Jazz Cenedlaethol

Ieuenctid Cymru

Grymuso'r genhedlaeth jazz nesaf yng Nghymru

Mae Jazz Cenedlaethol Ieuenctid Cymru yn bartneriaeth uchelgeisiol newydd rhwng Jazz Explorers Cymru, Celfyddydau Cenedlaethol Ieuenctid Cymru a Choleg Brenhinol Cerdd & Drama Cymru, wedi'u gefnogi gan Gyngor Celfyddydau Cymru a Gwasanaeth Cerdd Cenedlaethol Cymru. Gyda'n gilydd, ein nôd yw adeiladu a datblygu rhaglen i feithrin, ysbrydoli a chefnogi talent cerddorion jazz ifanc ledled Cymru

Ar 14-16 Ebrill 2025, croesawyd dros 50 o gerddorion jazz ifanc uchelgeisiol o bob cwr o Gymru i Goleg Brenhinol Cerdd a Drama Cymru ar gyfer cwrs 3 diwrnod o weithdai, dosbarthiadau meistr ac ymarferion. Buont yn gweithio gydag addysgwyr jazz o fri rhyngwladol, gan arwain at berfformiad cyhoeddus anffurfiol. Roedd yn llawen, yn heriol ac yn gydweithredol.

Roedd y cwrs peilot ar agor i bob offerynnwr a chanwr rhwng 14 a 22 oed. Nid oedd angen profiad jazz blaenorol i wneud cais, ond awgrymom y dylai pawb fod o leiaf yn safon Gradd 5 (neu gyfwerth) ar eu hofferyn. Rhannwyd y cyfranogwyr yn wahanol grwpiau yn seiliedig ar eu hoedran a'u profiad i sicrhau bod pawb yn derbyn y lefel gywir o gefnogaeth.

Y tiwtoriaid arweiniol oedd Paula Gardiner, Huw Warren ac Andrew Bain (Pennaeth Jazz yn CBCDC) – gyda chefnogaeth ychwanegol gan diwtoriaid arbenigol eraill a myfyrwyr jazz. Sgroliwch i lawr am ragor o wybodaeth.

Camau Nesaf

Ar hyn o bryd rydym yn adolygu adborth gan y cyfranogwyr, gan weithio gyda'r partneriaid, tiwtoriaid, Gwasanaethau Cerdd a Chyngor Celfyddydau Cymru i ddatblygu strategaeth tymor hwy ar gyfer datblygu jazz ieuenctid yng Nghymru. Bydd rhagor o fanylion ar gael yma yn fuan.

Cwrdd â'n Tiwtoriaid Jazz

Daw ein tiwtoriaid o'r addysgwyr a'r perfformwyr jazz mwyaf profiadol yng Nghymru, gan gynnwys y Penaethiaid Jazz presennol a blaenorol yng Ngholeg Brenhinol Cerdd a Drama Cymru. Bydd manylion mwy o diwtoriaid yn cael eu hychwanegu isod, pan fyddant ar gael.


  • Mae Andrew Bain, cerddor, addysgwr ac ymchwilydd, yn un o’r perfformwyr ac addysgwyr mwyaf blaenllaw yn Ewrop ac mae wedi perfformio gydag enwogion fel Wynton Marsalis, Natalie Cole, Kenny Wheeler, Randy Brecker, John Taylor, Band Mawr NDR, Dave Liebman a Bob Mintzer, a hefyd wedi treulio cyfnod preswyl yn Efrog Newydd.


  • Roedd Paula yn Bennaeth Jazz yng Ngholeg Brenhinol Cerdd a Drama Cymru nes ymddeol yn 2023 i ailgydio yn ei gyrfa llawrydd.

    Yn ystod y 1990au a'r 2000au, sefydlodd Paula sawl band gan gynnwys Pedwarawd Paula Gardiner, 6, Triawd Paula Gardiner, Paula Gardiner 6.0 a'r band mawr anarchaidd a oedd yn Gyfansoddwyr Jazz Cymru. Mae hi wedi gweithio'n rhyngwladol, gan fynd â'i cherddoriaeth ei hun i'r Unol Daleithiau a chyfansoddi/cynnal prosiect mawr yng Nghymru a De Affrica ar gyfer yr Olympiad diwylliannol, 2012.


  • Pianydd a chyfansoddwr o Gymru yw Huw Warren, ac mae ganddo enw da yn rhyngwladol am greu cerddoriaeth arloesol ac eclectig. Mae ei chwarae a’i gyfansoddiadau wedi ymddangos ar rai o brif lwyfannau’r byd yn ogystal â chael eu darlledu’n aml. Mae Huw wedi ymddangos ar fwy na 50 o recordiadau, gan gynnwys cyfres o albymau hynod unigol o dan ei enw ei hun. Yn ganolog i’w ddull o addysgu jazz y mae’r diffiniad ehangaf posibl o’r genre, a ffocws ar ddatblygu’r llais unigol wrth fyrfyfyrio a chyfansoddi.