Mae Celfyddydau Cenedlaethol Ieuenctid Cymru yn ehangu prosiectau datblygu talent greadigol, gyda chyllid drwy Cymru Greadigol

Mae CCIC wedi derbyn cyllid – dros £45,000 – gan Lywodraeth Cymru drwy Cymru Greadigol i helpu i ddatblygu talent greadigol Cymru yn y sectorau ffilm, teledu, cerddoriaeth fasnachol a digidol.

Wedi’i lansio yn ystod mis Medi llynedd, crëwyd Cronfa’r Sector Sgiliau Creadigol gyda’r bwriad o gefnogi prosiectau a all gyflawni yn erbyn un neu fwy o’r deg blaenoriaeth a nodwyd yn y Cynllun Gweithredu Sgiliau Creadigol o fewn tair blynedd a arweinir gan y diwydiant.

Mae’r Cynllun Gweithredu yn ceisio mynd i’r afael ag anghenion sgiliau’r tri sector â blaenoriaeth: cerddoriaeth, cynnwys digidol, a sgrin yn y tymor byr, yn ogystal ag ystyried yr anghenion hirdymor a fydd yn sicrhau bod Cymru’n parhau i fod â sector creadigol ffyniannus.

Yn gynharach y mis hwn, cyhoeddodd Dawn Bowden AS, Dirprwy Weinidog dros y Celfyddydau a Chwaraeon, fod dros £1.5m i’w rannu rhwng 17 o brosiectau ar draws y diwydiannau creadigol, meddai:

“Diben y gronfa hon yw parhau i gefnogi partneriaethau sgiliau strategol ledled Cymru, ac rwyf wrth fy modd ein bod wedi gallu dyfarnu'r cyllid i brosiectau cydweithredol a fydd yn darparu cyfleodd gwych ar gyfer y rhai sy'n gweithio yn y sector neu sydd am weithio yn y sector o bob cefndir.” Darllennwch y datganiad ysgrifenedig lawn yma.

Fel derbynwyr y gronfa, bydd CCIC yn defnyddio hwn i ehangu dau o’i brosiectau ar gyfer pobl ifanc – Llwybrau Proffesiynol a Cerdd Y Dyfodol.

Llwybrau Proffesiynol

Mae ein rhaglen Llwybrau Proffesiynol yn gynllun datblygu gyrfa ar gyfer perfformwyr drama ifanc dawnus, a ddarperir mewn partneriaeth â Theatr Clwyd a Chanolfan Mileniwm Cymru. Yng ngwanwyn 2023, bydd 45 o bobl ifanc 16-22 oed yn cymryd rhan mewn rhaglen hyfforddi breswyl ddwys, gan roi cipolwg uniongyrchol iddynt ar yr ystod o sgiliau trosglwyddadwy yn y sectorau theatr, sgrin a digidol.

Mae pob penwythnos preswyl neu ddiwrnod hyfforddi yn canolbwyntio ar sgiliau penodol gan gynnwys techneg perfformio, dylunio set, gwisgoedd, a goleuo, ysgrifennu sgriptiau, hygyrchedd o fewn perfformiad a marchnata a rhaglennu drama. Darllenwch mwy am y prosiect yma.

Gan ddefnyddio’r cyllid gan Cymru Greadigol, bydd ein rhaglen Llwybrau Proffesiynol yn cynnig mynediad ehangach i weithdai ffilm a theledu a sut mae’r arferion hyn yn berthnasol i’r sector digidol, gweithredu ar gyfer sgrin werdd, hyfforddiant llais ar gyfer sgrin, podlediadau a gwaith trosleisio, a llawer mwy hefyd.

Cerdd y Dyfodol

Mewn mannau eraill, bydd y cyllid yn helpu i barhau â Cerdd Y Dyfodol, ein prosiect cerddoriaeth gyfoes sy’n cefnogi cerddorion ifanc 16-18 oed i wneud eu marc ar y sin gerddoriaeth Gymraeg gyfredol ar draws ystod eang o genres – o Grime i Indie, Electronica i RnB.

Wedi’i ddatblygu gyntaf yn 2019, mae’r prosiect yn cefnogi gwneuthurwyr cerddoriaeth sydd â’r potensial i ddatblygu a thyfu fel artistiaid, gan ddatblygu eu sgiliau ysgrifennu caneuon, hunanreolaeth, a sgiliau cerddor mewn amgylchedd diogel a chefnogol. Mae’n cynnig profiad diwydiant dilys, a chipolwg ar yrfa cerddor sy’n gweithio, gan fynd â chyfranogwyr drwy gylch bywyd llawn cyfansoddi caneuon – gan gynnwys cyfansoddi a recordio, perfformio, teithio a hyrwyddo.

Fel rhan o’n hymrwymiad parhaus i feithrin talent amrywiol, bydd o leiaf 25% o’r cyfranogwyr yn dod o gefndir mwyafrif byd-eang, o leiaf 15% o’r 70 o fuddiolwyr yn byw ag anabledd, gan helpu i feithrin diwydiant cerddoriaeth Gymraeg fwy amrywiol a chynhwysol.

Ochr yn ochr â hyn byddwn yn cyflogi Cynhyrchydd dan Hyfforddiant newydd sy’n benodol i’r prosiect Cerdd Y Dyfodol, gyda recriwtio’n dechrau ym mis Mawrth 2023, ac yn gweithio gyda Mentoriaid y Dyfodol eto i helpu i hwyluso’r rhaglen, a chynnig y mynediad a’r wybodaeth orau bosibl i gyfranogwyr i’r sector cerddoriaeth gyfoes yng Nghymru. Mae mentoriaid blaenorol wedi cynnwys Kizzy Crawford, Heledd Watkins (HMS Morris) a Tumi Williams (Afrocluster, Skunkadelic).

Edrychwn ymlaen at ddatblygu ein prosiectau ymhellach dros y misoedd nesaf ac i mewn i gyfnod preswyl yr haf.

Mae Prosiect Datblygu Corawl CCIC, Sgiliau Côr, Yn Ail-lansio Ar Gyfer 2023

Mae gweithgareddau ar gyfer Sgiliau Côr, ein rhaglen datblygu gorawl, wedi dechrau gyda phedwar gweithdy ym mis Ionawr wedi eu cynnal i baratoi ar gyfer preswyliad mis Chwefror.

Wedi’i ddatblygu fel llwybr i wella hyder a gallu cantorion ifanc mewn canu corawl, a dwy flynedd ar ôl y cynllun peilot a ddatblygwyd gydag arweinydd Côr Cenedlaethol Ieuenctid Cymru Tim Rhys-Evans, lansiwyd y prosiect gyda gweithdai yn Haf 2022.

Gan recriwtio cantorion ifanc brwdfrydig trwy gyfuniad o broses galwad agored ochr yn ochr ag ymgyrchoedd wedi’u targedu gydag ysgolion, corau ieuenctid, a gwasanaethau cerdd, bydd Sgiliau Côr yn ymgysylltu â phobl ifanc o ystod amrywiol o gefndiroedd ac mae wedi’i gynllunio i gefnogi’r rhai sydd heb gynrychiolaeth ddigonol yn y celfyddydau ar hyn o bryd – yn enwedig pobl ifanc mwyafrif byd-eang a phobl ifanc o deuluoedd incwm isel.

Mae aelodau presennol CCIC a allai elwa o ddatblygiad ychwanegol hefyd wedi cael eu gwahodd i gymryd rhan yn y preswyliad.

Gyda dros 80 o fyfyrwyr yn cymryd rhan mewn pedwar gweithdy a gynhaliwyd yng Nghaerdydd ac Abertawe dan arweiniad ein tîm o hwyluswyr uchel eu parch – sy’n cynnwys Iori Haugen, un o sylfaenwyr Choirs for Good ac Anna Beresford, arweinydd ac aelod o dîm WNO – bu pob myfyriwr yn gweithio ar “This Is Me” gan The Greatest Showman. Gan ganu mewn harmoni tair rhan, buont yn canolbwyntio ar amrywiaeth o dechnegau lleisiol, eu dawn gerddorol gyffredinol, wedi'i mireinio trwy amrywiaeth o ymarferion a gemau.

Dywedodd Naomi Davies, pennaeth y Celfyddydau Mynegiannol yn Ysgol Uwchradd Gymunedol Gorllewin Caerdydd, hyn am y gweithdy. “Roedd y disgyblion yn bositif iawn ac wedi mwynhau'n fawr! Gobeithio gallwn ni eich cael chi i mewn eto yn y dyfodol! Mae ambell un yn gwneud cais am y gweithdy yn ystod hanner tymor sy’n gyfle gwych iddyn nhw.”

Mae Bruna Garcia, Cynhyrchydd dan Hyfforddiant Sgiliau Côr yn cytuno. “Roedd yn wych gweld sut gwnaeth y myfyrwyr ymgysylltu â’r gweithdy, a gwnaethant yn dda iawn. Mae’n galonogol gwybod eu bod wedi cael hwyl tra’n mynd â rhywbeth gwerthfawr gyda nhw hefyd.”

Gan ddatblygu ar yr hyn a gweithiwn ar yn ystod y gweithdai, bydd ein cwrs preswyl yn cynnig cyfle i gyfranogwyr weithio gyda thîm arbenigol o arweinwyr canu a gwesteion arbennig.

Cynhelir y cyfnod preswyl hwn rhwng 18fed a 21ain Chwefror 2023 yng Nghanolfan yr Urdd ym Mae Caerdydd, lle bydd cyfranogwyr yn cymryd rhan mewn ystod gyffrous o weithdai, dosbarthiadau meistr gyda gwesteion arbennig, a sesiynau canu un-i-un pwrpasol. Bydd y cyfnod preswyl yn dod i ben gyda rhannu perfformiad anffurfiol ar gyfer ffrindiau, teulu a gwesteion arbennig.

Ein nod yw i bob cyfranogwr adael y cyfnod preswyl gyda’r hyder a’r sgiliau i gael clyweliad ar gyfer unrhyw gyfleoedd corawl eraill a allai ddod i’w rhan yn y dyfodol, ac wrth gwrs Côr Cenedlaethol Ieuenctid Cymru.

I gael rhagor o wybodaeth am y preswyliad, gan gynnwys y gost a sut i wneud cais, ewch draw i dudalen prosiectau Sgiliau Côr.

Mae'r Celtic Collective yn Croesawu ei Haelod Diweddaraf

Bydd llysgennad DGIC, Erin Mared, yn ymuno â National Youth Dance Company Scotland am y flwyddyn gyfan, gan greu gwaith newydd i fynd ar daith ledled y DU a thramor

Bydd llysgennad DGIC, Erin Mared, yn ymuno â National Youth Dance Company Scotland am y flwyddyn gyfan, gan greu gwaith newydd i fynd ar daith ledled y DU a thramor.

Yn 2020 datblygodd NYDCS bartneriaeth newydd gyda DGIC trwy The Celtic Collective, a gynlluniwyd i gysylltu aelodau DGIC a NYDCS trwy angerdd ac awydd a rennir i wella eu datblygiad dawns a’u hymwybyddiaeth o’r sector, yn genedlaethol ac yn rhyngwladol. , trwy ddod â nhw at ei gilydd trwy brofiadau a rennir. Yn ystod y cyfnod cloi, cymerodd dawnswyr o’r ddau gwmni ran mewn gweithdai ar-lein gyda choreograffwyr o bob rhan o’r DU.

Eleni, mae partneriaeth y Celtic Collective wedi datblygu ymhellach ac yn cynnwys dawnswyr yn teithio rhwng gwledydd i gymryd rhan mewn rhaglenni a phreswyliadau.

Ym mis Awst 2022, bu aelodau Dawns Genedlaethol Ieuenctid Cymru yn gweithio gyda’r coreograffwyr Lea Anderson MBE ac Arielle Smith i greu dau waith dawns newydd a berfformiwyd am y tro cyntaf fel rhan o daith hydref Ballet Cymru. Dros gyfnod preswyl o bythefnos yng Ngholeg Brenhinol Cerdd a Drama Cymru, canolbwyntiodd y rhaglen ar ymestyn a herio aelodau yn greadigol ac yn artistig, gan ddatblygu eu sgiliau technegol a pherfformio ar yr un pryd.

Daeth tri aelod o NYDCS i Gymru i ymuno â DGIC ym mhreswyliad mis Awst fel perfformwyr gwadd, gan ymuno â’r cwmni mewn ymarferion ac ar lwyfan.

Mae'n bleser gennym gyhoeddi eleni, am y tro cyntaf, y bydd NYDCS yn croesawu llysgennad DGIC. Bydd Erin Mared, 23, o Aberystwyth, Cymru, sydd ar hyn o bryd yn astudio Sbaeneg ac Almaeneg ym Mhrifysgol Glasgow yn ymuno â NYDCS am y flwyddyn gyfan, gan greu gwaith newydd i deithio ar draws y DU a thramor.

Mae Erin wedi bod yn dawnsio ers yn bedair oed ac mae ganddi angerdd gwirioneddol am y llawenydd o ddawnsio, “Rwy’n dwli ar y ffaith bod dawns yn iaith gyffredin i bobl ledled y byd. Os na allwch gyfathrebu â rhywun trwy eiriau, gallwch chi bob amser ddod o hyd i gysylltiad trwy ddawns.”

Mae Dawns Genedlaethol Ieuenctid Cymru ac YDance, sy’n rhedeg NYDCS, yn darparu cyfleoedd hyfforddi a pherfformio o’r radd flaenaf i ddawnswyr ifanc. Mae’n tynnu ar egni a chyffro brwdfrydedd pobl ifanc dros ddawns ac yn ei sianelu i fod yn rym creadigol, cyfoes sy’n dathlu’r ddawns ieuenctid orau yng Nghymru a’r Alban heddiw.

“Rydym wrth ein bodd yn gweithio mewn partneriaeth â NYDCS. Trwy ddod at ein gilydd, gallem rannu cyfleoedd i ddawnswyr o DGIC a NYDCS i gymryd rhan mewn amrywiaeth o weithgareddau gwahanol yn rhithwir ac yn bersonol. Mae’r bartneriaeth Celtic Collective yn gyfle gwych i ddawnswyr o’r un anian o bob rhan o Gymru a’r Alban i rannu profiadau, datblygu sgiliau, a gwneud cysylltiadau newydd gyda chyfoedion ar draws y ddwy wlad.

Rwy’n gyffrous iawn i weld sut bydd y bartneriaeth yn datblygu dros y flwyddyn neu ddwy nesaf.” Jamie Jenkins, Cynhyrchydd Dawns.

