi redeg dros o leiaf y ddwy flynedd nesaf - wedi ei dylunio i helpu sefydliadau yn y diwydiant cerddoriaeth, yn enwedig meicro-fusnesau ac BBaCh, i harneisio sgiliau a chreadigedd doniau ifanc amrywiol. Mae’n cynnig grantiau o hyd at £30,000 i gyflogwyr arloesol yn y diwydiant cerddoriaeth i gefnogi gyrfaoedd pobl ifanc 18-25 oed. Mae’r cyllid, y gellir ei wario ar gyflogau a chymorth, yn cynnig ffordd goncrid i sefydliadau bychan, annibynnol yn y diwydiant cerddoriaeth ffynnu a chydweithio gyda’r genhedlaeth nesaf a’r sector ehangach.

Penodi Anthony Matsena, cyn-aelod dawns Celfyddydau Cenedlaethol Ieuenctid Cymru, i’r Bwrdd Ymddiriedolwyr

Mae Celfyddydau Cenedlaethol Ieuenctid Cymru (CCIC) wedi penodi’r coreograffydd a’r dawnsiwr Anthony Matsena i’r Bwrdd Ymddiriedolwyr, gan ddod â phersbectif newydd a llawn ysbrydoliaeth i reolaeth elusen gelfyddydau flaenaf Cymru ar yr adeg ddiffiniol hon.

Ac yntau’n dalent cyffrous ar ei gynnydd ym maes dawnsio cyfoes, mae Anthony yn gyn-aelod o Ddawns Genedlaethol Ieuenctid Cymru (DGIC) a bellach yn cael ei gydnabod yn broffesiynol am ei waith gyda Sadler’s Wells, Cwmni Dawns Cenedlaethol Cymru (CDCCymru) ac am berfformio’n ddiweddar yn Tree yn theatr y Young Vic, a grëwyd gan Idris Elba a Kwame Kewi-Armah.

Wedi ei eni yn Zimbabwe a’i fagu yn Abertawe ers yn 13 oed, datblygodd Anthony ei gariad at ddawnsio a’i sgiliau yn y maes trwy fynychu gwersi dawnsio hip-hop, Affricanaidd a Chyfoes. Daeth ei berfformiad proffesiynol cyntaf yn 2014 pan gafodd ei weld gan dîm artistig Matthew Bourne a’i ddewis i berfformio yn Lord of the Flies, New Adventures yng Nghanolfan Mileniwm Cymru. Yn fuan wedyn, ymunodd â Dawns Genedlaethol Ieuenctid Cymru ble y mwynhaodd un o uchafbwyntiau allweddol ei yrfa ifanc; perfformio gwaith Kerry Nicholls aM gyda DGIC 2015 ar brif lwyfan Sadler’s Wells. Flwyddyn yn ddiweddarach, fe’i derbyniwyd i’r London Contemporary Dance School, ble y datblygodd yn gyflym i fod yn goreograffydd cyffrous ac yn ‘un i gadw llygad arno’. Yn y flwyddyn y graddiodd o’i gwrs BA (Anrhydedd) mewn Dawns Gyfoes, dychwelodd Anthony i Sadler’s Wells ble y derbyniodd rôl arobryn Aelod Cyswllt Ifanc 2018-2020.

Dywedodd David M Jackson, Cadeirydd Bwrdd Ymddiriedolwyr, Celfyddydau Cenedlaethol Ieuenctid Cymru:

“Mae’n bleser croesawu’r dawnsiwr a’r coreograffydd ifanc gwych Anthony Matsena i Fwrdd CCIC. Ac yntau bellach yn gweithio ar lwyfan byd-eang, daw Anthony ag egni newydd, a phersbectif newydd, amrywiol i’n gwaith ar gyfer pobl ifanc dawnus a thalentog Cymru. Rwy’n mwynhau gweithio ag e’n barod, ac rwy’n edrych ymlaen at iddo fwynhau partneriaeth faith, gynhyrchiol ac ysbrydoledig gyda CCIC.”

Meddai Anthony Matsena:

“Mae’n golygu popeth i fod yn rhan o’r sefydliad y gallaf ddweud, â’m llaw ar fy nghalon, sydd wedi cael effaith positif dros ben ar fy ngyrfa ym myd dawns. Mae’n fraint aruthrol, o gofio mai dim ond 4 blynedd yn ôl yr oeddwn i’n rhannu’r llwyfan gyda fy nghyd-aelodau o DGIC.