“Mae eleni ar fin bod yn flwyddyn gyffrous i NYDCS gyda chyfleoedd anhygoel i berfformio y tu allan i'r DU! Braf yw cael partneriaeth Celtic Collective gyda DGIC i gynnig mwy o brofiadau i’r dawnswyr yn ystod eu taith gyda ni. Rydyn ni’n gyffrous i groesawu Erin fel rhan o’r cwmni eleni ac yn edrych ymlaen at y dyfodol ar y cyd gyda DGIC.” Anna Kenrick, Cyfarwyddwr Artistig YDance.

Bydd Erin yn ymddangos am y tro cyntaf gyda NYDCS yn eu perfformiad byw cyntaf yn nigwyddiad YDance eleni, Destinations, a gynhelir yn Eden Court, Inverness ar y 18fed o Chwefror.

Cyngor Celfyddydau Cymru yn ymateb i adroddiad ar gelfyddydau ieuenctid yng Nghymru

Wedi’i gomisiynu llynedd, mae’r cydweithrediad rhwng rhwng CCIC a YANC wedi’i chyhoeddi, gan amlinellu’r cynlluniau ar gyfer datblygu’r sector Celfyddydau Ieuenctid gyda mwy o gyfranogiad gan bobl ifanc

Ym mis Tachwedd 2020, cyflwynwyd llythyr ar y cyd gan Celfyddydau Cenedlaethol Ieuenctid Cymru (CCIC) a Rhwydwaith Celfyddydau Ieuenctid Cymru (YANC) i Gyngor Celfyddydau Cymru (CCC) yn amlinellu pryderon sylfaenol am ddyfodol y sector celfyddydau ieuenctid yng Nghymru; yn ymwneud yn bennaf â chanlyniadau dinistriol Covid-19 ar bobl ifanc a sector y celfyddydau.

Tynnodd sylw at y diffyg hanesyddol o adnoddau ar gyfer celfyddydau ieuenctid, effaith y pandemig ar les pobl ifanc a’u dyheadau ar gyfer gyrfaoedd yn y celfyddydau yn y dyfodol, ynghyd â’r diffyg llais cafodd pobl ifanc hyd yma yn y disgwrs yn ystod y pandemig.

Wedi’i gomisiynu gan Gyngor Celfyddydau Cymru yn 2021, ymunodd Celfyddydau Cenedlaethol Ieuenctid Cymru â Rhwydwaith Celfyddydau Ieuenctid Cymru (YANC) i gynnal cyfres o sesiynau ymgynghori ar-lein gyda phobl ifanc, sefydliadau celfyddydau ieuenctid, ac ymarferwyr i benderfynu ar yr angen am fforwm ieuenctid yng Nghymru ac ymgynghoriad ar dyfodol cyllid loteri celfyddydau ieuenctid.

Isod mae crynodeb o'r adroddiad, yn dilyn ei gyhoeddiad gan Gyngor Celfyddydau Cymru.

I ddarllen yr adroddiad llawn ar wefan Cyngor Celfyddydau Cymru, cliciwch yma. I ddarllen yr adroddiad Hawdd ei Ddarllen, cliciwch yma.

Beth mae pobl ifanc eisiau

Roedd cytundeb cyffredinol bod angen i Gyngor Celfyddydau Cymru a Llywodraeth Cymru wneud mwy i gymryd anghenion pobl ifanc yn fwy o ddifrif a’u gosod yn uwch ar yr agenda, megis gwrando ar bobl ifanc, meithrin gwell cysylltiadau sy’n gosod pobl ifanc y ganolfan waith, a chyllid mwy hyblyg a dirwystr ar gyfer prosiectau gyda phobl ifanc.

Soniodd y cyfranogwyr am fod eisiau rhwydwaith i bobl ifanc gysylltu a chydweithio â’i gilydd yn ogystal â chefnogi eu hymgysylltiad a’u gyrfaoedd yn y celfyddydau trwy gefnogaeth, gwybodaeth ac adnoddau.

Rhwydwaith a llais ieuenctid

Yn syml, dywedodd pobl eu bod eisiau rhwydwaith celfyddydol i bobl ifanc a fyddai'n eu helpu i gwrdd a gweithio gyda'i gilydd. Pwrpas y rhwydwaith hwn fyddai helpu pobl ifanc i gydweithio, cael gwybodaeth am y celfyddydau a chysylltu â sefydliadau celf yng Nghymru, cael cymorth gyda chyllid a cheisiadau a helpu i roi hwb i yrfaoedd yn y celfyddydau.

Cafwyd awgrymiadau hefyd ynghylch cynyddu cyllid a chefnogaeth i YANC. Gallai YANC cryfach, gyda phartneriaethau cryfach gyda sefydliadau celfyddydol a chymunedol ledled Cymru weithio gyda phobl ifanc, sefydliadau a CCC i ddatblygu rhwydwaith o'r fath.

Yn amlwg mae creu rhwydwaith o’r fath yn dasg fawr, ond dylai gael ei wneud gan bobl ifanc yn hytrach nag ar gyfer pobl ifanc, gyda chyfle i ymgysylltu ar-lein ac yn bersonol. Hefyd y dylai’r rhwydwaith fod yn hygyrch ac yn gynhwysol i bobl ifanc o bob cymuned ledled Cymru, gyda phwyntiau mynediad gwahanol i bobl ifanc ar wahanol adegau o’u taith o fewn y celfyddydau.

Rhaid i'r rhwydwaith hefyd fod ar gael yn ddwyieithog a sicrhau bod pobl ifanc sydd am chwilio am gyfleoedd, cefnogaeth neu gysylltiadau drwy'r Gymraeg yn gallu gwneud hynny drwy gynrychiolaeth gyfartal yn y Gymraeg.

Yn ystod y sesiynau yn trafod ehangu cynrychiolaeth llais ieuenctid, trafodwyd sawl syniad a fyddai'n rhoi llwyfan i bobl ifanc gael gwrandawiad dilys gan CCC, heb roi'r cyfrifoldeb arnynt i ddatrys yr holl broblemau.

Trafodwyd grŵp ieuenctid sy’n cyfarfod i drafod materion parhaus, a byddai’r grŵp yn gallu pwyso ar CCC, tra’n adleisio strwythurau Cyngor Ieuenctid Caerdydd, Senedd Ieuenctid Cymru neu Senedd Ieuenctid San Steffan.

Codwyd pwyntiau hefyd am bwysigrwydd bod gan y grŵp y fraint i ddylanwadu ar benderfyniadau.

Roedd awgrymiadau eraill yn cynnwys gosod dau berson ifanc ar Gyngor y Celfyddydau ei hun, a datblygu rhaglen sgiliau a hyfforddiant sy’n buddsoddi mewn pobl ifanc o bob rhan o Gymru.

Cyllid ar gyfer celfyddydau ieuenctid

Y farn gyffredinol yw bod y model presennol yn cyflwyno rhwystrau sylweddol i lawer o bobl ifanc, yn ogystal â chyfyngiadau gan sefydliadau sy'n anelu at redeg prosiectau mewn ffyrdd mwy hyblyg ac ymatebol.

Cafwyd sawl galwad i ddileu jargon a geiriad anodd mewn ceisiadau cyllido, ac i ailedrych ar y geiriad a ddefnyddiwyd a’r gofynion sydd yn eu lle i gyflwyno syniadau.

Roedd galwadau hefyd i sicrhau bod cyllid mentora yn ofynnol er mwyn cynnig y cyllid yn y lle cyntaf.

Roedd nifer o artistiaid ifanc yn y sesiynau a wnaeth sylwadau ar faint yr oeddent wedi elwa o gyngor ac arweiniad y sefydliadau oedd yn ymwneud â nhw wrth ysgrifennu ceisiadau, ond roedd galwadau clir hefyd am gefnogaeth ehangach oddi wrth Gyngor Celfyddydau Cymru. Yn bwysig, mae angen i’r cymorth ehangach hwn fod yn yma fod yn agored i’r bobl hynny sydd heb rwydweithiau sy’n bodoli eisoes, drwy ddiwrnodau hyfforddi a chanllawiau ar sut i wneud cais.

Mae Cyngor Celfyddydau Cymru yn cynnig gwybodaeth am wneud cais am arian mewn print bras, Braille, sain, Hawdd ei Ddeall ac Iaith Arwyddion Prydain, ond mae artistiaid B/byddar ddim yn ymwybodol o hyn, neu pa brosesau eraill sydd ar gael i helpu gyda cheisiadau.

Awgrymwyd y dylid cynyddu gwelededd cefnogaeth mynediad, ac y dylid ystyried ceisiadau fideo.

Beth sy'n digwydd nesaf?

Beth mae pobl ifanc am weld yn ystod y 3 mis nesaf

• I’r adroddiad hwn gael ei gyhoeddu yn Gymraeg a Saesneg, gyda chymorth ychwanegol ar cyfryngau cymdeithasol

• Fideos i'w gwneud gan bobl ifanc yn y celfyddydau yn ymateb i'r adroddiad

Beth mae pobl ifanc am weld yn ystod y 6 mis nesaf

• Deialog rhwng Cyngor Celfyddydau Cymru a sefydliadau celfyddydol ar sut i gychwyn y rhwydwaith celfyddydau ieuenctid

• Cynnydd mewn digwyddiadau dwyieithog gyda phobl ifanc

• I ddefnyddio’r digwyddiadau i gynyddu cefnogaeth i bobl ifanc i weithio gyda Chyngor Celfyddydau Cymru

Beth mae pobl ifanc am weld yn ystod yr 1 i 2 flynedd nesaf

• Cyllid uniongyrchol ar gyfer celfyddydau ieuenctid sydd ar gael i bobl ifanc

• Ffurflenni cais syml heb jargon a gyda iaith symlach

• Sefydliadau celfyddydol i gydweithio’n ddwyieithog i greu rhwydwaith ar gyfer celfyddydau ieuenctid, gyda chefnogaeth Cyngor Celfyddydau Cymru

• Gwahodd dau berson ifanc i ymuno â Chyngor Celfyddydau Cymru

• Rhaglenni hyfforddi a chyfleusterau i bobl ifanc arwain yn y sector celfyddydau

I gael rhagor o wybodaeth am Gyngor Celfyddydau Cymru ewch i'w gwefan.

Yr Eiconig Clwb Ifor Bach yng Nghaerdydd fydd yn cynnal gig gyntaf Cerdd y Dyfodol - prosiect Celfyddydau Cenedlaethol Ieuenctid Cymru ar gyfer cerddorion ifanc cyfoes rhwng 15-19 oed.

Mae Cerdd y Dyfodol wedi cyhoeddi eu gig gyhoeddus gyntaf ers sefydlu’r prosiect gan Gelfyddydau Cenedlaethol Ieuenctid Cymru yn 2019. Yn camu i’r llwyfan wedi misoedd o gydweithio yn y stiwdio - gyda phobl fel Mace the Great, Hemes, Skunkadelic, Lily Beau a DJ Dabes o Glwb Ifor Bach - bydd y genhedlaeth nesaf hon o egin-artistiaid Cymru’n cyflwyno eu perfformiad cyhoeddus cyntaf ar nos Fercher 24 Awst 2022. Mae’r ganolfan cerddoriaeth fyw, clwb nos a hyrwyddwr cerddoriaeth eiconig ar Stryd Womanby wedi croesawu egin-artistiaid, artistiaid lleol a rhyngwladol, gan ddarparu llwyfan cynnar i rai o’r enwau mwyaf ym myd cerddoriaeth heddiw.

Mae’r noson yn cynnig cyfuniad o seiniau gyda genres sy’n amrywio o grime i indie, pop i EDM; dyma arddangosfa o ddyfodol y sin gerddoriaeth yng Nghymru a’r hyn sydd gan y genhedlaeth nesaf o gerddorion ifanc Cymreig i’w gynnig. Ar brif lwyfan Clwb Ifor Bach: Morakai, Shaun Tucker, Daffydd Rose, Megan McFadden, Sharmeela, Olivia Sinclair, ONE84K, Leasha Packham, Hannah Huish a 4SZN. Yn camu i’r cwt DJ: Jack Reardon. Yn camu i’r llwyfan hefyd bydd aelodau ifanc proffesiynol o’r diwydiant sydd wedi cefnogi elfen Mentoriaid y Dyfodol y rhaglen: y gantores soul Aisha Kigs, y canwr E11ICE sy’n herio pob genre, a’r rapiwr Kali.

Mae Cerdd y Dyfodol yn cefnogi crewyr cerddoriaeth ifanc, gyda’r potensial i dyfu fel artistiaid, trwy ddatblygu eu sgiliau ysgrifennu caneuon, hunanreolaeth, a cherddorol mewn amgylchedd diogel a chefnogol. Mae’r prosiect yn arwain pob cyfranogwr trwy gylch bywyd llawn ysgrifennu caneuon - o ysgrifennu a recordio, i berfformio, teithio, a hyrwyddo eu cerddoriaeth - ac mae’n galluogi cyfranogwyr i arbrofi gydag ystod eang o genres. Dros y misoedd diwethaf, mae’r cerddorion ifanc hyn wedi gweithio gyda’u mentoriaid i berffeithio eu crefft fel cantorion, cyfansoddwyr caneuon a chynhyrchwyr trwy raglen datblygu artistiaid Celfyddydau Cenedlaethol Ieuenctid Cymru: Cerdd y Dyfodol. Gydag arweiniad ar y ffordd, maent wedi bod yn mireinio eu crefft, creu prosiectau cerdd cyffrous a chael cyfle i rwydweithio gyda gweithwyr proffesiynol o’r diwydiant, gan ddysgu’r hyn y mae’n ei gymryd i lwyddo yn y diwydiannau creadigol yng Nghymru.

Dywedodd Elina Lee, Cynhyrchydd dan Hyfforddiant Cerdd y Dyfodol:

“Yn aml, fyddwn ni ddim yn gweld artistiaid ifanc talentog gan fod llawer o ganolfannau digwyddiadau byw yn mynnu bod eu hartistiaid dros 18 oed i berfformio, mae hyn yn rhywbeth y mae Celfyddydau Cenedlaethol Ieuenctid Cymru yn anelu i’w newid. Mae’n bwysig i ni bod yr artistiaid ifanc talentog hyn yn cael cyfleoedd i berfformio a bod yn rhan o’r sin gerddoriaeth yn ystod y cyfnod cynnar hwn o’u gyrfa, sydd byth bron yn digwydd.”

“Peidiwch â cholli’r cyfle i weld yr artistiaid hyn ar gychwyn eu gyrfa a bod yn rhan o’r newid sy’n digwydd heddiw yn y sin gerddoriaeth yng Nghymru.”

Tocynnau

Darllen mwy

Llongyfarchiadau i enillwyr ein gwobrau Cerddorfa a Band Pres 2022

Bob blwyddyn ar ein preswyliadau, rydym yn dathlu ein cerddorion sy'n dangos yr addewid a'r ymroddiad mwyaf. Y tiwtoriaid adrannol sy'n penderfynu pwy sy'n derbyn pob gwobr yn ystod y cyfnodau preswyl.

Hoffai Celfyddydau Cenedlaethol Ieuenctid Cymru rhoi diolch i'r rhai sydd wedi rhoi arian i greu'r gwobrau hyn.

Cerddorfa Genedlaethol Ieuenctid Cymru

Gwobr Haydn Davies

Dyfarnwyd i’r chwaraewr mwyaf addawol sy’n dal i fod ym myd addysg

Dewi Thistlewood

Gwobrau Irwyn Walters (Cyfeillion NYOW)

Dyfarnwyd i’r ddau chwaraewr llinynnol mwyaf addawol yn y cwrs preswyl eleni

Sharon Liang & Kit Cookson

Gwobr Wil Jones

Dyfarnwyd i’r chwaraewr chwythbrennau mwyaf addawol yn y cwrs preswyl eleni

Heidi Walliman

Gwobr Goronwy Evans

Dyfarnwyd i'r chwaraewr pres mwyaf addawol yn y cwrs preswyl eleni

Branwen Thistlewood

Gwobr Telyn Tony Moore

Dyfarnwyd i’r telynor mwyaf addawol yn y cwrs preswyl eleni

Elena Ruddy

Band Pres Cenedlaethol Ieuenctid Cymru

Cwpan Goffa John Childs

Dyfarnwyd i’r chwaraewr mwyaf addawol ar y cwrs preswyl eleni

Ioan Jones

Gwobr David Mabey

Dyfarnwyd i’r chwaraewr sydd wedi gwella fwyaf ar y cwrs preswyl

Carys Lewis

Gwobr y Prif Gornet

Rhoddir gan Tony Small

Owain Llestyn

Edrych yn ôl ar Momentwm 2022

Yn ddiweddar, mynychodd 14 o ddawnswyr ifanc y cwrs preswyl Momentwm cyntaf, wedi’i gyflwyno mewn cydweithrediad rhwng rhaglen Duets Ballet Cymru a Chelfyddydau Cenedlaethol Ieuenctid Cymru.

Lluniau: Sian Trenberth

Fe wnaeth y bobl ifanc hyn fynychu'r cwrs fel parau o wahanol ysgolion ledled Cymru, yn tarddu o ardaloedd y nodwyd bod ganddynt fynediad cyfyngedig at berfformiad a datblygiad dawns. Gan nad ydynt erioed wedi cwrdd fel grŵp o'r blaen, treuliodd y dawnswyr dri diwrnod yng Ngwersyll yr Urdd Caerdydd ar raglen ddwys llawn hwyl o sgiliau dawns, gan ddatblygu eu techneg a'u creadigrwydd ochr yn ochr â rhai o'r enwau gorau yn niwydiant dawns Cymru.

Nod y prosiect oedd rhoi blas i'r dawnswyr ifanc o hyfforddiant dawns, na fyddent efallai'n gallu manteisio arno fel arall, a'u hannog i barhau i ddawnsio wrth iddynt symud drwy'r ysgol uwchradd.

“Mae dod â’n ysgolheigion Deuawdau cenedlaethol at ei gilydd ar gyfer Momentwm wedi bod yn ddigwyddiad hynod gyffrous. Yn ogystal â chynnig llawer o gyfleoedd dawns a dysgu ysbrydoledig, mae hefyd wedi galluogi ysgolheigion o bob cwr o Gymru i ddod at ei gilydd, mewn lle ffisegol, am y tro cyntaf. Mae ymrwymiad a phrofiad Ballet Cymru a Chelfyddydau Cenedlaethol Ieuenctid Cymru i gynnal cwrs preswyl o’r safon hon wedi meithrin profiad dawns mor gadarnhaol i bawb dan sylw.

Mae Momentwm yn gam mawr yn y bartneriaeth rhwng Ballet Cymru a Chelfyddydau Cenedlaethol Ieuenctid Cymru a’n gweledigaeth ar y cyd i helpu i bontio bylchau yn y ddarpariaeth ddawns yng Nghymru, ac i fynd i’r afael â heriau o ran mynediad ac ymgysylltu â dawns.””

— Amy Doughty, Cyfarwyddwr Artistig Cynorthwyol, Ballet Cymru

Arweiniodd yr Artist Dawns Llawrydd Liam Riddick sesiynau ar dechneg ddawns gyfoes. Roedd y gweithdai hyn yn canolbwyntio ar arwain y dawnswyr ifanc i ddatblygu perfformiadau deuawd ac unigol, a darparu lle iddyn nhw brofi cydweithio creadigol gyda chwmni newydd o gyd-berfformwyr.

Cafodd y cyfranogwyr gyfle hefyd i adeiladu ar eu rhythm a'u geirfa hip-hop ochr yn ochr â Reuel Bertram o Jukebox Collective, yn ogystal â dysgu camau bale a geirfa newydd gyda Louise Lloyd, ymarferydd Deuawdau Ballet Cymru.

“Mae Celfyddydau Cenedlaethol Ieuenctid Cymru wrth eu bodd o fod wedi cydweithio â Ballet Cymru i gyflwyno Momentwm yn bersonol eleni, gan ddarparu’r lle i’r bobl ifanc hyn archwilio dawns, dysgu gan weithwyr proffesiynol y diwydiant, ac yn anad dim, mwynhau’r amser i fod yn greadigol.

Mae’r gallu i gynnal rhaglen o’r fath sy’n cynnig cyfle i’r rheini ledled y wlad nad ydynt fel arfer yn cael mynediad at hyfforddiant dawns ar y lefel hon, yn ganolog i ymrwymiad NYAW i ddarparu llwybrau dilyniant i berfformwyr ifanc dawnus a thalentog Cymru o lawr gwlad i fyny. Meithrin y cysylltiadau hyn mewn cymunedau heb gynrychiolaeth ddigonol sy’n wynebu rhwystrau i hyfforddiant celfyddydol yw’r cam diweddaraf yn ymdrechion Ballet Cymru a NYAW ar y cyd i fynd i’r afael â materion sy’n ymwneud ag amrywiaeth a chynrychiolaeth ar draws y sector celfyddydau ieuenctid.”

— Gillian Mitchell, Prif Weithredwr, Celfyddydau Cenedlaethol Ieuenctid Cymru

Yn dilyn y gweithdai dawns bywiog hyn, fe wnaeth cyfranogwyr Momentwm eleni hefyd ymgolli mewn amserlen gymdeithasol o deithiau bowlio, nosweithiau ffilmiau, a theithiau cerdded grŵp o amgylch Bae Caerdydd, gan ddarparu'r lle perffaith i'r bobl ifanc hyn ddod i adnabod ei gilydd a dechrau datblygu cyfeillgarwch gydol oes drwy ddawns.

Mae Deuawdau, a gynhyrchwyd gan Ballet Cymru, yn rhaglen genedlaethol i bobl ifanc mewn ardaloedd o angen iddynt gael mynediad at hyfforddiant dawns a dilyniant. Mae'r rhaglen wedi'i chynllunio'n benodol i nodi talent, darparu llwybrau dilyniant, a gwella dyheadau ar gyfer pobl ifanc na fyddent fel arfer yn cael y cyfle i gael mynediad at ddawns ac ymgysylltu â dawns, yn enwedig y rhai sy'n byw mewn ardaloedd difreintiedig yng Nghymru.

Momentwm yw rhaglen hyfforddi a datblygu Celfyddydau Cenedlaethol Ieuenctid Cymru ar gyfer dawnswyr ifanc ar gamau cynnar eu taith i ddawns. Mae'r rhaglen yn canolbwyntio ar ddatblygu sgiliau a chryfder dawns craidd, yn ogystal â thechnegau creadigol a pherfformiad, gyda'r nod cyffredinol o roi'r sgiliau sydd eu hangen ar y dawnswyr ifanc hyn i ddilyn hyfforddiant dawns proffesiynol. Yn dilyn cydweithio â ZooNation - The Kate Prince Company yn y gorffennol, mae NYAW wrth ei bodd o fod wedi gweithio ochr yn ochr â rhaglen Deuawdau Ballet Cymru ar gyfer Momentwm 2022.

Rhaglen Momentwm Celfyddydau Cenedlaethol Ieuenctid Cymru yn cydweithio â Deuawdau Ballet Cymru y Pasg hwn

Eleni, mae prosiect Momentwm Celfyddydau Cenedlaethol Ieuenctid Cymru yn gweithio mewn partneriaeth â rhaglen Deuawdau Ballet Cymru, gan arwain at Gwrs Preswyl y Pasg cyffrous yng Nghaerdydd.

Mae dawnswyr ifanc talentog ac angerddol o bob rhan o Gymru yn cael eu dewis i gymryd rhan ym mhrosiect Deuawdau Momentwm eleni, gan dreulio tri diwrnod ochr yn ochr â rhai o artistiaid dawns gorau’r wlad i uwchsgilio eu coreograffi a'u sgiliau creadigol, tra'n ymgolli mewn amserlen llawn dop sy'n llawn arddulliau Cyfoes, Ballet a Hip Hop a sesiynau creadigol.

Mae'r cwrs preswyl wedi'i gynllunio i roi cipolwg i'r dawnswyr ifanc hyn fel dawnsiwr proffesiynol, ac ochr yn ochr â'r rhaglen ddawns wedi'i theilwra bydd cyfleoedd i gymryd rhan mewn gweithgareddau cymdeithasol ac i ddod i adnabod eu cyd-ddawnswyr ifanc. Mae'r rhaglen yn gyfle gwych i gwrdd â phobl o'r un anian o bob rhan o Gymru, ac i ddatblygu cyfeillgarwch a fydd yn para'n hir i yrfaoedd y dawnswyr ifanc hyn. 

Mae Deuawdau, a gynhyrchwyd gan Ballet Cymru, yn rhaglen genedlaethol i bobl ifanc mewn ardaloedd o angen iddynt gael mynediad at hyfforddiant dawns a dilyniant. Mae'r rhaglen wedi'i chynllunio'n benodol i nodi talent, darparu llwybrau dilyniant, a gwella dyheadau ar gyfer pobl ifanc na fyddent fel arfer yn cael y cyfle i gael mynediad at ddawns ac ymgysylltu â dawns, yn enwedig y rhai sy'n byw mewn ardaloedd difreintiedig yng Nghymru.

Momentwm yw rhaglen hyfforddi a datblygu gyffrous Celfyddydau Cenedlaethol Ieuenctid Cymru ar gyfer dawnswyr ifanc ar gamau cynnar eu taith i ddawns. Mae'r rhaglen yn canolbwyntio ar ddatblygu sgiliau a chryfder dawns craidd, yn ogystal â thechnegau creadigol a pherfformiad, gyda'r nod cyffredinol o roi'r sgiliau sydd eu hangen ar y dawnswyr ifanc hyn i ddilyn hyfforddiant dawns proffesiynol. Yn dilyn prosiect Momentwm digidol cyffrous yn 2021 mewn cydweithrediad â ZooNation - The Kate Prince Company, mae CCIC wrth eu bodd yn gweithio ochr yn ochr â rhaglen Deuawdau Ballet Cymru ar gyfer Momentwm 2022.

Lluniau: Sian Trenberth/Ballet Cymru

Theatr Cenedlaethol Ieuenctid Cymru a Solomonic Peacocks Theatre, Malawi yn cydweithio ar brosiect ffilm rhyngwladol newydd

Bydd dau gwmni theatr ieuenctid, sydd 5000 o filltiroedd oddi wrth ei gilydd, yn cyflwyno ffilm newydd yng Ngŵyl Pasg Solomonic Peacocks Theatre ym mis Ebrill – wedi ei chreu gan y perfformwyr ifanc fel rhan o brosiect cydweithredol rhyngwladol blwyddyn o hyd. 

Mae’r prosiect, a gynhaliwyd yn ddigidol dros Zoom a WhatsApp, wedi cynnwys gweithdai creadigol rheolaidd ar-lein yn archwilio llais ieuenctid a’u grymuso – a darganfod y pethau sydd gan bobl ifanc yn y ddwy wlad yn gyffredin. 

Mae’r ffilm deirieithog – a berfformir yn Gymraeg, Chichewa a Saesneg – yn gerdd lafar gydweithredol a berfformir gan y crewyr a’i ffilmio ar ffonau symudol, un o’r technolegau cyffredin sy’n uno pobl ifanc o amgylch y byd. Un agwedd bwysig o’r prosiect oedd sicrhau bod y bobl ifanc wrth galon creu’r gwaith – gyda’r grŵp yn penderfynu canolbwyntio ar y themâu o rymuso merched a menywod ifanc, a’u cysylltiad cyffredin o ddwyieithrwydd a’u hawydd i rannu eu bywydau bob dydd a’u diwylliant yn ddigidol.

Ynghyd â’r premiere yng Ngŵyl Pasg SPT ar Ddydd Gwener 8 Ebrill, bydd ffilm ddogfen yn cael ei rhyddhau’n dangos creu’r ffilm a sut y mae’r prosiect wedi effeithio ar y bobl ifanc oedd yn rhan o’r prosiect. Yn y DU, caiff y ffilm ei lansio ar yr un pryd ar blatfform AM, ar www.amam.cymru/nyaw

Ariennir y prosiect trwy gronfa ‘Mynd yn Ddigidol’ y British Council Cymru, a ddyluniwyd i hwyluso partneriaethau digidol rhwng cwmnïau celfyddydau yng Nghymru gyda phobl ifanc yn Affrica Is-Sahara.

Mae’r prosiect a’i sesiynau wythnosol wedi eu cyd-gynhyrchu gan y ddau gwmni, ac mae hefyd wedi galluogi hwyluswyr a chynhyrchwyr theatr ifanc i ddysgu oddi wrth ei gilydd, gan alluogi gwir gyfnewidfa ddiwylliannol. 

Fe wnaeth Dawn Bowden, Dirprwy Weinidog y Celfyddydau a Chwaraeon Llywodraeth Cymru, longyfarch y bartneriaeth: “Mae’n wych gweld y cydweithredu rhyngwladol hwn rhwng Theatr Cenedlaethol Ieuenctid Cymru a Solomonic Peacocks Theatre, Malawi.  Mae’r gyfnewidfa ddiwylliannol gyffrous hon rhwng perfformwyr ifanc, ar thema grymuso ieuenctid, wir yn gwneud y gorau o’r cyfryngau digidol a phartneriaeth ryngwladol.