“Rwy’n edrych ymlaen at beri newid positif i’r rhaglen ddawns er mwyn sicrhau bod y gwaith yr ydym yn ei drosglwyddo’n dal i daro tant gyda’r gwaith sydd allan yna heddiw. Mae dawns gyfoes yn greadur sy’n newid yn barhaus, felly mae’n anodd gwneud yn siŵr bod pobl iau yn derbyn yr hyfforddiant cywir i sicrhau gyrfaoedd llwyddiannus maith ym myd dawns. Rwyf hefyd am helpu gyda gwaith y mudiad i ehangu mynediad; i’w gwneud hi’n haws i ddawnswyr o gefndiroedd hyfforddiant gwahanol ganfod eu ffordd i mewn i’r rhaglen. Rwy’n gwybod bod llu o ddoniau allan yna yng Nghymru sydd angen cyflawni eu llawn botensial. Rwy’n gyffrous i roi rhywbeth yn ôl i Gymru ac i fudiad sydd â lle arbennig yn fy nghalon.”

Dywedodd Gillian Mitchell, Prif Weithredwraig CCIC:

“Mae Bwrdd CCIC yn chwarae rhan bwysig wrth helpu i lunio cyfeiriad strategol y sefydliad. Ers ei sefydlu yn 2017, mae Bwrdd newydd CCIC wedi arddangos arweinyddiaeth gref, gan helpu i lywio’r sefydliad yn ei flaen mewn modd fydd, yn y pen draw, yn cael effaith ystyrlon ar fywydau perfformwyr ifanc dawnus o Gymru, waeth beth fo’u cefndir. 

“Wrth i’r sefydliad barhau i dyfu a datblygu ymhellach ar bob lefel, rwyf wrth fy modd bod Anthony wedi cytuno i ymuno â’r Bwrdd Ymddiriedolwyr. Mae annog uchelgais ymysg pobl ifanc yng Nghymru ac adlewyrchu amrywiaeth y genedl yn elfen bwysig iawn o’n hagwedd artistig ac mae’n hanfodol bod hynny’n cael ei adlewyrchu ym mhob elfen o’r hyn y mae CCIC yn ei wneud. Yn ogystal â dod â’i brofiadau ei hun i’r Bwrdd, rydym yn gwybod y bydd Anthony yn ysbrydoliaeth i ddawnswyr ifanc o Gymru sy’n cychwyn ar eu siwrnai broffesiynol.”

Bydd Anthony yn ymuno â Bwrdd Ymddiriedolwyr CCIC gyda David Jackson (Cadeirydd), Bryan Hughes, Rhian Hutchings, Christine Lewis OBE, Mathew Milsom, Karen Pimbley a Mathew Talfan.

Celfyddydau Cenedlaethol Ieuenctid Cymru yn ehangu eu rhaglen ddigidol yn 2021

Yn dilyn haf llwyddiannus o Gyrsiau Digidol Cryno, gydag adborth cadarnhaol ysgubol oddi wrth yr aelodau, bydd Celfyddydau Cenedlaethol Ieuenctid Cymru yn ehangu eu gweithgarwch digidol ymhellach wrth i ymbellhau cymdeithasol bara i atal hyfforddiant wyneb-yn-wyneb.

Yn hytrach na’n cyrsiau preswyl a’n cyngherddau wyneb-yn-wyneb arferol yr haf hwn, fe gynigom weithdai dros Zoom i’n agos i 400 o aelodau ifanc talentog o Gymru sy’n ffurfio ein hensembles cenedlaethol.  Roedd y rhain yn aelodau oedd wedi llwyddo i ennill lle yn ein hensembles trwy glyweliad, ond oedd wedi colli cyfle i ymuno gyda’n cyrsiau preswyl oherwydd Covid-19.

Rhwng Gorffennaf a Medi, cynhyrchodd CCIC 121 o sesiynau digidol ar gyfer ein haelodau cerdd, theatr a dawns - gyda chyfanswm o 1732 o bobl yn mynychu. Fe wnaeth 100% o’r aelodau a holwyd fwynhau’r gweithdai digidol, ac roedd 99% am inni gynhyrchu rhagor.