“Mae ffurfio’r math yma o gysylltiadau rhyngwladol yn rhan allweddol o’n strategaeth gelfyddydol yng Nghymru – ac mae’n galonogol gweld pobl ifanc yng Nghymru’n ymateb trwy ffocysu ar yr hyn sydd gennym yn gyffredin, yn hytrach na’r hyn sy’n ein rhannu. Rwy’n edrych ymlaen at wylio’r ffilm orffenedig yn fuan iawn a gweld yr hyn y mae’r bobl ifanc wedi’i greu.”

Meddai Gillian Mitchell, Prif Weithredwraig Celfyddydau Cenedlaethol Ieuenctid Cymru: “Mae wedi bod yn wych gallu cyflwyno’r gyfnewidfa ddiwylliannol hon i aelodau ThCIC.  Fel mae’r prosiect yn arddangos yn gwbl glir, mae mwy o elfennau’n dod â phobl ifanc at ei gilydd o amgylch y byd nac sy’n eu gwahanu.  Rydym yn ddiolchgar i British Council Cymru am ariannu’r prosiect, sydd wedi hwyluso’r cyfnewid syniadau hyn a bydd yn gadael etifeddiaeth barhaol yn ein dwy wlad.

Dywedodd Natasha Nicholls, Rheolwraig Prosiect Celfyddydau’r British Council Cymru:  “Rydym yn falch iawn i fod yn cefnogi’r bobl ifanc o Gelfyddydau Cenedlaethol Ieuenctid Cymru a Solomonic Peacocks Theatre yn Malawi i archwilio theatr ddigidol a chyfnewidfa ddiwylliannol.

“Mae ‘Mynd yn Ddigidol’ yn rhaglen gan y British Council Cymru i alluogi partneriaid o Gymru ac Affrica Is-Sahara i gysylltu’n ddigidol, datblygu perthnasau newydd ac archwilio ffyrdd newydd o weithio.  Mae’r rhaglen wedi ei chynnal yng Nghymru ac 8 gwlad ar draws Affrica Is-Sahara, gan gwmpasu dawns, theatr, llythrennedd, ffilm a chelfyddydau gweledol.”

Dywedodd McArthur Matukuta, Cyfarwyddwr Gweithredol’r Solomonic Peacocks Theatre: “Er bod pandemig Covid-19 wedi atal cysylltiad corfforol, mae grym celfyddyd wedi chwalu’r rhwystr drwy dechnoleg ddigidol. Mae wedi profi i fod yn un o’r cyfryngau gorau er mwyn parhau cyfnewid a rhannu sgiliau ymysg pobl Ifanc.”

Bydd y ffilm ar gael i’w gwylio, am ddim, ar www.amam.cymru/nyaw o Ddydd Gwener 8 Ebrill. 

Cyhoeddi mentoriaid Cerdd y Dyfodol 2022

Yn dilyn fersiwn hybrid / ar-lein o’r prosiect yn 2021, a wnaeth alluogi 20 o bobl ifanc i ddatblygu eu doniau gyda chefnogaeth mentoriaid adnabyddus, rydyn ni mor gyffrous fod Cerdd y Dyfodol wedi cychwyn ar gyfer 2022!

Mae Cerdd y Dyfodol yn brosiect cerddoriaeth gyfoes a chyfle datblygu rhad ac am ddim ar gyfer gwneuthurwyr cerdd Cymru i’r dyfodol. Mae’n galluogi pobl ifanc 16-18 oed i dyfu i fod yr artistiaid y maent am eu bod ac mae’n eu cefnogi i wneud eu marc ar y sîn gerddoriaeth gyfoes yma yng Nghymru. 

Mae’n bleser gan Gelfyddydau Cenedlaethol Ieuenctid Cymru gyhoeddi’r mentoriaid ar gyfer Cerdd y Dyfodol eleni. Yn amrywio o ran genre o Grime i Indie, DJio i RnB, rydym yn falch i fod yn gweithio gyda charfan o bobl greadigol sy’n cynrychioli’r gorau o dirwedd miwsig cyfoes Cymru. 

MACE THE GREAT

Mae Mace The Great yn artist cyffrous o Caerdydd, Cymru sy’n creu cerddoriaeth Grime a Hip Hop. Enillodd Wobr Triskel yng Ngwobrau Cerddoriaeth Gymreig 2020, ac mae e wedi ennill cefnogaeth BBC 1Xtra, BBC Cymru, ITV, S4C (gorsaf deledu genedlaethol i Gymru), Clwb Pêl-droed Dinas Caerdydd, gŵyl a chynhadledd arddangos FOCUS Wales, cafodd ei Enwebu ar gyfer Gwobr Gerddoriaeth Gymreig 2021, Llysgennad Cymru ar gyfer wythnos lleoliadau annibynnol 2022, a’i wahodd i berfformio yn SXSW 2022 a hefyd yn rhan o MOBO Unsung Class of 2022. Nawr yn barod am 2022 enfawr, a fydd yn ei weld yn rhyddhau ei brosiect hir-ddisgwyliedig, yn dilyn llwyddiant ei EP poblogaidd 'My Side Of The Bridge', a ryddhawyd ym mis Mawrth 2021 drwy label MTGM.

HEMES

Yn ddiweddar, rhyddhaodd Hemes ei EP cyntaf 'Matters of the mind' ac fe wnaeth ei sengl 'Matters of the mind' gyrraedd 'Rhestr-A Cymru' ar BBC Radio Wales. Gan gymysgu synau R&B gydag alawon pop, ganwyd Hemes i rieni Arabeg ac roedd ei chariad at gerddoriaeth a chaneuon yn deillio o gael ei magu o amgylch cymysgedd o gerddoriaeth orllewinol a dwyreiniol canol.

TUMI WILLIAMS

Tumi Williams yw'r prif perfformwr ar gyfer Afro Cluster, band 9-darn ffync enfawr ac mae wedi ysgrifennu, recordio a theithio yn helaeth gyda'r grŵp ers dros ddegawd. Mae wedi perfformio ochr yn ochr ag artistiaid fel Talib Kweli, Chali 2na a The Pharcyde, ac wedi ymddangos mewn nifer o wyliau a digwyddiadau proffil uchel gan gynnwys SXSW, Glastonbury, Womad, Greenman a Boomtown.

HELEDD WATKINS

Astudiodd Heledd fel gwneuthurwr theatr cyn symud ymlaen i weithio fel gitarydd sesiwn bas, gan deithio gydag Emmy the Great, Chloe Howl a Paper Aeroplanes. Dechreuodd ysgrifennu ei cherddoriaeth ei hun fel prif perfformwr y band roc celf, HMS Morris gydag uchafbwyntiau yn cynnwys perfformio yn Glastonbury, rhyddhau dwy albwm ac ennill dau enwebiad Gwobrau Cerddoriaeth Gymreig. Ar hyn o bryd mae hi'n gweithio ar drydedd albwm HMS Morris, ac yn dylunio sain ar gyfer sioe theatr a fydd yn cael ei pherfformio yn 2023.

DJ DABES

Mae DJ Dabes yn arbenigo mewn feibiau mawr ac anthemau parti ac wedi gweithio i BBC Radio Wales, Capital FM, Radio Cardiff, Beacons a Radio Plattform Canolfan Mileniwm Cymru. Pan nad yw DJ Dabes y tu ôl i'r deciau mae'n addysgu, yn cyflwyno ar y radio, yn cynhyrchu cynnwys ar-lein neu’n ysgrifennu cerddoriaeth.

Grandewch ar ei gymysgedd Bring The Summer ar Mixcloud

LILY BEAU

Symudodd Lily Beau i Lundain yn 16 mlwydd oed a sicrhaodd brofiad gwaith yn Island UK, Universal Music Publishing a Warner Music Group. Fe wnaeth hyn arwain wedyn at rôl llawn amser yn Sony Music Publishing fel A&R. Ar ôl symud yn ôl i Gymru yn ddiweddar, cyfansoddodd a pherfformiodd gân fel rhan o ail-agoriad y Senedd i'r Frenhines yn 2021. O flaen popeth arall, mae Lily wrth ei bodd i fod yn ôl yn ei thref enedigol, yn ysgrifennu wrth y piano ac yn methu aros i rannu cerddoriaeth newydd.

Dawns Genedlaethol Ieuenctid Cymru’n croesawu Lea Anderson ac Arielle Smith fel coreograffwyr ar gyfer tymor 2022

Lea Anderson, y coreograffydd rhyngwladol enwog a’r artist dawns a’r coreograffydd Arielle Smith, i greu dau waith newydd ar gyfer Dawns Genedlaethol Ieuenctid Cymru, gan weithio gyda DGIC am y tro cyntaf

• Dawns Genedlaethol Ieuenctid Cymru yn partneru gyda Ballet Cymru ar gyfer cwrs preswyl 2022, gyda DGIC yn perfformio gyda Ballet Cymru fel rhan o’u taith hydref trwy’r DU 

• Ceisiadau’n agored nawr ar gyfer ensemble DGIC 2022, sydd ar agor i ddawnswyr ifanc 16-22 oed o Gymru neu sy’n byw yng Nghymru. 

Efallai bod Lea Anderson, un o goreograffwyr mwyaf arloesol y DU, yn fwyaf adnabyddus am gyd-sefydlu cwmnïau The Cholmondeleys a The Featherstonehaughs, ble bu’n gyfrifol am goroegraffu mwy na 100 o weithiau. Yn 2002, derbyniodd MBE am ei gwasanaeth i ddawns. 

Wedi’r cyhoeddiad, dywedodd Lea Anderson: "Rydw i mor hapus i gael fy ngwahodd i greu gwaith newydd gyda Dawns Genedlaethol Ieuenctid Cymru yr haf yma ac rydw i’n edrych ymlaen at allu mynd i’r stiwdio o’r diwedd i gydweithio gyda dawnswyr ifanc gwych." 

Yn ymuno â’r tîm artistig ar gyfer 2022 hefyd mae Arielle Smith, enillydd y categori Emerging Artist yn y Gwobrau Dawns Cenedlaethol 2021. Mae wedi coreograffu gweithiau gyda English National Ballet, gan gydweithio gyda nhw yn 2021 a gyda’r gantores Anne-Marie i greu gwaith newydd ar gyfer y dathliad croeso adref o’r Gemau Olympaidd i Team GB yn Wembley.

Meddai Arielle Smith: “Dwi wrth fy modd i weithio gyda Dawns Genedlaethol Ieuenctid Cymru. Mae nawr, fwy nag erioed, yn amser i ddod at ein gilydd, i greu, rhannu a mwynhau dawns ac rydw i’n gyffrous iawn i weithio gyda’r genhedlaeth nesaf o ddoniau.”

Bydd Anderson a Smith yn creu gwaith newydd yr un ar gyfer Dawns Genedlaethol Ieuenctid Cymru, wrth i DGIC ddod at ei gilydd am eu cwrs preswyl haf cyntaf ers 2019. Yna byddant yn perfformio gyda Ballet Cymru, fel rhan o daith hydref Ballet Cymru trwy’r DU.

Clyweliadau DGIC 2022

Bob blwyddyn bydd Dawns Genedlaethol Ieuenctid Cymru’n cynnal clyweliadau ar gyfer dawnswyr ifanc o bob cwr o Gymru i ymuno â’r ensemble. Yn y clyweliadau cyfeillgar a chefnogol hyn, bydd y dawnswyr ifanc yn cymryd rhan mewn dosbarth meistr llawn sy’n archwilio technegau dawns cyfoes. Yna, bydd y rhai gaiff eu dethol yn mynd ymlaen i gymryd rhan mewn cwrs preswyl yn yr haf, gan greu dau ddarn newydd o goreograffi i’w perfformio yn yr hydref.

Am y tro cyntaf eleni, caiff cwrs preswyl yr haf ei gyfannu gan gyfres o ddosbarthiadau meistr ar-lein fel rhan o’r Cymundod Celtaidd, sef partneriaeth rhwng DGIC a Chwmni Dawns Cenedlaethol Ieuenctid yr Alban. Mae’r prosiect ar y cyd hwn yn ein helpu i drosglwyddo dosbarthiadau meistr a hyfforddiant o safon ryngwladol i ddawnswyr ifanc, gan ddefnyddio Zoom i gysylltu artistiaid dawns ifanc gyda’i gilydd.

Mae pob dawnsiwr ifanc 16-22 oed, a aned yng Nghymru neu sydd bellach yn byw yng Nghymru, yn gymwys i ddod am glyweliad. Ceir clyweliadau am ddim ar gyfer pobl ifanc sydd angen cymorth ariannol - a hynny ar sail “dim cwestiynau”, a bwrsariaethau o hyd at 100% o’r ffïoedd ar gyfer rhai o deuluoedd incwm is.

Dywedodd Gillian Mitchell, Prif Swyddog Gweithredol Celfyddydau Cenedlaethol Ieuenctid Cymru: “Allwn ni ddim aros i gynnal clyweliadau unwaith eto ym mhob cwr o Gymru, er mwyn chwilio am y genhedlaeth nesaf o artistiaid dawns Cymreig.

“Diolch i gefnogaeth hael Ymddiriedolaeth Leverhulme, Cyngor Celfyddydau Cymru, a chefnogwyr ein cronfa bwrsariaethau, gallwn gynnig clyweliadau am ddim a bwrsariaethau o hyd at 100% ar gyfer y rheini sydd angen cymorth ariannol - felly ’does dim byd i’w golli trwy ddod am glyweliad! 

“Mae Dawns Genedlaethol Ieuenctid Cymru, sydd bellach yn ei ail flwyddyn ar hugain, unwaith eto’n gallu dod â rhai o’r coreograffwyr gorau i Gymru, gan ganiatáu i ddawnswyr ifanc brofi a dysgu oddi wrth y profiad trochi, unigryw hwn. Allwn ni ddim aros i arddangos eu gwaith wrth iddyn nhw berfformio gyda Ballet Cymru yr hydref hwn.” 

Am fwy o wybodaeth am ddod am glyweliad gyda Dawns Genedlaethol Ieuenctid Cymru, ewch i www.ccic.org.uk/clyweliadau. Y dyddiad cau ar gyfer derbyn ceisiadau yw Dydd Sul 20 Chwefror, 11.59pm.

Y Prif Weinidog yn llongyfarch CGIC ar ei phen-blwydd yn 75ain

Mae’r Prif Weinidog Mark Drakeford wedi dathlu pwysigrwydd Cerddorfa Genedlaethol Ieuenctid Cymru, fel rhan o neges fideo arbennig a recordiwyd ar gyfer 75ain Pen-blwydd yr ensemble yn 2021.

Nododd y Prif Weinidog bod yr ensemble - sef cerddorfa ieuenctid genedlaethol hynaf y byd - yn chwarae rhan bwysig yn nhirwedd gerddorol cyfoethog Cymru, gan gefnogi miloedd o gerddorion ifanc a rhoi cyfle iddynt berfformio i safon broffesiynol. 

Cyfeiriodd hefyd at bwysigrwydd rhwydwaith cyn-aelodau’r gerddorfa, gyda’i chyn-aelodau wedi mynd ymlaen i berfformio mewn cerddorfeydd proffesiynol ledled y byd, yn ogystal â dilyn gyrfaoedd proffesiynol mewn amrywiol feysydd, fel meddygon, cyfreithwyr, athrawon, arweinyddion busnes a gwleidyddion.

“Waeth beth eu cefndir, mae cyn-aelodau’r gerddorfa’n mynd ymlaen i helpu i ffurfio’r Gymru yr ydym yn falch i fyw ynddi.”

— Mark Drakeford

Trwy gydol y pandemig Covid-19, mae Celfyddydau Cenedlaethol Ieuenctid Cymru wedi darparu rhaglen gyfoethog o gefnogaeth a datblygiad i aelodau ei ensembles. Mynegodd y Prif Weinidog cyn bwysiced fu hyn i gerddorion ifanc i gael eu cefnogi trwy ddosbarthiadau meistr ar-lein, gweithdai digidol, a sesiynau llesiant trwy gydol y cyfnod hwn.

“Wrth i’r gerddorfa ieuenctid genedlaethol ail-gyflwyno gweithgarwch wyneb-yn-wyneb, bydd yn parhau i ysbrydoli cerddorion ifanc y dyfodol.”

— Mark Drakeford

Yn ddiweddar, fel rhan o’i dathliadau pen-blwydd yn 2021, mae Cerddorfa Genedlaethol Ieuenctid Cymru wedi recordio cyngerdd sy’n cynnwys 10 comisiwn newydd sbon o weithiau siambr gan gyfansoddwyr Cymreig. Mae’r cyngerdd llawn ar gael i’w ffrydio am ddim ar-lein tan 30ain Tachwedd - gallwch ei wylio yma.

“Llongyfarchiadau unwaith eto i bawb yng Ngherddorfa Genedlaethol Ieuenctid Cymru, dymunwn bob llwyddiant ichi, ac edrychwn ymlaen at weld be ddaw yn y 75 mlynedd nesaf.”

— Mark Drakeford

10 comisiwn digidol newydd yn helpu i ddathlu 75 mlynedd o Gerddorfa Genedlaethol Ieuenctid Cymru

• Mae Cerddorfa Genedlaethol Ieuenctid Cymru (CGIC) yn troi’n 75 yn 2021, sy’n golygu mai hi yw’r gerddorfa ieuenctid genedlaethol hynaf yn y byd

• Mae CGIC wedi comisiynu 10 gwaith siambr newydd, gan gyfansoddwyr o Gymru

• Comisiynwyd rhai o gyn-aelodau mwyaf adnabyddus CGIC, yn cynnwys Syr Karl Jenkins, Hilary Tann a Patrick Rimes

Bydd Cerddorfa Genedlaethol Ieuenctid Cymru - y gerddorfa ieuenctid genedlaethol hynaf yn y byd - yn dathlu ei phen-blwydd yn 75 oed eleni, gyda chymorth 10 comisiwn newydd gan gyfansoddwyr o Gymru.

Mae’r 10 gwaith siambr newydd wedi eu comisiynu gan Gelfyddydau Cenedlaethol Ieuenctid Cymru er mwyn i aelodau’r Gerddorfa, a rhywfaint o gyn-aelodau, eu perfformio gyda’i gilydd mewn grwpiau bychain. Rhoddwyd penrhyddid i’r cyfansoddwyr ysgrifennu ar gyfer unrhyw gyfuniad o offerynnau’r Gerddorfa ac mae pob gwaith yn amrywio o ran maint, o driawdau a phedwarawdau hyd at weithiau siambr ar gyfer 15-20 cerddor. Mae wyth o’r gweithiau newydd wedi eu recordio eisoes gan aelodau a chyn-aelodau CGIC mewn sesiwn recordio yn Neuadd Dewi Sant, Caerdydd, yn barod ar gyfer dathliad pen-blwydd arbennig ar-lein ar Ddydd Iau 21 Hydref.

Mae rhai o gyn-aelodau enwocaf CGIC ymysg y cyfansoddwyr a gomisiynwyd, yn cynnwys Hilary Tann, Patrick Rimes, a Syr Karl Jenkins, a gychwynnodd ei yrfa gerddorol fel oböydd gyda’r Gerddorfa.

“Mae mor gyffrous, allwn i ddim aros i fod yn ôl yn chwarae gyda phobl nad oeddwn i wedi chwarae gyda nhw ers cyhyd. Mae fel pe bae dim wedi newid”
Isobel, aelod CGIC

“Mae bod yn ôl gyda Cherddorfa Genedlaethol Ieuenctid Cymru yn gymaint o bleser, a rhyddhad! Mae wedi bod yn gyfnod mor hir ond ry’n ni mor gyffrous i fod yn ôl.”
Nathan Dearden, Cyfansoddwr a Chyn-aelod CCIC

Llun: Jamie Chapman

Y cyfansoddwyr a’r gweithiau comisiwn yw:

• Jo Thomas - Seeds (i dri chlarinét, ffidil, bas dwbl ac offerynnau taro)

• Bethan Morgan-Williams - Parodi i Dri (clarinét, ffidil, piano)

• Angharad Jenkins a Patrick Rimes – Music for 13 voices

• Lloyd Coleman – Machine (i naw offeryn chwyth)

• Gareth Olubunmi Hughes – Horizon One (ar gyfer ensemble siambr)

• Syr Karl Jenkins – Chums! (trefniant i ensemble siambr ar gyfer pen-blwydd CGIC yn 75 oed)

• Mark Bowden – Wych Elm (daru ddarn ar gyfer ffliwt, fiola a thelyn)

• Claire Roberts - Rhywbeth ar y gweill (i biano, offerynnau taro a llinynnau)

• Hilary Tann - Penrhys Fanfare (i bedwar trymped)

Meddai Gillian Mitchell, Prif Swyddog Gweithredol Celfyddydau Cenedlaethol Ieuenctid Cymru: “Mae mor gyffrous gallu gweithio gyda chymaint o gyfansoddwyr Cymreig disglair ar y prosiect hwn. Mae Cerddorfa Genedlaethol Ieuenctid Cymru wedi cefnogi rhai o gerddorion gorau Cymru dros y degawdau, ac er ein bod yn siomedig nad oes modd inni eto ddod a’r gerddorfa lawn at ei gilydd ar gyfer cwrs preswyl, ry’n ni wir wrth ein bodd ein bod yn gallu cwrdd â’r grwpiau siambr hyn wyneb-yn-wyneb i recordio.”

Mae pob darn wedi ei recordio a’i ffilmio gan lynu at fesurau ymbellhau cymdeithasol priodol, yn unol â’r cyngor iechyd cyhoeddus oedd yn ei le ar y pryd. Ynghyd â nifer fawr o weithgareddau ar-lein eraill, mae’r rhain wedi cymryd lle'r profiad cwrs preswyl byw arferol, sydd dal yn amhosibl oherwydd y cyngor ymbellhau cymdeithasol parhaus. Trwy gydol y pandemig, mae aelodau CGIC wedi elwa o lu o ddosbarthiadau meistr ar-lein yn cynnwys gan y delynores Catrin Finch, y ddau feiolinydd Patrick Rimes a Rachel Podger, y trympedwr Philip Cobb a’r clarinetydd Robert Plane.

Llun: Jamie Chapman

Bydd premiere byd-eang y 10 darn ar gael i’w ffrydio ar-lein am 7pm ar Ddydd Iau 21 Hydref. Caiff y cyngerdd ei ffrydio trwy AM ar amam.cymru/nyaw

Yn ogystal, bydd pob darn ar gael i’w wylio ar-alw am chwe mis arall ar sianelau CCIC ar AM a Youtube. Mae mynediad i’r premiere yn rhad ac am ddim, ond croesewir cyfraniadau tuag at gronfa bwrsariaethau CCIC.

Mae CGIC yn cael ei rhedeg gan Gelfyddydau Cenedlaethol Ieuenctid Cymru, a sefydlwyd yn 2017 i arwain datblygiad chwe ensemble cenedlaethol clodfawr Cymru, yn ogystal ag ystod eang o brosiectau i ddarparu cyfleoedd creadigol ar gyfer pobl ifanc yn y celfyddydau.

Fel elusen gofrestredig, mae Celfyddydau Cenedlaethol Ieuenctid Cymru’n dibynnu ar eich cyfraniadau hael i sicrhau bob amser bod y rhai mwyaf haeddiannol yn gallu ymgysylltu â’r celfyddydau ar y lefel uchaf, waeth beth eu cefndir neu eu sefyllfa economaidd. Dysgwch sut allwch chi ein cefnogi ar ccic.org.uk/cefnogwch-ni

Mae cariad yn yr aer ar gyfer aelodau Theatr Cenedlaethol Ieuenctid Cymru ym mhremiere eu cynhyrchiad ffilm cyntaf erioed

Photo: Kirsten McTernan

Theatr Cenedlaethol Ieuenctid Cymru (ThCIC) yn cyflwyno premiere eu cynhyrchiad ffilm cyntaf erioed, wedi ei ffilmio ar leoliad ledled Cymru

Cast o 14 o actorion ifanc rhwng 16-23 oed, o bob cwr o Gymru, yn perfformio taith epig, llawn cerddoriaeth

Ysgrifennodd y sgriptwraig Hanna Jarman (cydawdur Merched Parchus S4C) sgript a gomisiynwyd yn arbennig ac a ysbrydolwyd gan ensemble y cast

Mae’r sgôr gerddorol epig yn cynnwys cân newydd sbon gan y gantores-gyfansoddwraig Kizzy Crawford

Bydd y cynhyrchiad, sy’n waith ar y cyd rhwng ThCIC a Theatr Clwyd, ar gael i’w ffrydio ar-lein o wefan Theatr Clwyd o Ddydd Gwener 1 - Ddydd Sadwrn 9 Hydref.

---

Mae cast o 14 o aelodau ifanc Theatr Cenedlaethol Ieuenctid Cymru yn mynd ar daith epig, llawn cerddoriaeth yr Hydref hwn, wrth i’w cynhyrchiad digidol o Y Teimlad | That Feeling gael ei ffrydio ar-lein.

Yn y plot, sydd wedi ei ysbrydoli gan ensemble y cast a’i ysgrifennu gan y sgriptwraig Hanna Jarman, mae byd y Duwiau Cariad hynafol yn gwrthdaro gyda realiti cariad yn y Gymru gyfoes. Mae’r gybolfa liwgar, ddwyieithog o ffilm a theatr, gydag ambell lwyaid o Zoom seicedelig, yn cyd-blethu straeon y cymeriadau ifanc wrth iddynt ddathlu ac ailddiffinio’r hyn all cariad fod.

Daw teitl y ffilm o gân syml hyfryd o’r 90au, sef Y Teimlad, gan y band unigryw Datblygu - ac mae’r recordiad gwreiddiol i’w glywed yn y cynhyrchiad, ynghyd â fersiwn newydd a ysbrydolwyd gan aelodau’r cast, a’i chyfannu gan y comisiwn newydd sbon gan y gantores-gyfansoddwraig Kizzy Crawford. Golygodd marwolaeth drist cyn pryd David R Edwards, canwr y band, bod ail-ddychmygu’r themâu hyn gan genhedlaeth newydd o artistiaid ifanc Cymreig yn chwerw-felys.

Mae Hanna Jarman ei hun yn gyn-aelod o Theatr Cenedlaethol Ieuenctid Cymru, ac roedd yn falch iawn i ddychwelyd at ThCIC:

“Mae cael bod yn rhan o Theatr Ieuenctid Cymru eto pymtheg mlynedd ar ôl ymuno y tro cyntaf (rhan o gynyrchiadau'r cwmni yn 2006 a 2008) yn fraint anhygoel. Dwi'n dweud o hyd, mewn ffordd dyna oedd dechre fy ngyrfa fel Actor, a dyna lle nes i gwrdd â Mari Beard fy nghyd sgwennwr ar amryw o brosiectau heddiw.

“Ar ôl trafodaeth gyda’r cwmni, roedden nhw’n awyddus i berfformio darn llawn hwyl ac yn benodol dim byd i neud gyda'r pandemig! Nes i fwynhau yr her a pa well pwnc i drafod na chariad?”

Dyma’r pedwerydd prosiect cydweithredol rhwng ThCIC a Theatr Clwyd yn y blynyddoedd diwethaf a, gyda Hannah Noone, maent wedi ffurfio gweledigaeth ar gyfer cynhyrchiad ffilm theatrig uchelgeisiol a difyr, gaiff ei ffrydio ar-lein gan Theatr Clwyd, sydd wedi canolbwyntio ar y sgiliau y mae perfformwyr eu hangen er mwyn actio ar y sgrîn - yn y Gymraeg a’r Saesneg.

“Pwy ddwedodd eich bod angen llwyfan i greu theatr” Aelod ThCIC

Y cynhyrchiad digidol hwn yw’r cynhyrchiad llawn cyntaf i ThCIC ei berfformio dan y canllawiau ymbellhau cymdeithasol. Roedd yn glir bod y tîm creadigol am ymgolli’n llwyr mewn fformat ffilmio digidol, gan ganiatáu llwyfan ehangach ar gyfer ymateb i anghenion a lleisiau’r perfformwyr ifanc. I lawer o’r perfformwyr, dyma’r tro cyntaf iddynt actio o flaen camera, gan helpu i roi hwb i’w profiad a’u sgiliau fel artistiaid amryddawn.

“Ges i amser a phrofiad gwych. Fe wnaeth fy helpu gymaint gydag ochr actio ar gyfer ffilm ac roedd creu fideo cerddorol yn wallgo’!” Aelod ThCIC

“Mae wir wedi fy helpu i brofi gwahanol agweddau actio, a’r profiad o actio o flaen camera. Mae wedi bod yn wych a dwi wedi mwynhau pob eiliad. Alla’ i ddim aros i weld y ffilm, mae’n mynd i fod yn anhygoel!” Aelod ThCIC

Datblygwyd yr agwedd gydweithredol o weithio gyda’r perfformwyr ymhellach gyda’r gantores-gyfansoddwraig Gymreig Kizzy Crawford, a gomisiynwyd i ysgrifennu anthem gariad newydd sbon ar gyfer ein hoes ni ar gyfer y cynhyrchiad, sef Cymaint o Liwiau, sy’n ymddangos mewn fideo ddathliadol yn arddull yr 80au a goreograffwyd gan Matteo Marfoglia.