“Roedd y cwrs digidol yn syniad perffaith yn lle cwrs preswyl CCIC. Wrth gwrs, allen ni ddim bod gyda’n gilydd mewn person, ond roedd y gweithdai a’r sgyrsiau lles yn ffordd wych i gysylltu gyda phobl allwch chi ddim eu gweld yn ystod y flwyddyn.” (Aelod CCIC)

“Roedd hi’n ddiddorol iawn cael siarad gyda phobl wych o’r diwydiant. Fe ddysgais i lawer o sgiliau newydd fydd yn werthfawr dros ben pan af fi ymlaen, gobeithio, i weithio yn y celfyddydau.” (Aelod o ThCIC)

Mae uchafbwyntiau’r haf yn cynnwys:

• Cyfarfu aelodau Theatr Cenedlaethol Ieuenctid Cymru gyda’r cyn-aelodau adnabyddus Rakie Ayola (Harry Potter and the Cursed Child, On Bear Ridge), gymerodd ran mewn sesiwn holi ac ateb a chipolwg proffesiynol ar y diwydiant gydag aelodau, ac yn yr un modd Richard Elis (Eastenders, Tourist Trap, Y Gwyll / Hinterland) wnaeth arwain y noson gabaret hefyd. Ymunodd Tamara Harvey, Cyfarwyddwraig Artistig Theatr Clwyd, gyda’r aelodau ar-lein ar gyfer sesiwn cyngor hyfforddiant a thechneg ac fe wnaethant elwa hefyd o weithdai creu theatr a pherfformio gyda’r gyfarwyddwraig Hannah Noone, un o gyn-aelodau a wobrwywyd ThCIC Heledd Gwynn a Gwennan Mair, Cyfarwyddwraig Ymgysylltiad Creadigol Theatr Clwyd.  

• Bu cyfle i’r tri ensemble cerddoriaeth ofyn cwestiynau a dysgu oddi wrth eu tri chyfarwyddwr cerdd - Carlo Rizzi (arweinydd CGIC, ac Arweinydd Llawryfog Opera Cenedlaethol Cymru), Tim Rhys-Evans (arweinydd CCIC, Sylfaenydd Only Men Aloud ac elusen Aloud Charity, a Chyfarwyddwr Cerdd CBCDC) a Philip Harper (arweinydd BPCIC, a Chyfarwyddwr Cerdd Band Cory)

• Derbyniodd aelodau Dawns Genedlaethol Ieuenctid Cymru sesiynau Yoga Digidol rheolaidd trwy gydol yr haf, a chyfle i ymuno hefyd mewn dosbarth meistr ar-lein gyda’r coreograffydd a’r artist dawns James Cousins.

• Am y tro cyntaf, bu modd inni gynnig sesiynau ar Dechneg Alexander, Soffroleg a Hyfforddi ar gyfer Perfformwyr i aelodau Côr Cenedlaethol Ieuenctid Cymru, Cerddorfa Genedlaethol Ieuenctid Cymru a Band Pres Cenedlaethol Ieuenctid Cymru. Cafodd aelodau’r côr a’r band sesiynau cynhesu dyddiol gyda’i gilydd, a chafodd bawb ymarferion adrannol gyda thiwtoriaid offerynnol a chorawl blaenllaw - cyfle i ymarfer a chanu gyda’i gilydd yn ystod y cyfnod clo.

Yn bwysig iawn ar y cyfnod hwn, darparodd y sesiynau hyn hefyd waith i 55 o berfformwyr llawrydd, ar adeg pan oedd gan artistiaid hunangyflogedig o Gymru ddim neu fawr ddim gwaith oherwydd y pandemig.

Tra na allai’r sesiynau digidol hyn fyth lanw’r bwlch a adawyd gan gyrsiau preswyl yr haf, fe ddaeth y gweithdai â’n haelodau ynghyd ar adeg digon trawmatig i bobl ifanc, a helpu i’w cadw i berfformio a mwynhau’r celfyddydau yn ystod cyfnod pan oedd bron pob gweithgarwch arall i bobl ifanc ar stop.

Ein Cylluniau i’r Dyfodol

Mae’r adborth oddi wrth ein haelodau wedi bod yn bositif tu hwnt, felly byddwn yn ehangu’r gwaith yma trwy’r hydref ac ymlaen i 2021:

• Rhwng nawr a haf 2021, byddwn yn cynnig dosbarthiadau meistr digidol misol yn rheolaidd ar draws ystod eang o gelfyddydau a meysydd o ddiddordeb i ensembles ar gyfer ein haelodau cyfredol ac aelodau newydd.

• Byddwn yn lansio gweithdai ar-lein am ddim yn benodol ar gyfer pobl ifanc 16-18 oed o gymunedau heb gynrychiolaeth ddigonol, yn enwedig y rheini sydd wedi eu heffeithio fwyaf gan effaith economaidd Covid-19

• Ym mis Tachwedd byddwn yn lansio clwb darllen dramâu ar-lein Theatr Cenedlaethol Ieuenctid Cymru. Bydd y sesiynau cyntaf yn rhan o Signal Fires: rhaglen ar draws y DU dan arweiniad cwmnïau theatr teithiol blaenaf y DU.   