Dan lygad creadigol y gwneuthurwr ffilmiau Nico Dafydd, cynhaliwyd y gwaith ffilmio mewn sesiynau Covid-ddiogel mewn lleoliadau ar hyd a lled Cymru, yn amrywio o olygfeydd panoramig o’r mynyddoedd a’r môr ger Bangor, gwacter ingol prif lwyfannau eiconig Theatr Clwyd a Theatr y Sherman, i strydoedd a synau Cathays, Canol y Ddinas a Butetown yng Nghaerdydd. Wedi eu gwasgaru rhwng y golygfeydd hyn, ceir enghreifftiau hynod ddyfeisgar o ffilmio o hirbell o bob cwr o Gymru. Ceir hyd yn oed ambell lwyaid o sesiynau Zoom seicedelig yn cynnwys Duwiau Cariad hynafol cecrus y mae eu cyfarfodydd yn cael eu dyrchafu gan ddyluniad gwisgoedd hardd a grëwyd ar gyfer y cynhyrchiad gan y dylunydd Jacob Hughes, sydd newydd ddylunio ar gyfer cynhyrchiad Shakespeare’s Globe o Romeo and Juliet.

“Fe weithiais ochr-yn-ochr ag artistiaid anhygoel a brwdfrydig a chast talentog a’r grŵp o bobl mwyaf uchelgeisiol imi gwrdd â nhw erioed” Aelod ThCIC

Meddai Tamara Harvey, Cyfarwyddwr Artistig Theatr Clwyd: “Rydym wrth ein bodd yn cydweithio gyda Theatr Cenedlaethol Ieuenctid Cymru ar ‘Y Teimlad / That Feeling’, prosiect ffilm/theatr newydd beiddgar wedi ei ysgrifennu gan y dramodydd rhyfeddol Hannah Jarman. Mae Theatr Cenedlaethol Ieuenctid Cymru yn sefydliad pwysig ac arloesol sydd wedi cynnig y cam cyntaf hanfodol i berfformwyr ifanc Cymru am dros 40 mlynedd. Mae’r cyd-gynhyrchiad hwn yn help i arddangos rhai o egin dalentau mwyaf addawol y Gymru gyfoes.”

Meddai Gillian Mitchell, Prif Weithredwraig Celfyddydau Cenedlaethol Ieuenctid Cymru: “Er gwaethaf heriau gweithio’n ystod y pandemig Covid, rydym wedi bod yn gweithio’n galed i roi cyfleoedd perfformio cyffrous i bob un o’n haelodau ifanc - ac mae’r comisiwn newydd uchelgeisiol hwn yn Gymraeg a Saesneg yn ddim ond un enghraifft. Gyda rhai o ddoniau mwyaf cyffrous Cymru’n rhan o’r cynhyrchiad, alla’ i ddim aros i weld sut mae’r canlyniad terfynol yn edrych ar y sgrîn.

“Mae ein haelodau ifanc wedi ei gwneud hi’n gwbl glir i ni pa mor bwysig yw’r perfformiadau hyn iddyn nhw, ac rydym yn gwybod y gallant fod yn falch o’r cynhyrchiad epig hwn ar gyfer y sgrîn, wrth iddyn nhw symud ymlaen gyda’u gyrfaoedd actio.”

---

Mae’r prosiect yn rhan o dymor Maniffest ThCIC 2021. Mae’r rhaglen blwyddyn gron hon o weithiau comisiwn, prosiectau cydweithredol a mentrau creadigol newydd yn arddangos yr hyn sy’n atgyfnerthu pobl ifanc, ac yn arddangos Cymru fel y mae pobl ifanc yn ei gweld hi yn yr 21ain ganrif – gwlad egnïol, amrywiol a dwyieithog gyda llais artistig cryf.

Am fwy o wybodaeth am Theatr Cenedlaethol Ieuenctid Cymru ewch i www.ccic.org.uk

Mae’r cynhyrchiad ar gael i’w ffrydio ar ddyddiadau penodol rhwng Dydd Gwener 1 a Dydd Sadwrn 9 Hydref. Mae tocyn ffrydio 24-awr yn costio £5 (£3 pris mynediad, £10 pris cefnogwr). I archebu tocynnau ewch i www.theatrclwyd.com.

Cyfle i gwrdd gyda Chynhyrchwyr dan Hyfforddiant newydd CCIC

Mae Celfyddydau Cenedlaethol Ieuenctid Cymru yn falch i fod wedi penodi dau Gynhyrchydd dan Hyfforddiant newydd i’r tîm staff, gan ehangu’r cynnig cyfleoedd ar gyfer pobl ifanc i gychwyn gyrfa yn y celfyddydau.

Mae’r rolau dan hyfforddiant hyn wedi eu dylunio i ymbaratoi pobl ifanc - sydd efallai heb ennill unrhyw brofiad blaenorol yn y celfyddydau - gyda’r sgiliau a’r wybodaeth i drochi eu hunain yn niwydiant celfyddydol Cymru, ac i allu ffynnu yn eu gyrfaoedd i’r dyfodol.

Rydym yn falch i fod wedi penodi Aeron Fitzgerald fel Cynhyrchydd dan Hyfforddiant sy’n gweithio ar draws holl brosiectau Celfyddydau Cenedlaethol Ieuenctid Cymru, ac Elina Lee fel Cynhyrchydd dan Hyfforddiant sy’n canolbwyntio’n benodol ar brosiect Cerdd y Dyfodol ar gyfer 2021 a 2022.

Gyda diolch i Incubator Fund Youth Music, sydd wedi cefnogi creu rôl Cynhyrchydd dan Hyfforddiant Cerdd y Dyfodol, ry’n ni’n edrych ymlaen at ddarparu llawer mwy o gyfleoedd ar gyfer pobl ifanc i gychwyn eu gyrfaoedd yn 2021. Ar hyn o bryd, rydym yn recriwtio trydydd Cynhyrchydd dan Hyfforddiant i weithio’n benodol ar ein rhaglen datblygu corawl, Sgiliau Côr, a byddwn hefyd yn creu chwe swydd Mentor y Dyfodol newydd sbon yn hwyrach eleni.

Meddai Aeron Fitzgerald, Cynhyrchydd dan Hyfforddiant:

“Mae bod yn rhan o dîm Celfyddydau Cenedlaethol Ieuenctid Cymru ers mis Chwefror 2021 wedi bod yn agoriad llygad ac yn gychwyn cyffrous i fy ngyrfa. Feddyliais i erioed y byddai gweithio yn y Sector Celfyddydau Cymreig yn bosibilrwydd i mi, tan imi gael fy ysbrydoli gan athro Ffilm brwd a llawn ysgogiad yn ystod fy arholiadau Safon Uwch. A dyma ni, ychydig flynyddoedd yn ddiweddarach, fe lwyddais i raddio gyda Gradd Anrhydedd mewn Ffilm o Brifysgol De Cymru.

Fel Cynhyrchydd dan Hyfforddiant, mae’n bleser gen i ddatblygu’r rhaglenni gwych yr ydym yn eu cynnig ochr-yn-ochr a’n tîm o staff a’n gweithwyr llawrydd niferus, ac i fod mewn cysylltiad agos gyda’n haelodau neilltuol, yn hen a newydd. Rwy’n cael fy ysbrydoli bob dydd gan ymroddiad a thalent yr actorion, dawnswyr a cherddorion ifanc dawnus hyn ar hyd a lled Cymru, ac mae dysgu am y budd parhaol y mae CCIC yn ei gael ar eu bywydau yn gwneud imi deimlo’n hynod o ffodus. Rwy’n edrych ymlaen yn eiddgar at y broses recriwtio ar gyfer aelodau’r flwyddyn nesaf, sy’n argoeli i fod yn fwy cynhwysol a chynrychiadol o’r Gymru gyfoes nag erioed o’r blaen.”

Dywedodd Elina Lee, Cynhyrchydd dan Hyfforddiant Cerdd y Dyfodol:

“Dwi’n dod o Wlad Thai yn wreiddiol ond fe symudais i Sweden ble y cefais fy magu. Yn 2017 fe symudais i Gaerdydd i ddilyn gradd mewn Cerddoriaeth Boblogaidd a Masnachol a Lleisiol ym Mhrifysgol De Cymru, ble graddiais yn 2020. Yn ystod fy amser yn astudio yn PDC, roeddwn i’n rhan o Ŵyl Immersed!, gŵyl gerdd wedi ei threfnu gan y myfyrwyr, ble cefais fy mhenodi’n Arweinydd Marchnata a chael cyfle i lunio a brandio’r ŵyl o’r cychwyn.

Wedi ymuno â thîm CCIC fel Cynhyrchydd dan Hyfforddiant, rwyf wedi cael y fraint o gynorthwyo gyda chynllunio a throsglwyddo prosiect Cerdd y Dyfodol. Hyd yma, mae wedi bod yn gyffrous cwrdd gyda chymaint o bobl ifanc gyda’r fath dalent anhygoel, ac mae’n teimlo’n braf gwybod eich bod yn rhan o’u taith i ddod yn artistiaid adnabyddus a cherddorion gweithgar y dyfodol.

Y tu hwnt i fod wedi ymuno gyda thîm CCIC yn ddiweddar, rwy’n gweithio hefyd fel cantores-cyfansoddwraig ac rwy’n creu fy mhrosiectau cerdd fy hun pryd bynnag bydd amser. Rwy’n dal i fwynhau canu ac rwy’n gobeithio gallu perfformio’n fyw pan gawn ni hawl i wneud hynny eto.

Yr hyn sydd fwyaf cyffrous am weithio gyda CCIC, yn fy marn i, ydi’r cyfleoedd sy’n cael eu cynnig i’r bobl ifanc. Wrth edrych yn ôl ar pan gychwynnais i greu cerddoriaeth yn berson ifanc, fe hoffwn i fod wedi cael yr un gefnogaeth ac adnoddau ag y mae CCIC yn ei ddarparu i gerddorion dawnus ar hyd a lled Cymru heddiw, a dwi wir yn credu ei bod hi’n hanfodol i roi mwy o le i grwpiau sydd heb gynrychiolaeth ddigonol yn y sîn gerddoriaeth yng Nghymru.”

Cydweithrediad newydd rhwng Theatr Cenedlaethol Ieuenctid Cymru a Hijinx fel rhan o'r tymor Maniffest

Yn ddiweddar, dychwelodd aelodau o Academi Hijinx a Theatr Cenedlaethol Ieuenctid Cymru (ThCIC) i ddyfeisio theatr fyw wyneb-yn-wyneb, i gyd-greu gwaith cynhwysol newydd mewn partneriaeth.

Wrth ddod ynghyd wyneb-yn-wyneb am y tro cyntaf ers cychwyn y cyfyngiadau ymbellhau cymdeithaol, cymerodd yr 8 person ifanc ran mewn prosiect pedwar diwrnod yn llawn creadigedd a chrefft llwyfan. Dan arweiniad Ben Pettit-Wade (Cyfarwyddwr Creadigol, Hijinx), datblygodd aelodau’r cast ddarn gwreiddiol o theatr yn seiliedig ar syniadau a straeon a awgrymwyd gan yr aelodau eu hunain.

Cyn y cwrs yng Nghanolfan S4C Yr Egin yng Nghaerfyrddin, daeth y cast a’r timau creadigol at ei gilydd ar-lein dros Zoom i arbrofi, archwilio, a datblygu syniadau newydd ar gyfer y darn. Er mwyn sicrhau diogelwch pob un o’r cyfranogwyr a’r staff, cydymffurfiodd y prosiect yn llwyr gyda’r holl ganllawiau ymbellhau cymdeithasol ac iechyd cyhoeddus oedd yn ofynnol ar y pryd, gyda phrofion rheolaidd, ymbellhau cymdeithasol a mesurau glanhau ychwanegol yn eu lle trwy gydol y prosiect.

Y gwaith YaD newydd hwn, o’r enw Maniffest/Hijinx, yw’r prosiect diweddaraf sy’n rhan o dymor Maniffest ThCIC, archwiliad blwyddyn o hyd o hunaniaeth ieuenctid a democratiaeth yn y Gymru gyfoes. Dyma’r cam cyntaf mewn ffordd newydd o weithio i Theatr Cenedlaethol Ieuenctid Cymru, yn cyfuno theatr fyw wyneb-yn-wyneb a gweithgareddau ar-lein, gan alluogi pobl ifanc i gydweithio gydag eraill ym mhob cwr o’r wlad.

Ar gydweithio gyda Theatr Hijinx, dywedodd Dafydd Evans, aelod o Theatr Cenedlaethol Ieuenctid Cymru:

“Mae fy mhrofiad ar gwrs ThCIC / Hijinx yn un fydd yn aros gyda mi am amser hir. Roedd y broses o greu’r darn o theatr mor ddifyr; roedd y byrfyfyrio oedd yn rhan o’n gwaith rhannu yn y diwedd yn gymaint o hwyl, dwi’n credu ein bod yn aml iawn wedi anghofio y bydden nhw’n rhan o’r sesiwn rhannu. Fe ddysgais i gymaint am sut y gellir creu theatr mewn ffyrdd eraill ar wahân i gyda phen a phapur, a sut y gall fod yn rhyngweithiol ac yn brofiad ymgollol ar gyfer cynulleidfa. Dwi wedi creu perthnasau newydd gwych gydag aelodau a staff o ThCIC a Hijinx, ac alla’ i ddim aros am y cyfle nesaf inni gyd gwrdd eto.”

Dywedodd Gareth, aelod o Academi Hijinx:

“Roedd cwrdd â gweithio gyda’n gilydd wyneb-yn-wyneb, wedi misoedd o fod ar Zoom, jesd... ’does dim geiriau i fynegi sut dwi’n teimlo, oherwydd roedd yn brofiad mor anhygoel.”

Mae tymor Maniffest eleni’n gyfres o gynyrchiadau sy’n anelu i ddangos beth sy’n atgyfnerthu pobl ifanc, ac i arddangos Cymru fel y mae pobl ifanc yn ei gweld yn yr unfed ganrif ar hugain - gwlad ddwyieithog, amrywiol a bywiog gyda llais artistig cryf.

Mae uchafbwyntiau eraill tymor Maniffest yn cynnwys:

Maniffest 16/17: Cyfres o ffilmiau byrion yn cynnwys monologau gwreiddiol gan aelodau ThCIC, wedi eu creu gan ddramodwyr o bob cwr o Gymru mewn ymateb i hawl pobl ifanc 16 ac 17 oed i bleidleisio am y tro cyntaf. Mae’r pedair ffilm gyntaf ar gael i’w gwylio yma: amam.cymru/maniffest

Maniffest yn Theatr Clwyd: Cynhyrchiad theatr ddigidol ddwyieithog newydd sbon a gyflwynwyd ar-lein, ysgrifennwyd gan Hanna Jarman a’i gyd-gynhyrchu gyda Theatr Clwyd.

Maniffest / Mindset: Prosiect cydweithredol digidol rhwng ThCIC a Theatr Solomonic Peacocks, Malawi, yn archwilio sut all gwneuthurwyr theatr ifanc o wahanol wledydd ddod at ei gilydd i greu theatr gan ddefnyddio eu ffonau symudol. Trosglwyddir y gwaith hwn mewn partneriaeth gyda British Council Cymru.

Fel tymor, bydd Maniffest yn helpu i roi llais i bob cymuned, gan adlewyrchu amrywiaeth pobl ifanc yng Nghymru. Bydd hyn yn cynnwys cyflwyno theatr yn y Gymraeg a’r Saesneg. Wrth i Gymru ddechrau dod ati ei hun wedi effaith COVID-19, mae’r prosiectau wedi eu cynllunio i fod yn bosibl yn ddigidol ac wyneb-yn-wyneb, yn dibynnu ar y cyngor iechyd cyhoeddus sydd yn ei le ar y pryd.

Celfyddydau Cenedlaethol Ieuenctid Cymru i ddyfarnu cannoedd o fwrsariaethau ychwanegol, diolch i ariannu newydd gan Ymddiriedolaeth Leverhulme

Mae Celfyddydau Cenedlaethol Ieuenctid Cymru (CCIC) wedi derbyn grant Ysgoloriaeth Celfyddydau o £165,448 oddi wrth Ymddiriedolaeth Leverhulme, fydd yn cefnogi cannoedd o bobl ifanc o gefndiroedd incwm-is i gymryd rhan yn ein hyfforddiant perfformio lefel uchel.

Bydd yr ariannu’n caniatáu i CCIC ehangu ei rhaglen bresennol o fwrsariaethau a’i rhaglenni datblygu yn sylweddol dros y pedair blynedd nesaf, fydd o fudd i 240 o bobl ifanc bob blwyddyn erbyn 2024-25.

Yn ogystal â chynnig gostyngiadau ffïoedd o hyd at 100% ar gyfer cyrsiau preswyl yr haf, bydd yr aelodau mwyaf anghenus hefyd yn derbyn grant bwrsariaeth i helpu i dalu costau teithio a chostau eraill. Eleni, am y tro cyntaf, cyflwynodd CCIC ildiad ffïoedd awtomatig i bobl ifanc o gartrefi sy’n derbyn Credyd Cynhwysol, Prydau Ysgol am Ddim neu Grantiau Dysgu llawn gan Lywodraeth Cymru, yn ogystal ag i aelodau sy’n ofalwyr ifanc, ceiswyr lloches neu rai sydd â phrofiad o fod mewn gofal.

Meddai Gillian Mitchell, Prif Swyddog Gweithredol CCIC, wedi’r cyhoeddiad: “Rydym yn falch dros ben inni dderbyn yr ariannu hwn oddi wrth Ymddiriedolaeth Leverhulme. Bydd yn ein helpu i barhau i sicrhau bod pob person ifanc yn gallu cael mynediad i’n hyfforddiant perfformio lefel uchel, waeth beth fo’u cefndir ariannol.

Ein nod yw sicrhau bod cael mynediad i fwrsariaeth mor rhwydd â phosibl - heb unrhyw ffurflenni hir neu alw am lawer o dystiolaeth. Rydym am leihau’r stigma a sicrhau bod yr ariannu yma’n helpu’r rheini y bwriedir iddo eu helpu - y cerddorion, actorion a dawnswyr ifanc mwyaf talentog o bob cymuned ledled Cymru.”

Mae’r grant hwn yn golygu mai Ymddiriedolaeth Leverhulme yw Prif Gefnogwr Cronfa Bwrsariaethau CCIC. Mae Cronfa Bwrsariaethau CCIC yn cael ei chefnogi’n flynyddol hefyd gan Gronfa Bwrsariaeth Neil a Mary Ellen Webber, a Ffrindiau Cerddorfa Genedlaethol Ieuenctid Cymru. Rydym yn ddiolchgar hefyd i’r holl unigolion sy’n cyfrannu at ein cronfa bwrsariaethau trwy ddebyd uniongyrchol - gallwch ymuno â nhw trwy ymweld â https://www.ccic.org.uk/cefnogwch-ni.

Dim ond un elfen yw ehangu’r cynllun bwrsariaethau yn ymdrech barhaus CCIC i weithio tuag at sector celfyddydau mwy teg ar gyfer perfformwyr ifanc. Mae CCIC hefyd yn ehangu ein rhaglen o brosiectau datblygu, sydd wedi eu dylunio i ddarparu hyfforddiant wedi ei dargedu ar gyfer pobl ifanc o gymunedau heb gynrychiolaeth ddigonol, fel pobl ifanc ag anabledd, neu rai sydd o gymunedau sy’n dioddef hiliaeth.

Yn hwyrach yn 2021, bydd CCIC yn cyhoeddi argymhellion annibynnol cyfres o Dasgluoedd Amrywiaeth, sy’n cwmpasu cerddoriaeth, dawns a theatr, ynghyd â Chynllun Cydraddoldeb Strategol newydd diwygiedig. Bydd yr argymhellon a’r cynllun ill dau yn cynnwys targedau i gynyddu’r gyfran o gyfranogwyr ifanc sy’n disgrifio eu hunain fel B/byddar neu anabl, a’r gyfran o gyfranogwyr sy’n dod o gymunedau hilyddol.

Theatr Cenedlaethol Ieuenctid Cymru yn arddangos pedair ffilm fer newydd wrth i'r oedran bleidleisio ostwng i 16 mlwydd oed

Bydd aelodau o Theatr Cenedlaethol Ieuenctid Cymru (ThCIC) yn helpu lansio cyfres o ffilmiau o fonologau byr am ddemocratiaeth ieuenctid ar ddydd Iau, wrth i bobl ifanc 16 a 17 oed ledled y wlad baratoi at bleidleisio am y tro cyntaf yn etholiadau Senedd Cymru.

Yn #Maniffest1617, comisiynodd Theatr Cenedlaethol Ieuenctid Cymru fonologau newydd gan awduron blaenllaw o Gymru, sydd wedi cael eu ffilmio ar leoliad yng nghymuned pob aelod. Roedd y broses greadigol yn gydweithrediad rhwng yr aelodau ifanc a thîm o ysgrifenwyr, cyfarwyddwyr a gwneuthurwyr ffilm. Mae rhai o'r darnau yn gymeriadau ffuglennol ac eraill yn cael eu hadrodd yn y person cyntaf, ond mae'r holl ddarnau gorffenedig yn adlewyrchu meddyliau a theimladau'r aelodau ifanc am gynrychiolaeth ieuenctid a sut mae eu lleisiau'n cael eu clywed.

Dywedodd Megan, aelod o Theatr Cenedlaethol Ieuenctid Cymru: "Roedd e'n bwysig i mi fod y teimlad o falchder a'r hunaniaeth mae fy nghartref yn rhoi i mi yn cael ei fynegi'n glir. Mae'n bryd i ni frwydro dros hawliau i'r bobl a'r lle sy'n fy ngwneud i yn fi”

Bydd y pedair ffilm gyntaf y gyfres yn cael eu dangos am y tro cyntaf ar AM ar 6 Mai, 7pm a bydd posib gwylio'r cyfan ar-lein ar ôl ar https://amam.cymru/maniffest. Dyma'r comisiynau a'r perfformwyr newydd sy'n rhan o'r prosiect:

• Siân of Arc gan Mari Izzard - ysgrifenwyd ar gyfer Lauren, aelod ThCIC o Gaerdydd (wedi'i berfformio yn y Gymraeg a'r Saesneg) lle mae Lauren yn perfformio rhan lle mae’n lansio ei hymgyrch gwleidyddol yn 18 mlwydd oed ar gyfer bod yn Brif Weinidog Gymru.

• Manifest for Megan gan Catherine Dyson - ysgrifenwyd ar gyfer Megan, aelod ThCIC o Dreorci (perfformiwyd yn Saesneg) yn ymateb telynegol i berthynas Megan gyda'i chymuned a'i hamgylchedd

• The Future gan Matthew Bulgo - ysgrifenwyd ar gyfer Sam, aelod o ThCIC o Gastell-nedd (perfformiwyd yn Saesneg), perfformiad annwyl yn edrych yn ôl ar ei ddeffroad gwleidyddol;

• Fama gan Manon Steffan Ros - a ysgrifenwyd ar gyfer Dyddgu o Fethesda (perfformiwyd yn Gymraeg), dyma adlewyrchiad doniol a theimladwy ar bŵer cymuned.

Yn ogystal â chynhyrchu’r comisiynau newydd, mae Celfyddydau Cenedlaethol Ieuenctid Cymru wedi bod yn bartner allweddol yng Ngweithgor Ymgysylltu Etholiad y Gymdeithas Diwygio Etholiadol, gan helpu annog pobl ifanc i gofrestru i bleidleisio cyn y dyddiad cau ym mis Ebrill. Mae CCIC hefyd wedi cyd-weithio â'r Urdd a Senedd Cymru i helpu codi ymwybyddiaeth ymhlith holl aelodau ensemble CCIC, gan gynnwys cymryd rhan mewn ffug etholiadau ac ysgrifennu eu maniffesto eu hunain. Cefnogir y gwaith hwn gan Gronfa Democratiaeth y DU, menter Ymddiriedolaeth Diwygio Joseph Rowntree.

Dywedodd Gillian Mitchell, Prif Weithredwr Celfyddydau Ieuenctid Cenedlaethol Cymru: “Er bod rhai sialensiau’n codi wrth weithio yn ystod y pandemig, rydyn ni'n credu ei bod hi'n eithriadol o bwysig bod lleisiau ifanc yn cael eu clywed yn ystod yr etholiad hwn.

"Dim ond rhan o'r gwaith helaeth o helpu perfformwyr ifanc talentog ledled Cymru yw'r prosiect cyffrous hwn, gyda chomisiynau newydd yn y Gymraeg a'r Saesneg, rydyn ni'n datblygu ei lleisiau ac yn parhau â'u hyfforddiant artistig er gwaethaf yr aflonyddwch parhaus"

Y prosiect uchelgeisiol yma yw rhan gyntaf tymor Maniffest 2021 ThCIC, a lansiwyd heddiw. Bydd y rhaglen yma o waith yn cael ei ddangos trwy gydol y flwyddyn, ac yn dangos sut mae pobl ifanc yn gweld Cymru yn yr 21ain ganrif - gwlad sy'n fywiog, amrywiol a dwyieithog sydd â llais artistig cryf.

Ymhlith uchafbwyntiau eraill y tymor Maniffest hyd yma mae:

• Maniffest yn Theatr Clwyd: Cynhyrchiad theatrig ddigidol wedi'i ddangos ar-lein a'i ysgrifennu gan Hanna Jarman ac wedi'i gyd-gynhyrchu gan Theatr Clwyd

• Maniffest x Hijinx: Darn dyfeisiedig theatrig wedi'i greu yng Ngorllewin Cymru mewn partneriaeth â Hijinx, un o brif gwmnïau theatr gynhwysol Ewrop o artistiaid ag anableddau dysgu a / neu awtistig

• Maniffest / Mindset: Cydweithrediad digidol rhwng ThCIC a Theatr Solomonic Peacock,s theatre, Malawi, yn darganfod sut mae gwneuthurwyr theatr o wahanol wledydd yn dod at ei gilydd i greu theatr yn defnyddio ei ffonau symudol. Cyflwynir y gwaith hwn mewn partneriaeth â Chyngor Prydain Cymru.

• Cydweithrediad rhwng ThCIC a Theatr Ieuenctid yr Alban, wedi'i gyflwyno'n ddwyieithog yng Ngaeleg Albanaidd a Chymraeg.

Fel tymor, bydd Maniffest yn helpu rhoi llais i bob cymuned yn adlewyrchu amrywiaeth pobl ifanc yng Nghymru. Bydd hyn yn cynnwys cyflwyno theatr yn y Gymraeg a'r Saesneg. Wrth i Gymru ddechrau gwella o effeithiau COVID-19, mae'r prosiectau wedi'i chynllunio i fod yn ymarferol yn ddigidol ac wyneb yn wyneb, gan ddibynnu ar gyngor iechyd cyhoeddus fydd ar waith ar y pryd.

Enwau mawrion o’r byd dawns a theatr gerdd i helpu i ddathlu perfformio ledled Cymru

Mae Layton Williams, seren Everybody’s Talking About Jamie, a’r arloesol ZooNation - The Kate Prince Company ymysg yr enwau mawrion fydd yn cynnal gweithdai ar gyfer dawnswyr ifanc o Gymru, fel rhan o ddathliad rhithiol o ddawns a pherfformiad ym mis Mai.

Gwahoddir dawnswyr ifanc o bob cwr o Gymru i gymryd rhan yn y Diwrnod Dawns digidol hwn, fydd yn cynnwys diwrnod yn llawn dop o weithdai a dosbarthiadau meistr gaiff eu rhedeg gan rai o goreograffwyr a sefydliadau dawns penna’r wlad.

Trefnir y digwyddiad gan Gelfyddydau Cenedlaethol Ieuenctid Cymru, fydd yn dwyn ynghyd ddawnswyr Cymreig rhwng 11 a 19 oed i gymryd rhan mewn llu o weithdai bywiog, fydd yn cynnwys ystod eang o arddulliau dawns.

Caiff y gweithdai, a gynhelir ar Ddydd Sadwrn 15 Mai, eu harwain gan rai o goreograffwyr a sefydliadau dawns mwyaf adnabyddus y wlad, yn cynnwys Cwmni Dawns Cenedlaethol Cymru, Ballet Cymru, Company Chameleon a llawer mwy.

Bydd Layton, sy’n fwyaf adnabyddus am chwarae’r brif rôl yn y sioe gerdd anhygoel Everybody’s Talking About Jamie, yn arwain gweithdy awr o hyd yn canolbwyntio ar theatr gerdd.

"I cannot wait to slay with everyone (virtually) soon... Let’s dance!!” - Layton Williams

Yn y cyfamser, bydd yr anfarwol ZooNation - The Kate Prince Company, yn cynnal gweithdy theatr hip hop.