• Bydd ein holl gynlluniau ar gyfer 2021 yn cynnwys dysgu cyfunol, gan integreiddio gweithdai digidol gyda sesiynau wyneb-yn-wyneb gan sicrhau ymbellhau cymdeithasol. Os digwydd i ymbellhau cymdeithasol atal ein cyrsiau preswyl, bydd ein cynlluniau wrth gefn yn caniatáu inni gynnal cyrsiau digidol llawn, gan leihau’r tarfu fydd ar uwch-hyfforddiant perfformio’r bobl ifanc.

Cynllun Mentora BBC NOW

Rydyn ni’n gyffrous i gyhoeddi ein cynllun mentora newydd BBCNOW ar gyfer aelodau Cerddorfa Genedlaethol Ieuenctid Cymru.

Mae’r berthynas hirsefydlog rhwng dwy gerddorfa genedlaethol Cymru wastad wedi arwain at brosiectau cydweithredol gwych; o gyngherddau teuluol Calan Gaeaf, y perfformiad bythgofiadwy o Offeren Bernstein ym Mhroms y BBC a chyngerdd Dydd Gŵyl Ddewi eleni gyda’r grŵp gwerin adnabyddus, Calan. Uchafbwyntiau’r prosiectau hyn bob tro yw’r cyfle i aelodau Cerddorfa Genedlaethol Ieuenctid Cymru elwa o wybodaeth a phrofiad eu partneriaid proffesiynol, wrth iddynt eistedd ochr-yn-ochr mewn ymarferion a pherfformiadau.

Celfyddydau Cenedlaethol Ieuenctid Cymru yn creu llwybrau gyrfa newydd cynhwysol i mewn i reoli’r celfyddydau

Fel sefydliad newydd sydd wedi ymrwymo i ddatblygu perfformwyr ifanc talentog ym meysydd cerddoriaeth, y theatr a dawns o bob cwr o Gymru, mae Celfyddydau Cenedlaethol Ieuenctid Cymru (CCIC) hefyd wedi creu cyfleoedd hygyrch i’r rheini sydd am ddilyn gyrfa ym maes rheoli’r celfyddydau, gan sicrhau bod y gweithlu’n adlewyrchiad cywir o’n haelodau a’n rhanddeiliaid.

Mae’n bleser gan CCIC groesawu dwy aelod newydd o staff, sef Rhiannon Llewellyn fel Cynhyrchydd dan Hyfforddiant a Chloe Baker fel Gweinyddwraig Celfyddydau dan Hyfforddiant. Ffurfiwyd y ddwy rôl yn y fath fodd fel y byddent yn caniatáu i CCIC chwarae ei ran wrth annog ceisiadau oddi wrth bobl ifanc o gefndiroedd cymdeithasol amrywiol, allai fod â diddordeb archwilio gyrfa yn y diwydiannau creadigol.

Eglurodd Gillian Mitchell, prif weithredwraig CCIC, “Fe edrychom ar rwystrau posibl i ymgeiswyr, gan ofyn am gyngor oddi wrth bobl ifanc yng Nghymru a rhanddeiliaid eraill a newid ein hagwedd tuag at recriwtio o ganlyniad uniongyrchol i’r sgyrsiau hynny. Fe sylweddolom mai potensial, nid profiad oedd yr hyn yr oeddem ei angen a’i eisiau. Rhoddwyd rhywfaint o griteria yn eu lle; roedd rhaid i ymgeiswyr fod o dan 25 ac wedi graddio’n ddiweddar o brifysgol yng Nghymru. Yn ogystal, roedd rhaid i ymgeiswyr fod wedi derbyn grant cynhaliaeth llawn trwy gydol eu cyfnod astudio. Wedi ein hysbrydoli gan waith Bwrsariaethau Creadigol Weston Jerwood, fe ofynnom i ymgeiswyr ddweud wrthym am yr hyn oedd yn eu hysbrydoli nhw a gwnaethpwyd y broses gyfweld mor anffurfiol ac syml â phosibl.”   

“Fe dderbyniom lawer iawn o ddiddordeb yn y rolau a chwrdd â nifer o bobl anhygoel ar y ffordd ond, yn y pen draw, roedd Rhiannon a Chloe yn teimlo fel eu bod yn gweddu’n dda. Maent wedi gwneud argraff fawr ar CCIC mewn cyfnod byr ac rydym i gyd yn mwynhau dysgu oddi wrth ein gilydd.”