Yn ogystal â gweithdai, bydd y Diwrnod Dawns yn cynnwys dosbarthiadau meistr a thrafodaethau panel hefyd, gan roi cyfle i grwpiau dawns gorau’r wlad ddod at ei gilydd i ddathlu dawns trwy raglen fywiog o ryngweithio digidol. Daw’r digwyddiad i ben gyda nifer o ddosbarthiadau meistr digidol ar Ddydd Sul 16 Mai wedi eu hanelu at ddawnswyr dan hyfforddiant, graddedigion ac artistiaid dawns proffesiynol 18+ oed sy’n gweithio neu’n byw yng Nghymru.

Caiff digwyddiad y dydd Sadwrn ei ddilyn gan gyngerdd clo ar-lein U.Dance Cymru - dathliad cenedlaethol o berfformiadau gan bobl ifanc 11-19 mlwydd oed, a hyd at 25 oed i bobl ifanc ag anableddau. Cynhyrchir U.Dance Cymru 2021 gan Gelfyddydau Cenedlaethol Ieuenctid Cymru fel rhan o raglen genedlaethol U.Dance, a drosglwyddir mewn partneriaeth gyda One Dance UK.

Mae One Dance UK a U.Dance Cymru yn croesawu dawnswyr sy’n perfformio unrhyw arddull neu genre, ac yn annog grwpiau cynhwysol i ymgeisio i ddawnsio yn yr ŵyl.

Oherwydd y cyfyngiadau Covid-19 presennol, cynhelir digwyddiad eleni ar-lein yn ei gyfanrwydd.

Y dyddiad cau ar gyfer derbyn ceisiadau U.Dance 2021 ydi 5pm ar Ddydd Gwener 30 Ebrill, a bydd rhaid i grwpiau fod ar gael i gymryd rhan mewn gweithdai a digwyddiadau digidol ar Ddydd Sadwrn 15 Mai.

Meddai Jamie Jenkins, Cynhyrchydd gyda Dawns Genedlaethol Ieuenctid Cymru: “Mae’n bleser mawr iawn gennym gynnal dau ddigwyddiad mor wych - y Diwrnod Dawns ac U. Dance Cymru ar y cyd.

“Ar adeg pan rydym yn dal i orfod cadw ein pellter, mae’n wych y gallwn ni gyd ddod at ein gilydd yn rhithiol i ddathlu dawns ac arddangos y llu o arddulliau dawnsio rhagorol sydd gennym ledled Cymru.

“Mae’n fraint cael rhai o’r enwau mwyaf ym myd dawns i gymryd rhan yn y digwyddiad hwyliog a bywiog hwn.”

Cyhoeddi mentoriaid Cerdd y Dyfodol 2021

Yn dilyn prosiect peilot llwyddiannus yn 2019, mae prosiect datblygu cerddoriaeth gyfoes Celfyddydau Cenedlaethol Ieuenctid Cymru, Cerdd y Dyfodol, wedi cychwyn ar gyfer 2021.

Mae Cerdd y Dyfodol yn brofiad creadigol, cydweithredol ar gyfer artistiaid a cherddorion ifanc 16-18 oed, sy’n anelu i ddarganfod a datblygu’r genhedlaeth nesaf o egin-dalentau cerddorol yng Nghymru.

Trwy gyfres ddwys o ddosbarthiadau meistr a gweithdai digidol, bydd y bobl ifanc talentog a brwdfrydig hyn yn gweithio ochr-yn-ochr â grŵp o fentoriaid o’r diwydiant sy’n gweithio ledled Cymru, gan ddatblygu sgiliau creu cerddoriaeth ac ysgrifennu caneuon cyfoes, dysgu am lwybrau i mewn i’r diwydiant, tra’n creu gwaith newydd cyffrous.

Mae’n bleser gan Gelfyddydau Cenedlaethol Ieuenctid Cymru gyhoeddi’r mentoriaid ar gyfer Cerdd y Dyfodol 2021. Yn amrywio o ran genre o hip-hop a soul i gerddoriaeth werin, indie ac electronica, rydym yn falch i fod yn gweithio gyda charfan o bobl greadigol sy’n cynrychioli’r gorau o dirwedd miwsig cyfoes Cymru.

---

Heledd Watkins

Astudiodd Heledd fel crëwr theatr cyn symud ymlaen i weithio fel gitarydd bas sesiynol, gan deithio gydag Emmy the Great, Chloe Howl a’r Paper Aeroplanes. Dechreuodd ysgrifennu ei cherddoriaeth ei hun fel menyw flaen y band celf-roc HMS Morris, gydag uchafbwyntiau’n cynnwys perfformio yn Glastonbury, rhyddhau dwy record hir a chael eu henwebu am ddwy Wobr Gerddoriaeth Gymreig. Mae hefyd wedi rhoi tro ar gyflwyno ar radio a theledu.

---

Osian Huw Williams

Astudiodd Osian Gerddoriaeth ym Mhrifysgol Bangor ac aros yno i gwblhau ei radd Meistr mewn Cyfansoddi. Mae bellach yn chwarae i’r Candelas, Blodau Papur, Siddi a Chowbois Rhos Botwnnog, sy’n golygu ei fod yn gigio trwy’r flwyddyn fel arfer. Enillodd Osian Dlws y Cerddor yn Eisteddfod Genedlaethol Meifod yn ôl yn 2015 ac mae’n dal i ddatblygu’r sioe gerdd gyda’i frawd a’i chwaer. Mae’n ystyried ei hun yn ffodus iawn i fod wedi trefnu’r gerddoriaeth a chwarae tair gig gyda Cherddorfa’r Welsh Pops, oedd yn cynnwys y Candelas, Blodau Papur a Geraint Jarman.

Mae wedi cyfansoddi llu o drefniadau ac arwyddganeuon ar gyfer y teledu ac mae bellach yn rhedeg Stiwdio Sain, Llandwrog gyda dau beiriannydd arall ac mae wedi cynhyrchu artistiaid yn cynnwys Mared Williams, Y Cledrau a Rhys Gwynfor.

---

Tumi Williams (Skunkadelic)

Yn dilyn rhyddhau ei albwm cyntaf ‘Musically Drifting’ yn 2010, mae gan Skunkadelic nifer drawiadol o uchafbwyntiau yn cynnwys sioeau byw gyda Talib Kweli, Chali 2na, The Pharcyde, Jehst, Rag n Bone Man, Blackalicious, Ugly Duckling, Jungle Brothers, Ocean Wisdom…. Yn ogystal â chydweithio gydag artistiaid fel The Allergies, Mr Woodnote, Dr Syntax, TY, Sparkz, Truthos Mufasa, Twogood, Band Pres Llareggub ymhlith rhestr faith. Awydd i greu a rhannu yw’r ysgogiad sy’n dylanwadu ar bob cam y mae’n ei gymryd. Yn 2020 daeth ei gerddoriaeth i amlygrwydd mawr a chael ei chwarae’n aml gan Lauren Lauverne (BBC6 music), Adam Walton (BBC Radio Wales), Jo Wiley (BBC Radio 2), Tom Robinson (BBC6 music) ac arwyddgan 2021 ITV.

Ar wahân i’w waith unigol, mae Skunkadelic yn aelod parhaol sy’n arwain y cymundod monster funk 9 person, Afro Cluster, ac mae wedi ysgrifennu, recordio a theithio’n rheolaidd gyda’r grŵp dros y deng mlynedd diwethaf. Maent wedi ymddangos mewn nifer o wyliau a digwyddiadau proffil uchel yn cynnwys Glastonbury, Womad, Greenman, Boomtown a Gŵyl y Llais ac wedi teithio gydag artistiaid fel Ibibio Sound Machine, Craig Charles, Gilles Peterson a’r Hot 8 Brass Band.

---

Gwion ap Iago

Pan wnaeth DJ ddim troi lan i chwarae ei set, dyna pryd gychwynnodd taith cerddoriaeth electronig Gwion. Wedi mwynhau theatr gerdd yn yr ysgol a bod mewn cynhyrchiad gyda Youth Music Theatre UK yn Aberdeen yn 16 oed, mae cerddoriaeth wastad wedi bod yn elfen o fywyd Gwion ond dim ond ym Mhrifysgol Aberystwyth y blagurodd ei gariad o’r 'untz untz', y 'wobs' a’r 'boots and cats'. Ers y noson dyngedfennol honno, mae Gwion wedi chwarae ledled y DU mewn llu o brif ystafelloedd, nifer o wyliau, bariau tywyll ac ambell ffrwd fyw gyda’i grŵp electronig Roughion.

Mae Gwion hefyd yn rhedeg label electronig ar gyfer artistiaid yng Nghymru dan yr enw priodol Afanc, ar ôl yr anghenfil o’r Mabinogi, ei rôl yma yw cynrychioli egin-artistiaid a chynnig cyngor ar eu sain a’u helpu ar y ffordd, ac ar hyn o bryd mae’n gweithio gyda brenin y byd hip-hop Cymreig Mr Phormula ar ailgymysgu albwm ar gyfer Tiwns. Meddai - “Dwi’n gweithio ar lot o brosiectau cyffrous ar hyn o bryd ond rydw i’n fwyaf cyffrous am Fentora gyda CCIC. Alla’ i ddim aros i fwrw ati i ddysgu a datblygu gyda’r 'Bicep', 'Goldie' neu Charlotte de Witte nesaf."

---

Dionne Bennett

Mae Dionne Bennett yn lleisydd aml-genre, cyfansoddwr caneuon, artist lleisio, cynhyrchydd cerddoriaeth a pherfformwraig. Mae hefyd yn darlithio ar lefel gradd, gan arbenigo mewn perfformio lleisiol, a thechneg. Mae Dionne yn gyn-enwebai am Wobr Gerddoriaeth Gymreig ddechreuodd gigio’n rheolaidd yn 14 oed, rhyddhau ei record gyntaf yn 15 oed, ac sydd wedi parhau i weithio’n llwyddiannus yn y diwydiant fyth ers hynny.

Mae gwaith eang ac amrywiol Dionne yn cwmpasu nifer o arddulliau cerddorol. Mae hyn wedi ei galluogi i weithio gyda rhai o gerddorion mwyaf talentog ac uchel eu parch y diwydiant, o Dr John (a enillodd 5 gwobr Grammy), y pianydd Jazz hynod dalentog Jason Rebello, ac enillydd unawdol Her Blws Rhyngwladol y Blues Foundation Gee Weevil, i hoelion wyth y byd cerddorol Cymreig yn cynnwys Daf Ieuan a Gruff Rhys o’r Super Furry Animals, Mark Roberts o Catatonia a Lincoln Barrett (High Contrast) a enwebwyd am wobr Grammy.

Mae Dionne yn dal i ysgrifennu a rhyddhau deunydd newydd yma a thramor, ac mae ei chreadigedd a’i chynnyrch creadigol yn destament i bwysigrwydd sicrhau amrywiaeth yn y sîn gerddorol. Fel artist aml-genre, mae wedi cydweithio ar lu o recordiau hir, gan gyfuno gwahanol ddiwylliannau, arddulliau a thraddodiadau cerddorol gyda’i dylanwadau diwylliannol personol fel Cymraes ddu.

---

Kizzy Crawford

Mae Kizzy Crawford, y Gymraes Gymraeg 24 oed o dras Barbadaidd, wedi dod i fri trwy gyfuno jazz soul-gwerin dwyieithog. Mae Kizzy wedi derbyn sylw am ei gwaith a chael ei darlledu ar Radio Cymru, BBC 6MUSIC, BBC Radio 1, 2, 3 a 4, BBC Radio Wales a Jazz FM yn ogystal â derbyn cefnogaeth ar donnau’r awyr yn Ewrop ac UDA.

Mae Kizzy wedi chwarae mewn llu o gigs yn cynnwys sioeau yng Nghynulliad Cenedlaethol Cymru yn ystod WOMEX, London Jazz Festival, The Great Escape, UNESCO Berlin, Gŵyl y Gelli, Gŵyl Dinefwr, Cynhadledd Plaid Cymru, Blissfields, Wakestock, Celtic Connections, L’Orient, Gŵyl Fwyd Y Fenni (ble y perfformiodd ei sengl Golden Brown yn fyw ar BBC Radio 4) a’r Prince Edward Island Festival, Canada. Mae Kizzy hefyd wedi perfformio fel artist gwadd gyda Cherddorfa Genedlaethol Gymreig y BBC ac fel artist cefnogol i Gruff Rhys, Newton Faulkner, Benjamin Francis Leftwich, a pherfformiodd hefyd gyda Cerys Matthews yn Nhŷ’r Cyffredin, San Steffan ac yn fwy diweddar bu’n artist gwadd gydag Omar ar ei gân ‘Be Thankful’ yn ei sioe lwyddiannus yn Llundain.

---

Mae tîm Cynhyrchu Cerdd y Dyfodol 2021 yn cynnwys Elen Roberts (Cynhyrchydd) ac Eädyth (Cynhyrchydd Cynorthwyol).

Eädyth

Ar gyfer Cerdd y Dyfodol 2021, mae Celfyddydau Cenedlaethol Ieuenctid Cymru wedi partneru gyda’r dylunydd sain a’r cerddor electronig dwyieithog Eädyth, sy’n prysur dyfu’n enw adnabyddus i wrandawyr BBC Radio Cymru a BBC Wales. A hithau’n cynhyrchu ei brand unigryw ei hun o sain electro-soul mwyn, ei geiriau dwyieithog a’i sioeau byw trawiadol, mae wedi bod yn rhan o gynlluniau talent BBC Horizons a Forté Project, sy’n profi gymaint y mae’r diwydiant cerddoriaeth Cymreig yn credu yn ei thaith gerddorol. Fel Cynhyrchydd Cynorthwyol gyda Cherdd y Dyfodol, bydd Eadyth yn taro llygad feirniadol dros y prosiect ac yn cynnig syniadau strwythurol meddylgar yn seiliedig ar ei phrofiadau personol fel egin-artist ifanc Cymreig sy’n byw yng Nghymoedd y De.

---

Elen Roberts

Mae Elen yn guradur a chynhyrchydd amlddisgyblaethol sy’n gweithio yng Nghaerdydd sydd â 10 mlynedd o brofiad yn y diwydiant celfyddydol rhyngwladol. Mae wedi gweithio gyda cherddorion ar amrywiol gyfnodau o’u gyrfa, yn enwedig wrth eu helpu i fwyafu cyfleoedd arddangos rhyngwladol a datblygu marchnadoedd newydd ar gyfer eu gwaith. Mae wedi gweithio gydag artistiaid oedd yn arddangos yn SXSW, Indie Week Toronto, POP Montréal, WOMEX a’r Folk Alliance International, i enwi dim ond rhai. Mae Cerdd y Dyfodol yn gyfle cyffrous i weithio gyda phobl ifanc ar ddechrau eu taith greadigol i ddod yn gerddorion proffesiynol.