Chloe Baker a Rhiannon Llewellyn

Graddiodd Rhiannon Llewelyn, 23, mewn Celfyddydau Perfformio o Brifysgol De Cymru. ‘Tra roeddwn i yn yr ysgol roeddwn i ym mhob sioe a chyngerdd dan haul ac oni bai am gefnogaeth fy athro Drama dydw i ddim yn siŵr y byddwn wedi mynd i’r Brifysgol; ond dwi mor falch imi fynd! Cefais ddysgu am fyd tu ôl i’r llenni y diwydiant creadigol a sylweddoli beth oedd fy ngalwedigaeth. Mae gwybod sut y gwnaeth y celfyddydau newid fy mywyd i a sut y gall newid bywydau pobl eraill, yn golygu fy mod i’n ddiolchgar iawn i fod yn gweithio gyda CCIC ac yn gwneud gwahanaieth ym mywydau pobl ifanc. Mae CCIC wedi rhoi’r sgiliau imi rannu fy mrwdfrydedd gyda phobl eraill a siapio’r dyfodol ar gyfer pobl ifanc Cymru.’

Mae Chloe Baker, 23, newydd raddio mewn cerddoriaeth o Goleg Brenhinol Cerdd a Drama Cymru, ble tyfodd ei ddiddordeb mewn rheoli cerddorfaol a’r celfyddydau ochr-yn-ochr â pherfformio ar y feiolin. “Fe dyfais i fyny gyda gwasanaeth cerdd ac adran chweched dosbarth anhygoel wnaeth fy arwain i fynd i’r coleg cerdd. Roedd yn bleser cael arwain Cerddorfa Symffoni CBCDC ar daith o amgylch Cymru a pherfformio i dros 3000 o ddisgyblion ysgol. Fyth ers y daith honno, rwyf wrth fy modd yn gweld pobl ifainc yn mwynhau’r celfyddydau, a dyna pam yr ydw innau’n mwynhau fy amser gyda CCIC! Rydw i wedi bod yn rhan o’r broses paratoi clyweliadau a gweithdai ar gyfer yr ensembles ac er mai cerddoriaeth yw fy nghefndir i, rydw i wedi gweithio gyda’r ensemble dawns a theatr hefyd. Rydw i wir wedi mwynhau gweithio gyda’r tîm ac yn methu aros tan y cyrsiau preswyl a’r perfformiadau yn 2020!”

Mae CCIC wedi ymrwymo i barhau i gynnig y cyfleoedd hyn i eraill ac rydym yn archwilio ffyrdd i’w hymestyn i bobl ifanc fydd yn gadael ysgol yn y dyfodol. 

"Agos iawn at fy nghalon" Michael Sheen sy'n disgrifio ei gyfnod yn Theatr Genedlaethol Ieuenctid Cymru fel hwb enfawr i'w yrfa

Cyn cwrs preswyl 2019 Theatr Genedlaethol Ieuenctid Cymru, mewn partneriaeth â Theatr Clwyd, cafodd aelodau'r ensemble neges o anogaeth arbennig iawn gan gyn-aelod o'r Theatr, sef yr amryddawn Michael Sheen.

Yn ddiweddar, roedd y Cymro a'r actor yng Nghaerdydd gan ei fod yn un o brif noddwyr Cwpan y Byd Digartref, a thra roedd yma, dymunodd bob lwc i'r aelodau newydd ar eu taith.

Wrth fyfyrio ar ei gyfnod fel cyn-aelod, cyflwynodd seren cyfres Good Omens ei hun fel

"Michael Sheen, cyn-aelod o Theatr Genedlaethol Ieuenctid Cymru". Dywedodd fod y cyfnod gyda'r Ensemble yn "agos iawn at fy nghalon", ac esboniodd mai "dyna oedd y tro cyntaf i fi ddod i Gaerdydd" o'i dref enedigol ym Mhort Talbot. 

"Roedd cyfarfod yr holl bobl yma o bob cwr o Gymru... yn agoriad llygad i bob math o bethau.  Fe ges i'r profiad mwyaf anhygoel yn gweithio gyda grŵp o bobl; pobl fel fi oedd yn angerddol am yr hyn roedden ni'n ei wneud. Roedd yn hwb enfawr i fi wneud yr hyn es i ymlaen i'w wneud wedyn. Felly cyfnod sy'n agos iawn at fy nghalon"